Կորոնավիրուսի խրոնիկա — Շեշտ.am (shesht.am)
87 րոպե
Խմբագրություն

Կորոնավիրուսի խրոնիկա

Մարտի 12-ի դրությամբ Covid-19 կորոնավիրուսով վարակվածների թիվն աշխարհում հասել է 126344-ի: Մահացել է 4639 մարդ, առողջացել են 68289-ը: Հայաստանում կարանտինում է գտնվում 41 մարդ, որոնց թիվը կարող է օրվա ընթացքում մեծանալ:

Չժեցզյանի համալսարանի հետազոտողների խումբը պատվաստանյութ է ստեղծել կորոնավիրուսով վարակվածներին բուժելու համար / © REUTERS / China Daily

Դեկտեմբերի 31-ին չինական իշխանությունները հայտարարել են երկրում նոր տեսակի` Covid-19 կորոնավիրուսի տարածման մասին: Ամբողջ հունվար ամսվա ընթացքում վարակը վերածվեց համաճարակի՝ տարածվելով նաև Չինաստանից շատ հեռու գտնվող երկրներում:

Ստորև ներկայացնում ենք Covid-19 կորոնավիրուսին առնչվող տեղեկությունների խրոնիկան.

Մարտի 12

  • Մարտի 12-ի դրությամբ Covid-19 կորոնավիրուսով վարակվածների թիվն աշխարհում հասել է 126344-ի: Մահացել է 4639 մարդ, առողջացել են 68289-ը:
  • Հայաստանում կորոնավիրուսով վարակվածները 4-ն են: 41 մարդ գտնվում է Ծաղկաձորում՝ մեկուսացված ռեժիմում. նրանցից 31-ը մարտի 14-ին դուրս են գրվելու, սակայն նախօրեին ի հայտ եկած նոր դեպքերի կապակցությամբ հնարավոր է այլ քաղաքացիներ ևս մեկուսացվեն:
Կառավարության անդամների ճեպազրույցներ

Կառավարության անդամների ճեպազրույցներ

Опубликовано Ազատություն ռադիոկայան Четверг, 12 марта 2020 г.
  • Հայաստանում գտնվող կորոնավիրուսով վարակվածներից 3-ը գանգատներ չունեն, բուժում չեն ստանում, իսկ 1-ը թոքաբորբ ունի, ստանում է համապատասխան բուժում:

‼️Հանրապետությունում մինչ օրս իրականացվել է 262 հետազոտություն` 4-ը դրական արդյունքով: Բոլոր պացիենտները հոսպիտալացված…

Опубликовано Alina Nikoghosyan Четверг, 12 марта 2020 г.

‼️Նոր կորոնավիրուսի 3 նոր դեպքի մասին հայտարարելուց հետո համացանցում տարածվել է, իբր «Հետազոտության ընթացքում ևս 3 անձի…

Опубликовано Alina Nikoghosyan Среда, 11 марта 2020 г.
  • Իտալիայում 12 հազարից ավելի մարդ վարակված է Covid-19-ով: Մահացածների թիվը հասել է 827-ի, առողջացել են 1045-ը: Իտալական իշխանությունները կարանտինի ռեժիմն ավելի են խստացրել. փակվել են առևտրային օբյեկտները՝ բացառությամբ մթերային և դեղատնային, բոլոր բարերն ու սրճարանները:
  • Իրանում վարակվածների թիվն 9 հազար է: Մահացել է 354 մարդ, առողջացել են 2959-ը:
  • Դերասան Թոմ Հենքսն ու նրա կինը վարակվել են կորոնավիրուսով: Այդ մասին դերասանը գրառում է կատարել թվիթերյան իր էջում.

Վրաստանում նոր տեսակի կորոնավիրուսով վարակվածների թիվը 24 է:

Մարտի 11

Covid-19 կորոնավիրուսով վարակվածների թիվը մոտեցել է 120 հազարի: Համաճարակից մահացել է 4290 մարդ, առողջացել և հիվանդանոցից դուրս են գրվել 65,9 հազարը:

Թուրքիայում կորոնավիրուսով վարակվածության առաջին դեպքն է գրանցվել. այդ երկրի քաղաքացին վերջին օրերին է վերադարձել Եվրոպայից:

Վրաստանում առաջին անգամ անչափահաս երեխա է վարակվել կորոնավիրուսով: Ընդհանուր վարակվածների թիվը Վրաստանում ներկայումս 23 է:

Կորոնավիրուսով է վարակվել Մեծ Բրիտանիայի Առողջապահության փոխնախարար Նադին Դորիսը:

Իրանում կորոնավիրուսով վարակվածների թիվը գերազանցել է 8 հազարը, մահացել է 291 մարդ, առողջացել են 2731-ը: ԱՀԿ-ն հիացմունք է հայտնել ԻԻՀ առողջապահական գերատեսչության ձեռնարկած միջոցառումների առթիվ:

Իտալիայում վարակվել է ավելի քան 10 հազար մարդ: Մահացել են 631-ը, առողջացել՝ 724-ը:

Մարտի 10

  • Մարտի 10-ի դրությամբ Covid-19 կորոնավիրուսով վարակվածների թիվ աշխարհում հասել է 114544-ի: Համաճարակից մահացել է 4026 մարդ, առողջացել և հիվանդանոցներից դուրս են գրվել 64034-ը:
  • Իտալիայում կորոնավիրուսով վարակվածների թիվն անցել է 9 հազարից, մահացել է 463 մարդ, առողջացել են 724-ը: Ամբողջ Իտալիայում մինչև ապրիլի 3-ը հայտարարվել է կարանտին:
  • Չինաստանի Յուհան քաղաքում կառուցված 14 ժամանակավոր հիվանդանոցները փակվել են: Նշված հաստատությունների բոլոր պացիենտներն առողջացել և դուրս են գրվել:
  • ԱՄՆ նախագահ Դոնալդ Թրամփը շփվել է Ներկայացուցիչների պալատի 2 անդամի հետ, որոնք ինքնամեկուսացվել են կորոնավիրուսի պատճառով: Հաղորդվում է, որ հանդիպումից հետո նախագահի մոտ ախտանշաններ չկան, և նա չի մեկուսացվելու:
  • Իսրայել ժամանող բոլոր ուղևորները երկու շաբաթով կարանտինի ներքո են գտնվելու՝ անկախ նրանից, թե որ երկրից են ժամանել:

Մարտի 9

  • Նոր տեսակի կորոնավիրուսով վարակվածների թիվն ամբողջ աշխարհում հասել է 110297-ի: Covid-19-ը խլել է 3840 մարդու կյանք, առողջացել և հիվանդանոցներից դուրս են գրվել 62097-ը:
  • Իրանում 7 մարդ մահացել է մեթիլային սպիրտի թունավորումից: Հաղորդվում է, որ մահացածները զոհ են գնացել համացանցային խորհուրդներին, որտեղ Covid-19-ի դեմ արդյունավետ պայքարի միջոց է վկայակոչվել մեթիլային սպիրտը:
  • Հնդկաստանում 3 տարեկան երեխայի մոտ կորոնավիրուս է հայտնաբերվել: Նա ընտանիքի հետ Իտալիայից է վերադարձել և ունեցել է բարձր ջերմություն: Հիշեցնենք, որ վարակվածների թվում նախկինում մանկահասակ երեխաներ չեն եղել:
  • Ֆրանսիական խորհրդարանի 4 պատգամավոր վարակվել է կորոնավիրուսով:
  • Պորտուգալիայի նախագահ Մարսելու Ռեբելու դե Սոուզան ինքնամեկուսացվել է: Վերջերս նախագահը հանդիպել էր դպրոցականների հետ, որոնցից մեկի մոտ ավելի ուշ կորոնավիրուս է հայտնաբերվել: Դե Սոուզան ինքնակամ 14 կմնա կարանտինում:
  • Apple ընկերության ղեկավար Թիմ Կուկն իր աշխատակիցներին թույլատրել է աշխատել տանից: Թույլտվությունը վերաբերում է այն շրջաններում գտնվող գրասենյակներին, որտեղ կորոնավիրուսով վարակվածության դեպքեր են գրանցվել:

Մարտի 8

  • Մարտի 8-ի դրությամբ Covid-19-ով վարակվածների թիվն աշխարհում հասել է 109571-ի: Կորոնավիրուսից մահացել է 3799 մարդ, առողջացել և հիվանդանոցից դուրս են գրվել 60693-ը:
  • Իտալիան վարակվածների թվով հաջորդում է Չինաստանին՝ առաջ անցնելով Հարավային Կորեայից. վերջինում վարակվածները 7314-ն են, իսկ Իտալիայում՝ 7375-ը: Մահացածները` համապատասխանաբար՝ 50 և 366:
  • Վարակվածների թվով չորրորդ տեղում Իրանն է` 6566: Մահացել է 194 մարդ, առողջացել են 2134-ը: Իրանում մի շարք արտադրամասեր ավելացրել են աշխատաժամանակը՝ դիմակների անհրաժեշտ քանակն արտադրելու համար:

Իրանում սկսվել է դիմակներ արտադրելու ազգային շարժում՝ կորոնավիրուսի դեմ պայքարելու համարԻրանում կորոնավիրուսի…

Опубликовано Sahak Shahmooradian Воскресенье, 8 марта 2020 г.
  • Հայաստան ժամանող ուղևորների նկատմամբ հսկողությունն ուժեղացվել է նաև Ֆրանսիա, Գերմանիա և Իսպանիա ուղղություններով:

Մինչ օրս կատարվել է 203 հետազոտություն կորոնավիրուսի հայտնաբերման համար, որից դրական ինչպես գիտեք, եղել է միայն…

Опубликовано Arsen Torosyan Суббота, 7 марта 2020 г.

Մարտի 7

  • Կորոնավիրուսով վարակվածների թիվը մարտի 7-ի դրությամբ հասել է 105559-ի: Մահացել է 3555 մարդ, առողջացել և հիվանդանոցից դուրս են գրվել 58354-ը:
  • Հարևան Իրանում Covid-19-ով վարակվածների թիվը հասել է 5823-ի, մահացել են 145-ը, առողջացել է 1669 մարդ: Մարտի 7-ին հայտնի է դարձել, որ մահացել է կին պատգամավոր: Նորընտիր պատգամավորներից մեկը մահացել էր փետրվարի 29-ին: Ընդհանուր առմամբ մոտ 3 տասնյակ պատգամավորներ Իրանում վարակված են կորոնավիրուսով:

Մարտի 6

  • Covid-19 կորոնավիրուսով վարակվածների թիվը գերազանցել է 100 հազարը. ամբողջ աշխարհում վարակվածների ընդհանուր թիվը՝ 100645: Մահացածների թիվը 3411 է, առողջացածները և հիվանդանոցից դուրս գրվածները 55743-ն են:
  • Չինաստանում վարակվածները 89552-ն են, մահացել է 3042 մարդ: Հարավային Կորեայում համապատասխանաբար հետևյալ թվերն են՝ 6593 և 92, Իրանում՝ 4747 և 124, Իտալիայում՝ 3858 և 145, Գերմանիայում՝ 534 , մահվան դեպք չի գրանցվել, Ֆրանսիայում՝ 423 և 7, Ճապոնիայում՝ 348 և 6, Իսպանիայում՝ 261 և 3, ԱՄՆ-ում՝ 145 և 10 մահ:
  • Վրաստանը դադարեցրել է օդային հաղորդակցությունն Իտալիայի հետ: Ավելի վաղ հաղորդել էինք, որ կորոնավիրուսով վարակվածների թիվը Վրաստանում հասել է 9-ի. մեծ մասն Իտալիայից վերադարձածերն են:
  • Կորոնավիրուսի տարածման շուրջ մեղադրանքներ են հասունանում. Իրանում համոզված են, որ նոր տեսակի կորոնավիրուսն ԱՄՆ-ի կողմից կիրառվող կենսաբանական զենք է՝ ընդդեմ ԻԻՀ-ի, Սաուդյան Արաբիան Իրանին է մեղադրում տարածման համար, իսկ ԱՄՆ-ը՝ Չինաստանին՝ վիրուսի բռնկման մասին ժամանակին չտեղեկացնելու համար:
  • Հետաձգվել են մի շարք սպորտային, մշակութային միջոցառումներ բազմաթիվ երկրներում, քննարկվում է առաջիկա միջոցառումներն, այդ թվում՝ Տոկիոյի Օլիմպիական խաղերը, Եվրատեսիլը, ֆուտբոլային առաջնությունները, առանց հանդիսատեսի անցկացնելու հարցը:
  • Ծաղկաձորի Գոլդեն Փելես հյուրանոցում կարանտինում գտնվող ՀՀ 31 քաղաքացիների վիճակն, ըստ Առողջապահության նախարարի, լավ է. նրանք ապահովված են անհրաժեշտ պայմաններով:

Քիչ առաջ այցելեցի մեր հատուկ պայմաններում ապրող 31 քաղաքացիների կեցավայր՝ ծանոթանալու նրանց կեցության պայմաններին և ինքնազգացողությանը։ Բոլորը ապահովված են անհրաժեշտ ամեն ինչով և իրենց լավ են զգում։

Опубликовано Arsen Torosyan Пятница, 6 марта 2020 г.

Մարտի 5

  • Նոր տեսակի կորոնավիրուսից մահացածների թիվը հասել է 3286-ի: Վարակվածների ընդհանուր թիվն 95748 է, առողջացածները և հիվանդանոցներից դուրս գրվածները 53405-ն են:
  • Իրանում վարակվածների թիվը պաշտոնական տվյալներով 2922 է: Իսլամական Հանրապետությունում մահացել է 92 մարդ, առողջացել են 552-ը:
  • Իտալիայում թվերը համապատասխանաբար հետևյալն են՝ 3089, 92 և 276:
  • Վրաստանում կորոնավիրուսով վարակվածության չորրորդ դեպքն է գրանցվել: Իտալիայից վերադառնալուց մեկ շաբաթ անց Վրաստանի քաղաքացու մոտ ախտանշաններ են հայտնվել, թեստի արդյունքում Covid-19-ը հաստատվել է:
  • Թուրքիայից (Ստամբուլից) Սինգապուր ուղևորված քաղաքացու մոտ կորոնավիրուս է հայտնաբերվել, թեև պաշտոնական տվյալներով Թուրքիայում Covid-19-ով վարակվածության դեպքեր չեն գրանցվել:
  • ՀՀ Առողջապահության նախարար Արսեն Թորոսյանը հայտնել է, որ Ինֆեկցիոն հիվանդանոցում գտնվող պացիենտի և Ծաղկաձորում մեկուսացման մեջ գտնվող քաղաքացիների վիճակը լավ է, գանգատներ չունեն: Նախարարի խոսքով՝ 162 թեստավորում է կատարվել, որոնցից առայժմ մեկ դեպքն է դրական եղել:
Կառավարության նիստ |05 մարտ, 2020| ուղիղ միացում

Կորոնավիրուսի կանխարգելման աշխատանքների, բեռնատար ավտոմեքենաների՝ վրացական սահմանը հատելու եւ ճանապարհների վերանորոգման աշխատանքների մասին։

Опубликовано Nikol Pashinyan / Նիկոլ Փաշինյան Среда, 4 марта 2020 г.

Մարտի 4

  • Մարտի 4-ի դրությամբ նոր տեսակի կորոնավիրուսով վարակվածների թիվն աշխարհում հասել է 93160-ի: Մահացել է 3198 մարդ, իսկ առողջացածներն ու հիվանդանոցից դուրս գրվածները 50690-ն են:
  • Չինաստանից հետո վարակվածների թվով առաջին տեղում են Հարավային Կորեան (5328), Իտալիան (2502), Իրանը (2336) և Diamond Princess զբոսանավը (706):
  • Իրանում այս պահի դրությամբ պաշտոնական տվյալներով մահացածների թիվը 77 է, վարակել է ընդհանուր առմամբ 2336 մարդ, որոնցից 291-ն արդեն առողջացել են:
  • Ռուսաստանում կառավարությունը որոշել է ժամանակավորապես արգելել դիմակների և բժշկական մի շարք պարագաների արտահանումը: Հաղորդվում է, որ արգելքը չի վերաբերում անհատական միջոցներին և հումանիտար օգնությանը: Որոշումն ուժի մեջ կլինի մինչև հունիսի 1-ը:
  • Վարակվածության նոր դեպքեր են գրանցվել Բելառուսում. նրանցից երկուսը Վիտեբսկում են, չորսը՝ Մինսկում: Ավելի վաղ հաղորդվել էր Իտալիայից վերադարձած քաղաքացու մոտ Covid-19-ի հայտնաբերման մասին:
  • ՀՀ Առողջապահության նախարարությունը դիմակներ կրելու վերաբերյալ հոլովակ է հրապարակել, որտեղ նշվում են, թե որ դեպքում պետք է դիմակ կրել.
Ե՞րբ և ինչպե՞ս է պետք կրել բժշկական դիմակ

Աշխարհում, այդ թվում Հայաստանում առաջացել է դիմակների դեֆիցիտ` պայմանավորված նոր կորոնավիրուսային վարակի համաճարակային իրավիճակով: Դիմակների կրումը նախատեսվում է միայն որոշակի դեպքերում: Ե՞րբ և ինչպե՞ս է պետք կրել բժշկական դիմակ` տեսանյութում.

Опубликовано ՀՀ առողջապահության նախարարություն Вторник, 3 марта 2020 г.
  • Նախարար Արսեն Թորոսյանը հայտնել է, որ ևս 12 հոգի թեստավորում են անցել. կորոնավիրուս չի հայտնաբերվել: Նախարարը զրուցել է Վրաստանի իր գործընկերոջ հետ. մեր և այնտեղի պացիենտներն իրենց լավ են զգում.

‼️Քիչ առաջ հեռախոսազրույց ունեցա Վրաստանի առողջապահության նախարար Եկատերինե Տիկարաձեի հետ` քննարկելու մեր երկու…

Опубликовано Arsen Torosyan Вторник, 3 марта 2020 г.

Մարտի 3

  • Covid-19 կորոնավիրուսով վարակվածների թիվն աշխարհում հասել է 90936-ի: Մահացածների թիվը 3117 է, առողջացած և հիվանդանոցից դուրս գրվածները 47995-ն են: Առողջացածներից 47203-ը Չինաստանում են:
  • Հայաստանում նոր տեսակի կորոնավիրուս է հայտնաբերվել առայժմ միայն 1 քաղաքացու մոտ: Նախորդ օրերին անցկացված թեստավորումը բոլորի, այդ թվում՝ վերջին 8 հոգու դեպքում բացասական արդյունք է գրանցել:

Սիրելի հայրենակիցներ, երեկվա իմ ուղիղ եթերից հետո եւս 8 կասկածելի դեպքի թեստավորում է տեղի ունեցել՝ բոլորը բացասական…

Опубликовано Nikol Pashinyan / Նիկոլ Փաշինյան Понедельник, 2 марта 2020 г.

Թարմացում իրավիճակի մասին:

Опубликовано Arsen Torosyan Понедельник, 2 марта 2020 г.
  • Իրանում վարակվածների թիվը պաշտոնական տվյալներով 1501 է, մահացածներինը՝ 66: Առողջացածներն Իրանում 291-ն են:
  • Իտալիայում 2036 մարդ է վարակվել կորոնավիրուսով: Մահացածները 52-ն են, առողջացածները՝ 149-ը:
  • Ռուսաստանում Covid-19 կորոնավիրուսով վարակվածներն այս պահին 6-ն են. 2-ը Չինաստանի քաղաքացիներ էին, ովքեր արդեն առողջացել են, 3-ը՝ Diamond Princess զբոսանավի ուղևորներն են, ևս մեկը Իտալիայից Մոսկվա մեկնած ռուսաստանցի է:
  • Եվրոպայի Կենտրոնական բանկի ղեկավար Քրիստին Լագարդը հայտարարել է, որ կորոնավիրուսի տարածումը վտանգներ է ստեղծում տնտեսական հեռանկարների և ֆինանսական շուկաների աշխատանքի համար: Կազմակերպությունը պատրաստականություն է հայտնել ձեռնարկելու անհրաժեշտ միջոցառումներ:

Մարտի 2

  • Նոր տեսակի կորոնավիրուսով վարակվածների թիվն աշխարհում հասել է 89073-ի: Մահացել է 3048 մարդ, առողջացել և հիվանդանոցից դուրս են գրվել 45095-ը՝ վարակվածների շուրջ կեսը:
  • Իրանում վարակվածների թիվը գրառման պահին ըստ պաշտոնական տեղեկությունների 978 է, մահացածներինը՝ 54: Առողջացածները 175-ն են: Հաղորդվում է բարձրաստիճան պաշտոնյայի մահվան մասին:
  • Վարչապետ Նիկոլ Փաշինյանի գլխավորությամբ տեղի է ունեցել Կորոնավիրուսի կանխարգելման հանձնաժողովի նիստ: Փաշինյանը հայտնել է, որ Հայաստանում վարակվածության նոր դեպքեր չեն գրանցվել, սակայն ներկայումս սպասում են 9 անձի թեստի արդյունքներին:
Ամփոփում եմ կորոնավիրուսի տարածումը կանխարգելող աշխատանքները համակարգող հանձնաժողովի նիստը։

Ամփոփում եմ կորոնավիրուսի տարածումը կանխարգելող աշխատանքները համակարգող հանձնաժողովի նիստը։

Опубликовано Nikol Pashinyan / Նիկոլ Փաշինյան Воскресенье, 1 марта 2020 г.
  • Վարչապետը նաև նշել է, որ առաջիկայում Իրանի հետ վիզային ռեժիմը կվերականգնվի: Կառավարությունը խորհուրդ է տվել չմեկնել Իտալիա և Թուրքիա:
  • Իտալիայից Չեխիա վերադարձած քաղաքացիների մոտ կորոնավիրուս է հայտնաբերվել: Իտալիայում մահացածների թիվը հասել է 34-ի: Վարակվածների թիվը 1694 է: Առողջացել են 84-ը:
  • Չինաստանը փորձագետների խումբ է ուղարկել Իրան՝ կորոնավիրուսի դեմ պայքարի հարցում աջակցելու համար: Իրանն առաջին երկիրն է, որին կորոնավիրուսի «հայրենիքը» բարձր մակարդակի աջակցություն է տրամադրում:

Մարտի 1

  • Գարնան առաջին օրվա դրությամբ աշխարհում կորոնավիրուսով վարակվածների թիվը հասել է 86986-ի: Մահացել է 2979 մարդ, առողջացել և հիվանդանոցից դուրս են գրվել 42294-ը: Չինաստանում վարակվածների գրեթե կեսն առողջացել են:
  • Հայաստանում, Լյուքսեմբուրգում և Իռլանդիայում գրանցվել են վարակվածության առաջին դեպքերը:

Սիրելի հայրենակիցներ, 1. Այսօրվա երթը՝ նվիրված Մարտի 1-ի զոհերի հիշատակին, չեղարկվում է։2. Կորոնավիրուսով վարակված…

Опубликовано Nikol Pashinyan / Նիկոլ Փաշինյան Суббота, 29 февраля 2020 г.
  • Թայլանդում, Ավստրալիյում և ԱՄՆ-ում կորոնավիրուսից մահվան առաջին դեպքերն են գրանցվել:
  • Վաշինգտոն նահանգում նոր տեսակի կորոնավիրուսի տարածմամբ պայմանավորված՝ հայտարարվել է արտակարգ դրություն:
  • Իրանում վարակվածների թիվը հասել է 593-ի: Մահացել է 43 մարդ, առողջացել են 123-ը:

Փետրվարի 29

  • Covid-19 կորոնավիրուսով վարակվածների թիվն աշխարհում հասել է 85182-ի: Մահացածների թիվը 2924 է, իսկ առողջացած և դուրս գրվածները 39534-ն են:
  • Իրանում վարակվածությունը հաստատվել է 388 մարդու մոտ: Մահացածների թիվը հարևան երկրում հասել է 34-ի: 73 մարդ Իրանում առողջացել է:
  • Պաշտոնական տվյալներով վարակվածության 1-ական հաստատված դեպքեր են գրանցվել Ադրբեջանում և Վրաստանում: Վերջինում 2-րդ վարակվածի մասին դեռ պաշտոնական հաստատում չկա. ավելի վաղ հաղորդվել էր, Իտալիայից ժամանած քաղաքացու մոտ նույնպես կարող է կորոնավիրուս լինել:
  • Blomberg գործակալության հաղորդմամբ՝ աշխարհի 500 հարուստ մարդկանց կարողությունները կորոնավիրուսի տարածման պատճառով ընդհանուր առմամբ նվազել են 444 մլրդ ամերիկյան դոլարով: Ամենամեծ կորուստները կրել են Ջեֆ Բեզոսը (Amazon), Բիլ Գեյթսը (Microsoft), Բեռնար Առնոն (LVMH):
  • Թեհրանից Հայաստանի 82 քաղաքացիների տեղափոխող ինքնաթիռը ժամանել է Երևան: Նախարար Արսեն Թորոսյանը հայտնել է, որ նրանցից ոչ ոքի մոտ բարձր ջերմություն կամ այլ ախտանիշներ չեն գրանցվել: Նրանք նույնպես գտնվելու են տնային հսկողության ներքո:

Թեհրանից ժամանեց հերթական և կարծես թե այս պահին վերջին ինքնաթիռը մեր 82 քաղաքացիներով։ Նրանց կրկին ուղեկցել էր մեր…

Опубликовано Arsen Torosyan Пятница, 28 февраля 2020 г.

Փետրվարի 28

  • Նոր տեսակի կորոնավիրուսով վարակվածների թիվն աշխարհում հասել է 83391-ի, մահացել է 2858 մարդ, առողջացել և հիվանդանոցներից դուրս են գրվել 36581-ը:
  • Իրանում վարակվածների թիվը 270 է, մահացածներինը՝ 26: Իրանում առողջացածներն այս պահի դրությամբ 49-ն են: Մահացել է Վատիկանում Իրանի նախկին դեսպանը, վարակվել է երկրի փոխնախագահը: Ռուսաստանը սահմանափակել է Իրանի հետ օդային հաղորդակցությունը:
  • Վարակվածության նոր դեպքեր են գրանցվել Բելառուսում, Լիտվայում, Նիգերիայում, Շվեդիայում, Նոր Զելանդիայում:
  • Բելառուսում հետազոտության արդյունքում կորոնավիրուս է հայտնաբերվել իրանցի ուսանողի մոտ, ով փետրվարի 22-ին Բաքվից ուղևորվել է Մինսկ: Նրա հետ շփում ունեցած քաղաքացիները մեկուսացված են Մինսկի ինֆեկցիոն հիվանդանոցում:
  • Հաղորդվում է, որ Չինաստանում Covid-19-ից առաջին մահածացի դիակի պաթոլոգաանատոմիական հետազոտությունը ցույց է տվել, որ վիրուսը վնասում է հիմնականում թոքերը: Այլ օրգանները վնասելու վերաբերյալ ապացույցներ դեռևս չկան:
  • Հայաստանում կորոնավիրուսով վարակվածներ չկան: Վարչապետ Նիկոլ Փաշինյանն իր ֆեյսբուքյան էջում հրապարակել է վիրուսից պաշտպանվելու ուղեցույց՝ կոչ անելով պահպանել բոլոր կանոնները:

Թու, թու, թու՝ Հայաստանում մինչ այս պահը կորոնավիրուսով հիվանդացության ոչ մի դեպք չի գրանցվել։ Եւ եթե պահեք այս պաստառում նկարագրված բոլոր կանոնները՝ չի էլ գրանցվի:)Խնդրում եմ հնարավորինս շատ տարածել:

Опубликовано Nikol Pashinyan / Նիկոլ Փաշինյան Четверг, 27 февраля 2020 г.

Փետրվարի 27

  • Փետրվարի 27-ի դրությամբ Covid-19 կորոնավիրուսով վարակվածների թիվը հասել է 82168-ի: Մահացել է 2801 մարդ, առողջացել և հիվանդանոցներից դուրս են գրվել 32897-ը:
  • Իրանում իրավիճակը նախորդ օրվա համեմատ նույնն է. 139 վարակված, որոնցից 19-ը՝ մահվան ելքով: Նոր տեղեկություններով՝ առողջացել է 49 իրանցի: Վրաստանում 1 հաստատված դեպք կա, նրա հետ շփված քաղաքացիները ստուգվել են, կորոնավիրուս չի հայտնաբերվել, երկու շաբաթ գտնվելու են կարանտինում:

Քիչ առաջ խոսեցի Վրաստանի առողջապահության նախարար Եկատերինե Տիկարաձեի հետ, որպեսզի հասկանամ կորոնավիրուսով պայմանավորված…

Опубликовано Arsen Torosyan Среда, 26 февраля 2020 г.
  • ԱՄՆ նախագահ Դոնալդ Թրամփը զարմանք է հայտնել, երբ տեղեկացել է, որ Միացյալ Նահանգներում գրիպից տարեկան մահանում է 25-65 հազար մարդ: Նրա խոսքով՝ պատվաստանյութի ստեղծման ուղղությամբ աշխատանքներն արագորեն ընթանում են, մինչդեռ մասնագետը նշել է, որ այն դեռևս ամիսներ կտևի:
  • Ինդոնեզիայի իշխանությունները 188 քաղաքացիների ուղարկել են անմարդաբնակ կղզի՝ կարանտինն այնտեղ անցկացնելու: Քաղաքացիները Ջակարտայի մոտ գտնվող Սեբարու կղզի են տեղափոխվել լողացող հոսպիտալով՝ ռազմանավերի ուղեկցությամբ:
  • Նորվեգիայում, Էստոնիայում, Ռումինիայում և Դանիայում գրանցվել են կորոնավիրուսով վարակվածության առաջին դեպքերը:

Փետրվարի 26

  • Covid-19 կորոնավիրուսով վարակվածների թիվը հասել է 81245-ի: Փետրվարի 26-ի դրությամբ նոր տեսակի կորոնավիրուսից մահացել է 2770 մարդ, բուժվել և հիվանդանոցից դուրս են գրվել 30311-ը:
  • Իրանում մահացել է արդեն 19 մարդ, վարակվածների թիվը հասել է 139-ի: Իրանական աղբյուրները հաղորդել են, որ երկրի տարբեր նահանգներում ընդհանուր առմամբ 39 հիվանդ արդեն բուժվել է. նրանցից 30-ը՝ Ղոմ քաղաքում են, որտեղ ամենաշատ մահացություններն են գրանցվել:
  • Առողջապահության համաշխարհային կազմակերպության տվյալներով՝ կորոնավիրուսի վարակի տարածումը Չինաստանում նվազել է, մինչդեռ նրանից դուրս ավելի է արագացել. մեկ օրվա ընթացքում այդ երկրում վարակվել է 411 մարդ, իսկ այլ երկրներում՝ 427:
  • Վրաստանում կորոնավիրուսով վարակվածության առաջին դեպքն է գրանցվել. Առողջապահության նախարարը հայտարարել է, որ վարակվածը Վրաստանի քաղաքացի է, ով նախօրեին է Իրանից Ադրբեջանով վերադարձել Վրաստան:

Փետրվարի 25

  • Փետրվարի 25-ի դրությամբ Covid-19 կորոնավիրուսով վարակվածների թիվը հասել է 80350-ի: Մահացածների թիվն այս գրառման պահին 2705 է, իսկ առողջացածները և հիվանդանոցից դուրս գրվածները 27878-ն են:
  • Չինաստանից հետո վարակվածների թվով ամենամեծը Հարավային Կորեան է՝ 977 մարդ (մահվան դեպքերը՝ 10), իսկ մահացությունների քանակով՝ Իրանը՝ 16 մարդ (վարակվածների թիվը՝ 95):
  • Իրանի առողջապահության փոխնախարարը, ով երեկ հայտարարել էր, որ չի հավատում Իրանում կորոնավիրուսի համաճարակին, նույնպես վարակվել է: Խորհրդարանի պատգամավորի մոտ նույնպես կորոնավիրուսի թեստը դրական է եղել:
  • Շվեյցարիայում, Կատալոնիայում, Խորվաթիայում, Ավստրայում կորոնավիրուսով վարակվածության առաջին դեպքերն են գրանցվել:
  • Ադրբեջանում 23 մարդ գտնվում է կարանտինում: Նրանց շարքում կան նաև Իրանից այդ երկիր ժամանածներ:
  • Առողջապահության համաշխարհային կազմակերպության գործադիր կոմիտեի անդամ Վալտեր Ռիչարդին նշել է, որ կորոնավիրուսի պատվաստանյութը կարող է ստացվել երկու տարի անց, իսկ վարակվածության նվազեցմանը կարող է նպաստել եղանակի տաքացումը:

