ԱՄՆ-ում արգելել են Covid-19-ով վարակվածներին բուժել հիդրոքսիքլորոքինով
ԱՄՆ-ի Սննդամթերքի և դեղամիջոցների որակի սանիտարական վերահսկողության վարչությունը (FDA) չեղարկել է կորոնավիրուսի դեմ պայքարում հիդրոքսիքլորոքին դեղամիջոցի կիրառման թույլտվությունը:
Քլորոքինֆոսֆատ (CQ) և հիդրոքսիքլորոքինսուլֆատ (HCQ) դեղամիջոցներն արգելվել են օգտագործել կորոնավիրուսով վարակվածների բուժման համար այն պատճառով, որ կլինիկական փորձարկումները Covid-19-ի դեմ պայքարի հարցում դեղամիջոցների բավարար արդյունավետություն ցույց չեն տվել: Բացի այդ՝ նշվել է, որ հիդրոքսիքլորոքինի և քլորոքինի մոտ մեծաթիվ կողմնակի լուրջ ազդեցություն ունեն:
FDA-ն հայտարարել է, որ, հիմնվելով կորոնավիրուսի բուժման համար կիրառվող դեղամիջոցների հետազոտության և ի հայտ եկած գիտական նոր տվյալների վրա, պարզվել է, որ քլորոքինը և հիդրոքսիքլորոքինը կարող են արդյունավետ չլինել Covid-19-ի դեմ պայքարում: Բացի այդ՝ սրտի և այլ օրգանների վրա կողմնակի ազդեցությունների շարունակական դրսևորումների պարագայում նշված դեղամիջոցները կորոնավիրուսի դեմ պայքարում անթույլատրելի են համարում:
Ավելի վաղ Առողջապահության համաշխարհային կազմակերպության գլխավոր տնօրեն Թեդրոս Ադհանոմ Գեբրեյեսուսը հայտարարել էր, որ Covid-19-ով վարակված պացիենտների նկատմամբ հիդրոքսիքլորոքինի դեղամիջոցի փորձարկումները դադարեցվելու են անվտանգության նկատառումներից ելնելով: Պատճառը ծանր ընթացք ունեցող պացիենտների մոտ ստեղծված իրավիճակն էր. նրանց մոտ մահացության բարձր ցուցանիշ էր գրանցվել:
Մեկնաբանությունները