Յուհան քաղաքում շահագործման է հանձնվել 10 օրում կառուցված երկրորդ հիվանդանոցը

Չինաստանի Յուհան քաղաքում կորոնավիրուսով հիվանդների բուժման համար նախատեսված նոր՝ «Լեյշենշան» հիվանդանոց է հանձնվել շահագործման: Սա թվով 2-րդ հիվանդանոցն էր քաղաքում, որ կառուցվել է ընդամենը 10 օրում: Նույն ժամկետում օրեր առաջ շահագործման էր հանձնվել «Խոշենշան» հիվանդանոցը:

Բժիշկ-մասնագետների առաջին խումբն արդեն տեղում է, այսօր արդեն պատրաստվում է ընդունել առաջին հիվանդներին: Այս հիվանդանոցում են տեղակայվելու նաև արդեն հաստատված ախտորոշմամբ հիվանդներին:

Յուհանի Ցզյանսյա արվարձանում կառուցված ինֆեկցիոն հոսպիտալը զբաղեցնում է 79 հազար քառ.մ տարածք, որի մեծ մասը նախատեսված է հիվանդների համար, 10 շինություն առանձնացված է բուժանձնակազմի և նյութատեխնիկական միջոցների տեղակայման համար: Բժիշկներին հատկացվել է ընդհանուր առմամբ 264 սենյակ՝ յուրաքանչյուրը մինչև 6 հոգու համար, 3 հատ երկհարկանի մահճակալով, ունեն օդորակիչ, հեռուստացույց, էլեկտրական այլ սարքավորումներ, առանձին զուգարան և լոգարան:

Հաղորդվում է, որ հոսպիտալն առանձնացված է 32 բաժնի, որտեղ ընդհանուր 1500 մահճակալ է տեղադրված: Յուրաքանչյուր պալատում, բացի ծանր հիվանդների համար նախատեսվածներից, երկուական հիվանդ է պառկելու: Հիվանդանոցում աշխատելու է շուրջ 2 հազար բժիշկ:

Այս հիվանդանոցը սկսել էին կառուցել հունվարի 27-ից: Սկզբում այն նախատեսվում էր շահագործման հանձնել փետրվարի 5-ին, սակայն ժամկետները մի փոքր հետաձգվել են: Երկու հիվանդանոցներն էլ կառուցվել են Պեկինի «Սյաոտանշան» հոսպիտալի մոդելով, որը 2003թ. SARS ատիպիկ թոքաբորբի համաճարակի ժամանակ կառուցվել է 7 օրում՝ մեծ քանակությամբ հիվանդների բուժելու նպատակով:

Հիշեցնենք, որ նոր տեսակի՝ 2019-nCoV կորոնավիրուսի պաճառով արդեն մահացել է 724 մարդ, հիվանդների թիվն անցել է 34,5 հազարից: Այն բռնկվել էր դեկտեմբերին՝ Չինաստանի Յուհան քաղաքում:

Էջանիշ

Պատճենել հղումը

Email

Տպել

Twitter

VK

Telegram