Փետրվարի 24

  • Փետրվարի 24-ի դրությամբ Covid-19 կորոնավիրուսով վարակվածների թիվը հասել է 77150-ի: Մահացել է 2592 մարդ, առողջացել և հիվանդանոցից դուրս են գրվել 24,7 հազարը:
  • Չինաստանից դուրս կորոնավիրուսից մահացածների թիվը հասել է 32-ի, որոնցից ամենամեծ թիվն Իրանում է՝ 12 մահվան ելքով, 7-ը՝ Հարավային Կորեայում, 4-ական՝ Ճապոնիայում և Իտալիայում, Հոնկոնգում՝ 2, Ֆիլիպիններում, Ֆրանսիայում և Թայվանում:
  • Իրանում վարակվածների թիվն, ըստ Առողջապահության փոխնախարար Իրաջ Հարիրչիի, կարող է գերազանցել 60-ը, իսկ մահացածների թիվն, ամենայն հավանականությամբ, արդեն 12 է (տվյալները դեռ ճշտվում են):
  • ՀՀ կառավարությունը Կորոնավիրուսի կանխարգելման հանձնաժողովի նիստ է հրավիրել: Քննարկվել են Իրանի հետ սահմանը փակելու և անհրաժեշտ միջոցառումներ ձեռնարկելու մասին հարցերը: Վարչապետը վստահեցրել է, որ կորոնավիրուսին դիմակայելու հնարավորություններն առկա են, Հայաստանում հիվանդության դեպք չի գրանցվել:
Նիկոլ Փաշինյանի եզրափակիչ խոսքը ԿԿՀ նիստում / ©ARMGOV
  • Տեղեկություններ են հաղորդվում, որ Բաքվում 22 մարդ է հոսպիտալացվել՝ կորոնավիրուսի կասկածանքով:

Փետրվարի 23

  • Covid-19 կորոնավիրուսով վարակվածների թիվը փետրվարի 23-ի դրությամբ հասել է 76936-ի, մահացել է 2442 մարդ, առողջացել և հիվանդանոցից դուրս են գրվել ավելի քան 22,8 հազարը:
  • Նոր վարակվածների մեծ մասը՝ 648-ից 630-ը, Հուբեյ նահանգում են: Չինաստանի 21 նահանգներում մեկ օրվա ընթացքում վարակվածության նոր դեպքեր չեն գրանցվել: Բազմաթիվ նահանգներում հիվանդացության դեպք չի գրանցվել արդեն մի քանի օր:
  • Իտալիայի Կոդոնյո քաղաքը, որտեղ նախօրեին տարեց կին էր մահացել կորոնավիրուսից, վերածվել է ուրվական քաղաքի. դատարկ փողոցներ, փակ խանութներ ու հաստատություններ: Աշխատում է հացաբուլկեղենի 1 վաճառակետ և 1 դեղատուն:
Իտալիա, Կոդոնյո / ©EuroNews
  • Իրանում Covid-19-ից մահվան 6-րդ դեպքն է գրանցվել: Փակվել են Ղոմ, Արաք քաղաքների ուսումնական հաստատությունները, դադարեցվել են կրոնական արարողությունները:

Փետրվարի 22

  • Covid-19 կորոնավիրուսով վարակվածների թիվն ամբողջ աշխարհում հասել է 77815-ի: Փետրվարի 22-ի դրությամբ նոր տեսակի հիվանդությունից մահացել է 2345 մարդ, առողջացել և հիվանդանոցից դուրս են գրվել 20847-ը: Մահացածներից մեկը 29-ամյա բժիշկ է:
  • Կորոնավիրուսից առաջին մահն է գրանցվել Իտալիայում. 78 ամյա իտալացին Եվրամիության առաջին քաղաքացին էր, որ մահացել է Covid-19-ից:
  • Տեղեկություններ կան, որ կորոնավիրուսով հնարավոր է կրկնակի վարակվել. Չինաստանի Սիչուան նահանգում վերջերս առողջացած և դուրս գրված քաղաքացուն երկրորդ անգամ են հոսպիտալացրել:
  • Վարակվածության առաջին դեպքն է գրանցվել Իսրայելում. ախտորոշումը հայտնաբերվել է երկու օր առաջ Ճապոնիայի ափերի մոտ գտնվող Diamond Princess զբոսանավից տարհանված իսրայելցու մոտ:
  • Մերձավոր Արևելքում կորոնավիրուսն աստիճանաբար տարածում է ստանում. մեկական դեպքեր են գրանցվել Եգիպտոսում, Լիբանանում, ԱՄԷ-ում՝ 11: Լիբանանցու մոտ վարակը հայտնաբերվել է Իրանից վերադառնալուց հետո:

Կորոնավիրուսը Մերձավոր Արևելքում`- 11 վարակակիր ԱՄԷ-ում- 1-ը` Լիբանանում, 2-ը կասկածվում են- 1-ը` Եգիպտոսում-…

Опубликовано Sargis Grigoryan Пятница, 21 февраля 2020 г.
  • Իրանում կորոնավիրուսի հետևանքով մահացածների թիվն առնվազն 4-ն (ըստ որոշ տեղեկությունների՝ 5-ը): Հաղորդվում է, որ վարակվել է նաև Թեհրանի վարչական շրջաններից մեկի ղեկավարը: Իրաքը փակել է Իրանի հետ սահմանը, իսկ Քուվեյթը դադարեցրել է օդային հաղորդակցությունը: Այլ մանրամասներ Իրանից փետրվարի 23-ի համար դեռևս չեն հաղորդվում:
  • Իրանում ՀՀ դեսպանությունը Հայաստանի քաղաքացիներին հորդորել է անվտանգության նկատառումներից ելնելով կապ հաստատել դեսպանության հետ` նշելով գտնվելու վայրը:

❗️Իրանի Իսլամական Հանրապետությունում Հայաստանի Հանրապետության դեսպանությունը, հաշվի առնելով Իրանում կորոնավիրուսի հետ…

Опубликовано Embassy of Armenia in Iran / Իրանում ՀՀ դեսպանություն Пятница, 21 февраля 2020 г.

Փետրվարի 21

  • Փետրվարի 21-ի դրությամբ նոր տեսակի կորոնավիրուսով վարակվածների թիվը հասել է 76723-ի: Covid-19-ից մահացել է 2247 մարդ, բուժվել և առողջացել են 18515-ը:
  • Չինաստանի գիտության և տեխնոլոգիաների նախարար Սյույ Նանպինը հայտնել է, որ նոր տեսակի կորոնավիրուսի դեմ պատվաստանյութի կլինիկական փորձարկումները կարող են մեկնարկել ապրիլի վերջից ոչ շուտ: Ներկայումս կենդանիների վրա են իրականացվում փորձարկումներ:
  • Ուկրաինայում Յուհանից տարհանվածներին Պոլտավայի Նովիյե Սանժարիի առողջարան՝ կարանտինի տեղափոխող ավտոբուսները հարձակման են ենթարկվել: Առողջարանի մոտ տեղի բնակիչները փորձել են փակել փողոցը, թույլ չտալ ավտոբուսների մուտքը: Ոստիկանության միջամտությունից հետո բնակիչները քարեր են նետել ավտոբուսների և ոստիկանների վրա։

Փետրվարի 20

  • Չինաստանում նոր տեսակի կորոնավիրուսով վարակվածների թիվը հասել է 74,57 հազար, ևս 1,1 հազար մարդ այլ երկրներում են տառապում այդ հիվանդությամբ: Փետրվարի 20-ի դրությամբ COVID-19-ից մահացել է 2126 մարդ, շուրջ 16 հազարն առողջացել և դուրս են գրվել հիվանդանոցներից:
  • Իրանի Առողջապահության նախարարությունը հաստատել է երկրում կորոնավիրուսից երկու հոգում մահվան հանգամանքը: Կում քաղաքում մահացածները, ինչպես հաղորդվում է, տարեց մարդիկ են եղել և ունեցել են թույլ իմունիտետ:
  • Ճապոնիայի ափերի մոտ կայանած Diamond Princess զբոսանավի 3700 ուղևորներից 621-ը վարակված են կորոնավիրուսով: Երկու շաբաթ առաջ տարհանված ճապոնացի ուղևորներից երկուսը մահացել են: Մահացածներն 80 ամյա տղամարդ և կին են:
  • Այսօրվանից փակվում է Ռուսաստանի և Չինաստանի միջև պետական սահմանը՝ Չինաստանի քաղաքացիների համար: Չինացի ուսանողների ուսուցումը ռուսական ԲՈւՀ-երում առաջարկվել է իրականացնել առցանց տարբերակով:
  • Չինաստանն արտաքսել է ամերիկյան The Wall Street Journal-ի լրագրողներին՝ «Չինաստանն իսկապես Ասիայի հիվանդ մարդ է» վերտառությամբ հոդվածի պատճառով: «Ասիայի հիվանդ մարդ» արտահայտությունն օգտագործվել է նախկինում՝ Չինաստանի գաղութացման ժամանակ: Հոդվածը որակվել է նաև «ռասիստական մղումներ» ունեցող:

