Ռուսաստանը զսպում է նոր բախումը, բայց գործընթացը դանդաղ է ընթանում. քաղաքագետ

Քաղաքագետ Ռուբեն Մարգարյանն անդրադարձել է հայ-ադրբեջանական սահմանին տիրող իրավիճակին և դրա հետ կապված լուծման տարբերակների մասին խոսակցություններին: Մասնավորապես, Անվտանգության խորհրդի քարտուղար Արմեն Գրիգորյանի այն հայտարարությանը, որ նախատեսվում է ռուս սահմանապահների տեղակայում, սահմանագծում և սահմանազատում, ապա ռուսական ստորաբաժանումների փոխարեն հայկական և ադրբեջանական սահմանապահների տեղակայում:

Քաղաքագետի խոսքով` Ադրբեջանի նախագահի դիրքորոշումն այդ հարցում միանշանակ չէ: Մի կողմից, ինչպես նշում է, Ալիևն ավելի հաճախ է խոսում Հայաստանի հետ խաղաղության պայմանագրի ստորագրման պատրաստակամության մասին և Երևանին մեղադրում է ձգձգելու մեջ, մյուս կողմից` շարունակում է կրել զինվորական համազգեստ (այս հանգամանքին ուշադրություն էր դարձրել նաև Ադրբեջանում ԱՄՆ-ի նախկին դեսպան Ռիչարդ Կոզլարիչը):

Մարգարյանի համոզմամբ` խնդիրը միայն համազգեստը և այլ երկրների արձագանքները չեն. խոսելով խաղաղության մասին` Ադրբեջանը և Թուրքիան պարբերաբար կամ անդադար համատեղ զորավարժություններ են անցկացնում: Դրանցից մեկը ներկայումս ընթանում է («Մուստաֆա Քեմալ Աթաթուրք-2021» անվանումը կրող զորավարժության մասին է խոսքը, խմբ.):

Քաղաքագետը հիշեցնում է, որ իրավիճակը լարված է պահում նաև հայ ռազմագերիների հարցը: Չնայած նրան, որ նոյեմբերի 9-ի Հայտարարությունում հստակ նշված է բոլոր ռազմագերիների և պահվող այլ անձանց անհապաղ վերադարձի պարտավորության մասին, Բաքուն չի իրականացնում այդ կետը և ցուցադրական դատական գործընթացներ է իրականացնում նրանց նկատմամբ` որակելով «դիվերսանտներ»:

Հայ փորձագետների կարծիքով` եզրույթների այդօրինակ խաղը խոսում է Երևանից հավելյալ զիջումների հասնելու Բաքվի ձգտումների մասին: Մասնավորապես, ինչպես նշում է Մարգարյանը, Ադրբեջանը Հայաստանին դրդում է ստորագրել խաղաղության պայմանագիր, ըստ որի` ամբողջ Լեռնային Ղարաբաղը կճանաչվի Ադրբեջանի մաս: Այս հարցով է բացատրվում ռազմագերիների վերադարձի հապաղումը` միջազգային հեղինակավոր կառույցների կոչերին:

Մարգարյանը շեշտում է, որ 15 գերիների վերադարձը հայրենիք Հայաստանի խորհրդարանական ընտրություններից առաջ իրականացվել է ԱՄՆ-ի և Վրաստանի միջնորդությամբ: Շատերը, նրա խոսքով, դա որակել են որպես Նիկոլ Փաշինյանի նախընտրական քարոզչությանն Ադրբեջանի աջակցություն, որի դիմաց հայկական կողմը Բաքվին Ակնայի շրջանի ականապատ դաշտերի քարտեզն է տրամադրել:

Քաղաքագետ Ռուբեն Մարգարյանը, անդրադառնալով ռազմական նոր սրման հավանականությանը, ընդգծում է, որ դրա վտանգի զսպման երաշխավորը ներկայումս սահմանամերձ շրջաններում տեղակայված ռուսական ստորաբաժանումներն են: Այդուհանդերձ, ինչպես նշում է, սահմանային խնդրի լուծման առաջարկված գործընթացը խիստ դանդաղ է ընթանում: