Կորոնավիրուսի դեմ 133 պատվաստանյութ է մշակվում. ԱՀԿ
Ամբողջ աշխարհում մշակվող 133 պատվաստանյութերը գտնվում են փորձարկումների տարբեր փուլերում: ԱՀԿ ներկայացուցչի խոսքով՝ համավարակը հնարավոր է դադարեցնել միայն զանգվածային պատվաստման միջոցով:
Առողջապահության համաշխարհային կազմակերպության արտակարգ դրությունների ծրագրի տնօրեն Մայքլ Ռայանը հայտարարել է, որ ներկայումս աշխարհում կորոնավիրուսի դեմ 133 պատվաստանյութ է մշակվում:
Հաղորդվում է, որ բոլոր պատվաստանյութերը գտնվում են փորձարկումների տարբեր փուլերում: Ռայանը հույս է հայտնել, որ համաշխարհային մակարդակի պատվաստումների արդյունքում հնարավոր կլինի վերջ դնել կորոնավիրուսի համավարակին:
Նրա խոսքով՝ վարակի դեմ պայքարի մյուս միակ տարբերակը վիրուսի փոխանցման շղթայի կոտրումն է: Սակայն այդ միջոցն, ըստ ԱՀԿ ներկայացուցչի, անիրատեսական է, քանի որ խիստ կարանտինային միջոցների ապահովումն անհնար է համարվում:
Առողջապահության համաշխարհային կազմակերպության նախագահ Թեդրոս Ադհանոմ Գեբրեյեսուսն ավելի վաղ հայտարարել էր, որ համավարակը նոր թափ է հավաքում: Վարակի տարածմանը, նրա խոսքով, նպաստել է նաև տաք եղանակը. «մարդիկ հոգնել են տանը նստելուց»:
ԱՀԿ նախագահը նշել է, որ կորոնավիրուսի համավարակն ավելի է բարդացել, քանի որ, չնայած որոշ երկրներում արձանագրված հաղթահարմանը, մյուսներում վարակվածության նոր դեպքերն ավելի են շատացել: Հավելենք, որ Covid-19-ով վարակվածների թիվն ամբողջ աշխարհում գերազանցել է 10 միլիոնը:
Մեկնաբանությունները