Փետրվարի 19

  • Փետրվարի 19-ի դրությամբ COVID-19 կորոնավիրուսից մահացածների թիվը հասել է 2004-ի: Վարակվածների թիվն ամբողջ աշխարհում 74,1 հազար է, իսկ առողջացածները և հիվանդանոցից դուրս գրվածները 14,3 հազարն են:
  • Կորոնավիրուսով վարակված բժիշկների և բուժաշխատողների թիվը հասել է 3 հազարի: Նրանց մեծ մասը Հուբեյ նահանգների հիվանդանոցներում աշխատողներն են:
  • Չինաստանի Հիվանդությունների վերահսկման և պրոֆիլակտիկայի կենտրոնն (ՀՎՊԿ) ուսումնասիրել է կորոնավիրուսով վարակվածներից 44 հազարի հետազոտության տվյալները: Պարզվել է, որ հիվանդությունը հիմնականում թեթև բնույթ է կրում. ծանր հետևանքներ է ունենում խրոնիկ հիվանդների և տարեցների մոտ: Պարզվել է, որ ուսումնասիրվածների շրջանում մանկահասակ երեխաներ (մինչև 9 տարեկան) չկան:
Հիվանդների տոկոսային հարաբերակցությունն՝ ըստ տարիքի / © ՀՎՊԿ / BBC russian
  • Ֆրանսիական դեղագործական Sanofi ընկերությունը հայտարարել է, որ մշակում է նոր կորոնավիրուսի դեմ պատվաստանյութ, որը մարդկանց վրա կփորձարկվի 1-1,5 տարի հետո, իսկ զանգվածային կիրառություն կստանա 3-4 տարուց: Ընկերությունը նոր պատվաստանյութը ստեղծելու է ատիպիկ թոքաբորբի՝ SARS-ի համար կատարված մշակումների կիրառմամբ:

Փետրվարի 18

  • COVID-19 կորոնավիրուսով վարակվել է արդեն 72436 մարդ: Մահացածների թիվը 1868 է, իսկ առողջացած և դուրս գրվածներինը՝ 12552:
  • Յուհանում կորոնավիրուսից մահացել է «Ուչան» հիվանդանոցի գլխավոր բժիշկ Լյու Չժինմինը: 51 ամյա բժիշկը բուժհաստատության առաջին ղեկավարն էր, որ նոր հիվանդության զոհ դարձավ: «Ուչանն» առաջին հիվանդանոցներից էր, որտեղ ընդունվել են կորոնավիրուսով հիվանդները:
  • Կորոնավիրուսից մահվան առաջին դեպքն է գրանցվել Թայվանում. 60 ամյա տղամարդ է մահացել, ով վերջին շրջանում երկրից դուրս չի եկել:
  • Չինաստանում արդյունաբերական ձեռնարկություններն աստիճանաբար վերսկսում են գործունեությունը: Ներկայումս արտադրության 80%-ն արդեն վերականգված է: 4 գործարաններից 3-ն արդեն վերաբացել է նաև Toyota ընկերությունը, սակայն դեռ մատակարարման սահմանափակումները կշարունակվեն: 4-րդի վերաբացումը նախատեսված է փետրվարի 24-ին:
  • Ամերիկյան Apple ընկերությունը նվազեցրել է 2020թ. առաջին քառորդի համար իր եկամուտների կանխատեսումը: Գլխավոր պատճառներն ընկերությունը համարել է կորոնավիրուսի տարածմամբ պայմանավորված առաքման սահմանափակումները և Չինաստանում պահանջարկի նվազումը:

Փետրվարի 17

  • Փետրվարի 17-ի դրությամբ COVID-19 կորոնավիրուսով վարակվածների թիվը հասել է 70548-ի, մահացել է 1770 մարդ, առողջացել և հիվանդանոցից դուրս են գրվել 10844-ը:
  • Չինաստանի Նանկայի համալսարանը հայտարարել է կորոնավիրուսի հայտնաբերման նոր էքսպրես-թեստի ստեղծման մասին: Հաղորդվում է, որ հետազոտության համար կիրառվող նոր թեստի շնորհիվ կորոնավիրուսի շտամը հնարավոր է հայտնաբերել 15 րոպեում:
  • Հուբեյ նահանգի իշխանությունները բնակիչներին, այդ թվում՝ գյուղաբնակներին, արգելել են դուրս գալ տներից: Փողոցներում երթևեկել թույլատրվում է միայն ոստիկանական և շտապօգնության մեքենաներին:
  • Շանհայի համալսարանի գիտնականները հայտարարել են, որ մոտ են կորոնավիրուսը բուժող դեղամիջոցի ստեղծմանը: 100 հազարավոր պատվաստանյութերից համակարգչային մոդելավորման արդյունքում մշակվել է միջոց, որը ներկայումս փորձարվում է մկների վրա: Վերջնական ժամկետներ չեն նշվել:
  • Առողջապահության համաշխարհային կազմակերպության միջազգային խումբը մեկնել է Պեկին: Չինացիներից և օտարերկրացիներից բաղկացած 24 հոգանոց խումբն ուսումնասիրելու է նոր տեսակի կորոնավիրուսի բռնկման հանգամանքներն: Ավելի վաղ ԱՀԿ-ն փորձագետների նախնական խումբ էր գործուղել Չինաստան:

Փետրվարի 16

  • COVID-19 կորոնավիրուսով վարակվածների թիվը հասել է 68,5 հազարի: Փետրվարի 16-ի դրությամբ մահացել է 1665 մարդ, բուժվել և հիվանդանոցից դուրս են գրվել 9149-ը:
  • Մասնագետներն ուշադրություն է հրավիրել այն բանի վրա, որ աշխարհում վիրուսին զուգահեռ բռնկվել և մեծ տարածում է ստանում ռասիզմը: Հաղորդվում է, որ տարբեր երկրներում և սոցցանցերում ընդգծված բացասական վերաբերմունք է ձևավորվել չինացիների և ընդհանրապես՝ ասիացիների նկատմամբ:
Գրառում. «Կորոնավիրուս. դրանից ավելի շատ մարդ է ռասիստ դարձել, քան՝ հիվանդ»: Ֆրանսիա, Նանտ / ©Getty Images
  • Համացանցում նաև ծաղրի առարկա են դարձնում չինական ավանդույթները, սննդակարգն ու հիգիենան: Ռուսաստանում, Ուկրաինայում, Բրիտանիայում, ԱՄՆ-ում, Ֆրանսիայում, Կանադայում և այլ երկրներում բնակվող շատ չինացիներ ահազանգել են իրենց նկատմամբ վերաբերմունքի փոփոխության մասին:
https://www.instagram.com/p/B8C6BPklh1V/?igshid=1os6yie7d40qh
Երբ նստած ես քո սիրելի չինական ռեստորանում, իսկ խոհանոցից հազի ձայն ես լսում:
  • Ֆրանսիայում Չինաստանից ժամանած 80 ամյա զբոսաշրջիկ է մահացել: Սա Եվրոպայում կորոնավիրուսից մահացության առաջին դեպքն էր:
  • Չինաստանում որոշել են խստացնել պատիժը վարակվածների թիվը և սեփական առողջական ծանր վիճակը թաքցնելու համար: Հաղորդվում է, որ նմանատիպ իրավախախտումներ կատարածներին սպառնում է 10 տարվա կամ ցմահ ազատազրկում կամ կախաղան՝ հասարակական վտանգավորության արարքի համար:
  • ԱՀԿ ղեկավարը հայտարարել է, Կազմակերպությունն այլևս ի վիճակի չէ կանխատեսել համաճարակի տարածման հետագա ընթացքը: Գեբրեյեսուսն անհանգստություն է հայտնել, որ կորոնավիրուսը կարող է հայտնվել առողջապահական ոչ զարգացած համակարգ ունեցող երկրներում:

