Հայաստանի յուրաքանչյուր 3-րդ քաղաքացին աղքատ է. Դավթյան

Էներգետիկ անվտանգության ինստիտուտի ղեկավարի համոզմամբ` նախ և առաջ անհրաժեշտ է ուշադրություն դարձնել բնակչության ոչ միայն եկամուտների, այլև մի շարք այլ հանգամանքների վրա, որոնք պայմանավորում են մարդկանց կյանքի որակը: Դրանց շարքում գիտնականը նշել է առողջապահությունը, կենցաղային պայմանները, կրթության հասանելիությունը, զբաղվածությունը և այլն:

Ներկայումս, ինչպես նշում է, վերլուծական և վիճակագրական տարբեր տվյալների համադրությունը ցույց է տալիս, որ Հայաստանի բնակչության գրեթե կեսն այս կամ այն կերպ բախվում է սոցիալական անվտանգության խնդրին: Սակայն Դավթյանն առավել մտահոգիչ ու վտանգավոր է համարում այն, որ խոցելի են հատկապես երեխաները:

ՅՈՒՆԻՍԵՖ-ի տվյալներով` Հայաստանի երեխաների 64%-ը սոցիալապես խոցելի են: Մասնավորապես դա ակնհայտ է գյուղական համայնքներում, որտեղ տվյալ ցուցանիշը հասնում է 82%-ի, իսկ քաղաքներում` 53%-ի: Հաղորդվում է, որ երեխաների միայն 12%-ը սոցիալական խնդիրների չեն բախվում:

Վահե Դավթյանի համոզմամբ` ՀՀ իշխանությունների կողմից հայտարարված 10% տնտեսական աճի հավանականությունն այս պարագայում հերթական «տնտեսական առասպելաբանությունն է», որը նպատակ ունի լրացնել ռազմավարական վակուումը` ձևավորված կառավարության տնտեսական քաղաքականությունում:

Գիտությունների դոկտորի խոսքով` տնտեսական աճի գնահատման հիմքում պաշտոնյա-տնտեսագետների հաշվարկում են ոչ թե իրական, այլ անվանական ՀՆԱ-ն, որի աճը կարող է պայմանավորված լինել նաև ինֆլյացիայի աճով: Դավթյանը նշում է, որ Հայաստանում հունվար-հուլիս ամիսներին գնաճը կազմել է 6,1%, որտեղ սննդամթերքը` 8,5%: Միաժամանակ, աշխատավարձերի բարձրացումն այդ ընթացքում 5%-ից փոքր-ինչ ավելի է եղել:

Օրերս ՀՀ Կենտրոնական բանկը հերթական անգամ բարձրացրել է բազային դրույքը` հասցնելով աննախադեպ ցուցանիշի` 7%-ի: Սա, Դավթյանի համոզմամբ, հանգեցնելու է վարկային տոկոսադրույքների աճին ինչպես բիզնեսի, այնպես էլ բնակչության համար:

Գիտնականը եզրակացնում է, որ աղքատության մակարդակի գնահատման բազմակողմանի սկզբունքի կիրառման դեպքում Հայաստանի յուրաքանչյուր երրորդ քաղաքացին աղքատ կհամարվի (այդ թվում` աղքատներ, շատ աղքատներ և ծայրահեղ աղքատներ):

Քաղաքական գիտությունների դոկտորի մյուս եզրակացությունն այն է, որ աղքատների և հարուստների միջև տարանջատումը շարունակում է խորանալ, իսկ միջին խավի ձևավորման նախադրյալներ առայժմ չեն նշմարվում: Նրա խոսքով` առանց սոցիալական ճգնաժամի հաղթահարման, Հայաստանում խիստ բարդ կամ անհնար կլինի հաղթահարել քաղաքական ճգնաժամն ու սկսել կառուցել արտաքին հարաբերությունները: Դավթյանի պնդմամբ` բնակչության մեծ մասը զբաղվելու է օրվա հացի հայթայթմամբ, մի մասը կմեկնի արտագնա աշխատանքի, միայն փոքր մասը կշարունակի «գրոշներ ստանալ քաղաքական խաղում»: