Եկամտային հարկով ուսման վարձ վճարելը 2020-2021 ուստարվանից կմեկնարկի
Սա ուսանողներին կքաջալերի աշխատել, իսկ աշխատողները կկարողանան նաև սովորել. օրենքի նախագծի լրամշակված տարբերակը շուտով կդրվի շրջանառության մեջ:
ՀՀ Ազգային ժողովի Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանն իր ֆեյսբուքյան էջում տեղեկացրել է, որ մոտ օրերս շրջանառության մեջ կդրվի պատգամավորներ Լիլիթ Մակունցի և Սիսակ Գաբրիելյանի նախագիծը: Դրանով նախատեսվում է աշխատող ուսանողների ուսման վարձը փոխհատուցել եկամտային հարկով:
Նախագիծը «Իմ Քայլը» խմբակցության ղեկավարի և պատգամավորի կողմից ներկայացվել էր ավելի վաղ: Այժմ պատրաստ է լրամշակված տարբերակը:
Նախագծով առաջարկվում էր եկամտահարկից փոխհատուցել ինչպես հիմնական աշխատողների, այնպես էլ քաղաքացիաիրավական պայմանագրով ծառայություններ մատուցող ուսանողների վարձավճարները:
Պետությունը պետք է վճարեր նաև միջին մասնագիտական եւ տեխնիկական ուսումնական հաստատությունում վճարովի սովորող ու աշխատող ուսանողների վարձավճարները: Նոր՝ լրամշակված տարբերակը շրջանառության մեջ դնելու դեպքում նախագծի մանրամասները կտեղեկացնենք:
Մեկնաբանությունները