Փետրվարի 15

  • Փետրվարի 15-ի դրությամբ COVID-19 կորոնավիրուսով վարակվածների թիվն ամբողջ աշխարհում հաշվվում է շուրջ 67 հազար, որոնցից 600-ը` Չինաստանից դուրս: Մահացածների թիվը 1523 է, իսկ առողջացածների և հիվանդանոցից դուրս գրվածներինը՝ 8000-ից ավելի:
  • Կորոնավիրուսը հասել է Աֆրիկա. Եգիպտոսի Առողջապահության նախարարությունն Առողջապահության համաշխարհային կազմակերպությանը տեղեկացրել է արտերկրից Եգիպտոս ժամանած օտարերկրյա քաղաքացու մոտ նոր վիրուսի հայտնաբերման մասին: Հիվանդի քաղաքացիության և ազգային պատկանելիության մասին չի հաղորդվել:
  • AFP տեղեկատվական գործակալությունն անհանգստություն է հայտնել, որ մահացու վիրուսի ներթափանցումն աֆրիկյան երկրներ կարող է լուրջ հետևանքներ առաջացնել: Նշվում է, որ Աֆրիկայում առողջապահական պայմանների ցածր մակարդակը և Չինաստանի հետ առևտրային սերտ հարաբերությունները հաշվի առնելով՝ կասկածի տակ է դրվում համաճարակին դիմակայելու ընդունակությունն այդ մայրցամաքում:
  • Արտաքին աշխարհից մեկուսացված Յուհան քաղաքում արգելափակվել են նաև շփումները քաղաքի վարչական շրջանների միջև: Որոշվել է վարչական շրջանների միջև տեղադրել անցակետեր` տեղաշարժը թույլատրելով միայն խիստ անհրաժեշտության դեպքում:
  • Չինաստանի մյուս շրջաններից Հուբեյ նահանգ է տեղափոխվել շուրջ 25 հազար բժիշկ և բուժաշխատող, քանի որ տեղի բուժանձնակազմի քանակը չէր բավարարում հիվանդներին սպասարկելու համար:

Փետրվարի 14

  • COVID-19 կորոնավիրուսի հետևանքով մահացել է 1380 մարդ: Հիվանդների թիվը փետրվարի 14-ի դրությամբ հասել է 63851-ի, առողջացել և հիվանդանոցներից դուրս է գրվել 6723 մարդ:
  • Չինաստանի Հիգիենայի և առողջապահության հարցերի պետական կոմիտեի ղեկավարի տեղակալ Ցզեն Իսինը հայտնել է, որ նոր տեսակի կորոնավիրուսով վարակվել է ընդհանուր առմամբ ավելի քան 1700 բուժաշխատող, որոնցից 6-ը մահացել են:
Ավելի քան 1,7 հազար բուժաշխատող վարակվել է կորոնավիրուսով / ©EPA-EFE/YUAN ZHENG CHINA OUT
  • Առողջապահության համաշխարհային կազմակերպության պաշտոնական ներկայացուցիչ Թարիկ Յազարևիչը հայտարարել է, որ ալկոհոլի օգտագործումը ոչ մի կերպ չի նպաստում COVID-19-ի դեմ պայքարին: Հիվանդությանը դիմակայելու կարևոր նախապայման է համարել հիգիենան: Նրա խոսքով՝ ալկոհոլի չարաշահումն, ընդհակառակը, կարող է ալկոհոլային թունավորում առաջացնել:
  • Յուհանի հիվանդանոցի գլխավոր բժիշկը հայտարարել է, որ պլազմայի փոխներարկման արդյունքում հնարավոր է եղել առողջացնել COVID-19 կորոնավիրուսի առաջացրած թոքաբորբով հիվանդներին: Հաղորդվում է, որ այդ մեթոդով արդեն 10 հոգի բուժվել է, մինչդեռ դեղամիջոցներն արդյունք չէին տվել:

Փետրվարի 13

  • COVID-19 անունը ստացած նոր կորոնավիրուսը փետրվարի 13-ի դրությամբ խլել է 1367 մարդու կյանք: Առողջացել և հիվանդանոցից դուրս են գրվել 5911-ը: Հիվանդների ընդհանուր թիվն արդեն մոտ 60 հազար է:
  • Նախորդ օրվա համեմատ հիվանդների թվի կտրուկ աճը պայմանավորված է հիվանդության հայտնաբերման նոր մեթոդի կիրառմամբ. մեկ օրվա ընթացքում վիրուս է հայտնաբերվել ավելի քան 15 հազար մարդու մոտ: Չինաստանի Առողջապահության ազգային հանձնաժողովը նշել է, որ այսուհետ հիվանդների թիվը նշվելու է համակարգչային տոմոգրաֆիայի տվյալների համաձայն՝ չսպասելով մյուս հետազոտությունների պատասխաններին:
  • Առողջապահության համաշխարհային կազմակերպությունը հայտարարել է, որ կորոնավիրուսի դեմ պատվաստանյութի առաջին փորձարկումները մարդկանց վրա կարող են մեկնարկել 4-5 ամսից:
  • ԱՄՆ-ի Ֆինանսների նախարար Ստիվեն Մնուչինը հայտարարել է, որ Միացյալ Նահանգների և Չինաստանի միջև կայացած համաձայնությունների առաջին փուլի իրականացման տեմպերը կորոնավիրուսի տարածման պատճառով նվազել են:

Փետրվարի 12

  • Չինաստանում բռնկված կորոնավիրուսով վարակվածների թիվը հասել է 44,6 հազարի, մահացել է 1113 մարդ, առողջացել և հիվանդանոցներից դուրս են գրվել 4740-ը:
  • Ավտոարշավի աշխարհի առաջնության՝ «Ֆորմուլա-1»-ի չինական փուլը, որը պետք է կայանար Շանհայում՝ ապրիլի 17-19-ը, կորոնավիրուսի պատճառով սահմանված ժամկետում չի կայանա: Նախնական տարբերակով հնարավոր է համարվում միջոցառումն անցկացնելու օգոստոս-նոյեմբեր ամիսներին:
  • Առողջապահության համաշխարհային կազմակերպությունը նոր տեսակի կորոնավիրուսին պաշտոնական անվանում է տվել. այսուհետ այն կկոչվի COVID-19: Ժնևում կայացած ֆորումի շրջանակներում ընդունված որոշմամբ նոր անվան մեջ CO-ն կորոնավիրուսն է, VI-ն՝ վիրուսը, իսկ D-ն՝ հիվանդությունը:

