Google-ը պաշտոնապես հայտարարել է քվանտային գերազանցության հասնելու մասին

Հաղորդվում է, որ Google-ի քվանտային համակարգիչն ընդամենը 200 վայրկյանում այնպիսի խնդիր է կատարում, որն ամենաարագ սուպերհամակարգիչը կկատարեր 10 հազար տարում:

Նորություններ

ՏՏ

# Google

# Q-Bit

# Sycamore

# Քվանտային համակարգիչներ

Քվանտային համակարգիչ Sycamore / ©computerra.ru / Հեղինակ՝ անհայտ, լուսանկարը տրամադրել է օգտատերը

Google-ը պաշտոնապես հայտարարել է քվանտային գերազանցության հասնելու մասին: Առաջին անգամ ընկերությունն այդ մասին հայտնել էր սեպտեմբերին, սակայն այժմ Google-ի հետազոտական հոդվածը հրապարակվել է Nature գիտական ամսագրում:

Հոդվածում ընկերությունը բացատրում է, թե ինչպես է 53 քյուբիթ (Q-Bit) քվանտային Sycamore համամակարգիչն ընդամենը 200 վայրկյանում կատարել այն հաշվարկումները, որոնց իրականացման համար աշխարհի ամենաարագ սուպերհամակարգչից կպահանջվեր 10 հազար տարի:

Տեսականորեն՝ սա նոր հնարավորություններ կարող է ստեղծել ապագայի տեխնոլոգիաների համար. ավելի կատարյալ մարտկոցներ, դեղեր արտադրելու, արտանետումները նվազեցնելու և մեքենայական ուսուցման կատարելագործման համար: Սակայն այս փուլում Sycamore-ը գործնականում գրեթե անօգուտ է. այն ստեղծված է դիտարկման համար, թե ինչի է ընդունակ քվանտային համակարգիչը:

Քվանտային համակարգչի դեմոնստրացիա / ©Google

Google-ի գլխավոր տնօրեն Սունդար Պիչաին MIT Technology Review-ին տված հարցազրույցի ժամանակ այն համեմատել է Ռայթ եղբայրների առաջին թռիչքի հետ: Նրա խոսքով՝ առաջին ինքնաթիռը թռչել է ընդամենը 12 վայրկյան, և դա գործնականում կիրառելի չէ: Բայց դա ցույց է տվել ինքնաթիռի թռչելու հնարավորությունը:

Սեպտեմբերի վերջին The Financial Times-ն ուշադրություն էր դարձրել Google-ի զեկույցին, որը տեղադրված էր NASA-ի կայքում: Այնտեղ նշված է եղել, որ ընկերության նոր արտադրանքը կարող է 200 վայրկյանում կատարել այն, ինչը ժամանակակից սուպերհամակարգիչը՝ IBM ընկերության Summit-ը, կկատարի 10 հազար տարում: Այդ ժամանակ հրապարակումը արագ հեռացվել է, իսկ Google-ը հրաժարվել է մեկնաբանել: Այժմ տեղեկությունը պաշտոնապես է հայտարարվում:

Վրիպա՞կ գտաք։ Նշեք հատվածը և սեղմեք Ctrl + Enter։