Հայաստանում՝ 160 վարակված, որոնցից 11-ն ունի թոքաբորբ
Նախարարը նշել է, որ ոչ մեկի կյանքին վտանգ չի սպառնում: Արսեն Թորոսյանը կարևորել է մեկուսացման և ինքնամեկուսացման ցուցումը խախտելու դեպքում պատիժը խստացնելու վերաբերյալ փոփոխությունների ընդունումը, քանի որ արդեն 600 մարդ մեկուսացված է, և անվերջ մեկուսացնել հնարավոր չէ:
Հայաստանում կորոնավիրուսով վարակվածների թիվը մարտի 21-ի ժամը 10:00-ի դրությամբ 160 է: Նախորդ օրվա համեմատ վարակվածների թիվն աճել է 24-ով: Դեռևս 1-ն է առողջացել:
Նախարար Արսեն Թորոսյանն ավելի վաղ իր ֆեյսբուքյան էջի ուղիղ եթերում հայտնել է, որ վարակվածներից 11-ի մոտ առկա է թոքաբորբ, բայց ոչ մեկի կյանքին վտանգ չի սպառնում: Նախարարի խոսքով՝ մեծ մասի մոտ ախտանշաններ չկան կամ շատ թույլ են: Ընդհանուր առմամբ՝ պացիենտներ կան 5 բուժհաստատություններում, որոնցից հիմնականը Նորքի ինֆեկցոնն է, պացիենտներ կան նաև մարզային հաստատություններում:
Թորոսյանը նշել է, որ Հայաստանում մեկուսացվածների թիվը շուրջ 600 է. անվերջ հնարավոր չէ կազմակերպել մեկուսացումը՝ համապատասխան վայրերի սահմանափակ լինելու պատճառով: Ուստի անհրաժեշտ է համարել աստիճանաբար անցնել ինքնամեկուսացմանը:
Առողջապահության նախարարը կարևորել է Քրեական օրենսգրքում առաջարկվող փոփոխությունների ընդունումը, որը մարտի 20-ին Ազգային ժողովն առաջին ընթերցմամբ ընդունեց, իսկ երկրորդ ընթերցումը նախատեսված է երկուշաբթի օրը՝ 11:00-ին: Այն խիստ պատիժներ է սահմանում արտակարգ դրության պայմաններում մեկուսացման և ինքնամեկուսացման ցուցումները խախտելու համար:
Մեկնաբանությունները