Երկրի «այլմոլորակայինը». ինչի՞ համար են շոշափուկներն աստղաքթի մոտ
Աստղաքիթը մյուս խլուրդներից տարբերվում է դնչի վրա քսաներկու շոշափուկներով, ինչով կենդանին հիշեցնում է այլմոլորակայինի:
Աստղաքիթը խլուրդների ընտանիքի կաթնասուն է: Այս տեսակը հանդիպում է միայն Հյուսիսային Ամերիկայում՝ Հարավարևելյան Կանադայում և ԱՄՆ-ի հյուսիս-արևելքում: Մյուս խլուրդներից այս կենդանին տարբերվում է արտասովոր դունչով. աստղաքթի մոտ այդ հատվածում 22 մաշկային աճույթներ են:
Ինչի՞ համար են այդ տարօրինակ շոշափուկները: Ինչպես հայտնի է՝ տեսողությունը խլուրդների մոտ ամենաուժեղ կողմը չէ: Դրա փոխարեն աստղաքիթն ունի հրաշալի շոշափելիք, ինչի շնորհիվ նա կարող է վայրկյանական գտնել հավանական որսը: Կենդանին իր շոշափուկներն այնքան արագ է շարժում, որ մարդու աչքն ի վիճակի չէ հետևելու դրանց. աստղաքիթը դրանցով մեկ վայրկյանում կարող է մինչև 13 փոքր մարմին ստուգել:
Բացի այդ՝ գիտնականներն այս աճույթները համարում են գիտությանը հայտնի ամենազգայուն շոշափման համակարգը: Կենսաբան Քենեթ Կատանիան այդ օրգանում արձանագրել է ավելի քան 100 հազար նյարդաթել: Դա հինգ անգամ ավելին է, քան մարդու ձեռքում:
Շոշափուկներն առանց հոգնելու ուսումնասիրում են շրջակա միջավայրը և վերլուծում ամենը: Աստղաքթերն իրենց համար որս են գտնում ջրում, գետնի տակ: Նրանք ուտում են անձրևորդերի, միջատների և նրանց թրթուրների, ինչպես նաև խեցգետնակերպ և փոքր ձկների:
Աստղաքիթը մեծ կենդանի չէ. սովորաբար նրա մարմինը հազիվ է գերազանցում 10 սմ-ը, երբեմն հասնում 20-ի: Դնչիկի տրամագիծն ընդամենը 1 սմ է, հասուն առանձնյակների քաշը՝ մոտ 85 գ: Այս խլուրդն ունի նաև պոչ՝ 8 սմ երկարությամբ:
Աստղաքիթն առաջին կաթնասունն է, որ ջրի տակ հոտ է զգում: Դրա համար խլուրդները պղպջակներ են արձակում, ապա շոշափուկներով դրանք հետ են քաշում՝ այդպիսով որսալով հոտը: Այս արտասովոր ունակություններով կենդանով սնվում են բուերը, ճուռակները, աքիսները, կատուներն ու շները: Ջրում նրանց վտանգ են սպառնում ջրաքիսները, խոշոր պերկեսները և ձկնկուլները:
Մեկնաբանությունները