Բլինկենը վերահաստատել է Հայոց ցեղասպանությունը ճանաչող բանաձևին սատարելու վերաբերյալ Բայդենի խոստումը

Պետքարտուղարի թեկնածուն հավաստիացրել է, որ վարչակազմը, պաշտոնում հաստատվելուց հետո, կհստակեցնի Սպիտակ տան հայտարարության ձևակերպումը՝ Հիշատակի օրը նշելու համար, և այդ կարևոր հարցի վերաբերյալ կխորհրդակցի Կոնգրեսի հետ:

Նորություններ

# ԱՄՆ

# Էնտոնի Բլինկեն

# Հայոց ցեղասպանություն

# Ջո Բայդեն

Հիշատակի օր / © AP / Հեղինակ՝ անհայտ, լուսանկարը տրամադրել է օգտատերը

Ավելի վաղ հայտնել էինք, որ ԱՄՆ պետքարտուղարի թեկնածու Էնտոնի Բլինկենը խոսել էր Արցախյան հակամարտության վերաբերյալ ամերիկյան նոր դիրքորոշման մասին` խոստանալով, որ աշխատելու է Կոնգրեսի և պաշտպանության քարտուղարի հետ` հստակեցնելու աջակցության այն չափը, որը կբավարարի Հայաստանի և տարածաշրջանի անվտանգության պահանջները:

Այժմ Բլինկենը, պատասխանելով սենատոր Էդ Մարեյի հարցերին, վերահաստատել է Հայոց ցեղասպանությունը ճանաչող բանաձևին սատարելու վերաբերյալ նորընտիր նախագահ Ջո Բայդենի խոստումը: Վերջինս այդ մասին հայտարարել էր Հիշատակի օրը, երբ նրա թեկնածությունն առաջադրվել էր նախագահի պաշտոնի համար:

«Նոր վարչակազմն Օսմանյան կայսրության կողմից հայ ժողովրդի դեմ կատարված հանցագործությունները պաշտոնապես կճանաչի՞ որպես ցեղասպանություն»,- հարցին ի պատասխան՝ Բլինկենը նշել է, որ պարտավորվելու են գերակայություն տալ մարդու իրավունքներին և ապահովել, որ նման ողբերգություն չկրկնվի:

Սենատորը հարցադրում է արել նաև աշնանը տեղի ունեցած պատերազմից հետո ամերիկյան կողմի դիրքորոշման և Ադրբեջանի կողմից պահվող ռազմագերիների անհապաղ վերադարձն ապահովելու վերաբերյալ:

Բլինկենի խոսքով` նախագահը հայտարարել է, որ ԱՄՆ-ն պետք է դիվանագիտական ջանքեր գործադրի հակամարտության տևական լուծում գտնելու, ինչպես նաև ռազմագերիների վերադարձը խթանելու համար: Այդ կապակցությամբ անհրաժեշտ է համարել աշխատել եվրոպացի գործընկերների հետ:

Էնտոնի Բլինկենը խոստացել է, որ պետքարտուղարի պաշտոնում նշանակվելու դեպքում կխթանի ԱՄՆ-ի ներգրավվածությունը` Լեռնային Ղարաբաղի հակամարտության մշտական կարգավորումը գտնելու հարցում: Լուծումը, ըստ Բլինկենի, պետք է ապահովի Լեռնային Ղարաբաղի անվտանգությունը և օգնի կանխել նոր պատերազմի բռնկումը: Թեկնածուն ևս մեկ անգամ շեշտել է, որ ենթադրվում է Մինսկի խմբի ձևաչափով ԱՄՆ ներգրավվածության ակտիվացում և լրացուցիչ դիվանագիտական աշխատանք` երրորդ կողմերի հետագա միջամտությունը կանխելու համար:

Վրիպա՞կ գտաք։ Նշեք հատվածը և սեղմեք Ctrl + Enter։