Փետրվարի 11

  • Փետրվարի 11-ի դրությամբ նոր տեսակի կորոնավիրուսով հիվանդների թիվն անցել է 42,7 հազարից: Մահացել է 1017 հիվանդ: Բուժումը ստացել և հիվանդանոցներից դուրս են գրվել 4046-ը:
  • Չինաստանի և Հոնկոնգի հայ համայնքը հուզիչ տեսանյութ է հրապարակել՝ աջակցություն հայտնելով Չինաստանին՝ կորոնավիրուսի դեմ պայքարում: Հոլովակում չինական իշխանություններին իրենց աջակցությունն են հայտնում ինչպես Չինաստանի տարբեր քաղաքներում բնակվող հայերը, այդ թվում՝ երեխաները, այլև Հայաստանում չինարեն սովորող ուսանողները:
Չինաստանի և Հոնկոնգի հայ համայնքի ուղերձը / ©ChinaHay Armenian Community of Hong Kong and China
  • Առողջապահության համաշխարհային կազմակերպությունը փետրվարի 11-12-ը Ժնևում հրավիրել է հետազոտությունների և նորարարությունների համաշխարհային ֆորում՝ 2019-nCoV կորոնավիրուսի դեմ պայքարի համար միջազգային ուժերը մոբիլիզացնելու նպատակով: Ֆորումին մասնակցելու են առաջատար գիտնականներ, առողջապահական կազմակերպությունների ներկայացուցիչներ և ոլորտային պաշտոնյաներ: Քննարկվելու են ախտորոշման մեթոդներին, պրոֆիլակտիկային և վիրուսի բուժմանը, ինչպես նաև պատվաստանյութի ստեղծմանը վերաբերող հարցեր:
  • Չինաստանում բռնկված համաճարակի դեմ պայքարում թերացումների համար Հուբեյ նահանգում գիգիենայի և առողջապահական գերատեսչության երկու պաշտոնյաների լիազորությունները դադարեցվել են:
  • Սանկտ Պետերբուրգում գտնվող Nissan-ի գործարանն արտադրությանն անհրաժեշտ բավարար քանակությամբ պարագաները Չինաստանից չստանալու պատճառով կարող է դադարեցնել իր աշխատանքները:
  • 2019-nCoV կորոնավիրուսի բռնկման հետևանքով Չինաստանի շուրջ 300 ընկերություններ, որոնց թվում և՝ Xiaomi-ն, հարկադրված դիմել են բանկերին՝ աշխատանքների խաթարման պատճառով կրած վնասները փոխհատուցելու համար վարկեր ստանալու խնդրանքով: Պարտադրված վարկերի ծավալը գերազանցում է 8 մլրդ դոլարը:
  • Համաճարակի տարածումը հանգեցրել է նավթի գնի միջազգային գնի անկմանը՝ 17%-ով: Նման հետևանքներ չեն առաջացրել ոչ թռչնի գրիպը, ոչ խոզի գրիպը՝ 2009թ.: Նավթի շուկայի վրա բացասաբար էր անդրադարձել միայն 2003թ. ատիպիկ թոքաբորբը: Նվազում են նաև արդյունաբերական մետաղի և էներգիայի գները:

Փետրվարի 10

Չինաստանի Առողջապահական պետական կոմիտեի տվյալներով՝ 2019-nCoV կորոնավիրուսով հիվանդների թիվը փետրվարի 10-ի դրությամբ հասել է 40171-ի: Հիվանդությունից մահացել է ընդհանուր առմամբ 910 մարդ, որոնցից երկուսը՝ Հոնկոնգում և Ֆիլիպիններում: Չինաստանից դուրս մահվան նոր դեպքեր չեն գրանցվել:

Առողջացել և հիվանդանոցներից դուրս են գրվել 3281-ը: Բուժվածների թիվն աստիճանաբար աճում է: Եթե հունվարի 27-ին Չինաստանում հիվանդների 1,3%-ն էր բուժվել, ապա այսօր արդեն այդ ցուցանիշը 8,2% է: Առողջապահության պետական կոմիտեի ղեկավարի հաղորդմամբ՝ ցուցաբերվող բժշկական օգնությունն սկսել է իր արդյունքները տալ:

Չինաստանի բնակիչները դիմում են ծայրահեղ միջոցների՝ վիրուսից պաշտպանվելու համար / ©REUTERS

Ամերիկյան խոշոր ավտոարտադրող General Motors-ը փետրվարի 15-ից կվերսկսի իր գործունեությունը: Չինաստանի տարածքում ընկերությունն ունի մի շարք գործարաններ, որտեղ արտադրում են Buick, Chevrolet և Cadillac մակնիշի ավտոմեքենաներ:

Ռուս քաղաքագետ Դմիտրի Աբզալովի կարծիքով՝ կորոնավիրուսի հետևանքով մի շարք ապրանքների գներ կբարձրանան: Նրա խոսքով՝ աշխարհում մատուցվող ծառայությունների շուրջ 60%-ն այս կամ այն կերպ կապված է Չինաստանի հետ: Միաժամանակ, Չինաստանը ոչ միայն սպառման մեծ շուկա է, այլև՝ խոշորագույն արտադրող: Քաղաքագետը նշել է, որ նավթի, գազի և մետաղի ամենամեծ սպառողը ներկայումս դրանց պահանջարկը չունի. հեղուկ գազով բեռնված 5 տանկեր ուղևորվում են դեպի Չինաստան: Դրանցից մեկը գնելուց Պեկինն արդեն հրաժարվել է. այն ուղարկվել է Սինգապուր: Մյուս չորսը դանդաղեցրել են իրենց ընթացքը՝ հույն ունենալով, որ մինչև հասնելն իրադրությունը կկարգավորվի: Աբզալովի համոզմամբ՝ այս ամենը մեծ գնաճի կհանգեցնեն:

Փետրվարի 9

  • 2019-nCoV կորոնավիրուսով վարակվածների թիվն անցել է 37,1 հազարից: Համաճարակը փետրվարի 9-ի դրությամբ խլել է 811 մարդու կյանք: Առողջացել և հիվանդանոցից դուրս է գրվել 2600 մարդ: Հիվանդանոցներում բուժում ստացողների թիվը 33 հազար է, որոնցից 6,2 հազարի վիճակը գնահատվում է ծանր:
  • ՉԺՀ-ի Առողջապահության գլխավոր կոմիտեի ներկայացուցիչ Մի Ֆենը հայտնել է, որ կորոնավիրուսով վարակվողների թիվը շարունակում է մեծ լինել Հուբեյ նահանգում, մինչդեռ Չինաստանի մյուս շրջաններում վարակվածության ցուցանիշներն անցնող շաբաթվա ընթացքում նվազել են շուրջ 43%-ով: Տարբեր նահանգներից մոտ 12 հազար բժիշկ ուղարկվել է Հուբեյ:
  • Հիվանդանոցներից մեկի աշխատակիցը պատմել է, որ աշխատում են 10 ժամ, որի ընթացքում չի թույլատրվում ուտել, խմել, գնալ զուգարան կամ պարզապես հանգստանալ: Նրա խոսքով` բժիշկներից ոմանք այնքան են հոգնում, որ աշխատանքն ավարտելուց հետո քնում են աթոռներին, քանի որ տուն գնալու ուժ չեն ունենում:
  • Ռուսաստանի ԱԻՆ ԻԼ-76 ինքնաթիռը Չինաստան է առաքել ընդհանուր 183 խմ բեռ՝ բժշկական պարագաներ և անհատական պաշտպանության միջոցներ:
  • Հայտնի դերասան Ջեկի Չանը 1 մլն յուան (մոտ 142 հազար դոլար) է խոստացել տրամադրել 2019-nCoV կորոնավիրուսի դեմ պատվաստանյութ ստեղծողին: Նրա խոսքով՝ գիտությունն ու տեխնոլոգիաները վիրուսի դեմ պայքարի բանալին են: Ջեկի Չանը հույս է հայտնել, որ դեղամիջոցը հնարավորինս շուտ կստեղծվի և փողոցները կրկին կլցվեն կյանքը վայելող մարդկանցով:

Փետրվարի 8

  • Չինաստանի Առողջապահության ազգային հանձնաժողովի հաղորդմամբ՝ կորոնավիրուսով վարակվածների թիվը երկրում փետրվարի 8-ի դրությամբ 34546 է, ԱՀԿ տվյալներով՝ ևս 270 վարակվածներ արտասահմանում են: Մահացածների թիվը հասել է 724-ի: Բուժվել և հիվանդանոցներից դուրս է գրվել մոտ 2200 մարդ: Մահացածության ցուցանիշներով 2019-nCoV-ը գերազանցել է 17 տարի առաջ գրանցված ատիպիկ թոքաբորբին:
2019-nCoV կորոնավիրուսի տարածումը հունվարի 25-փետրվարի 8-ը / ©rbc.ru
  • Յուհան քաղաքում առաջին անգամ օտարերկրացիների մահվան դեպքեր են գրանցվել: Մահացել են ԱՄՆ-ի և Ճապոնիայի 60-ամյա քաղաքացիներ: Չինաստանի սահմաններից դուրս մահվան նոր դեպքեր չեն գրանցվել:
  • Միացյալ Նահանգները հայտարարել է Չինաստանին և կորոնավիրուսից տուժած մյուս երկրներին 100 մլն դոլարի աջակցություն տրամադրելու պատրաստականության մասին:
  • Նովոսիբիրսկի գիտնականները ստեղծել են բժշկական նոր դիմակներ, որոնցով 10 հազար անգամ ավելի քիչ վիրուս կարող է անցնել, քան սովորականների: Նոր տեխնոլոգիայով դիմակը պատրաստված է մելտբլաունից և նանոարծաթից, գործածվում է 10 ժամ: Ինքնամաքրման շնորհիվ դիմակը հնարավոր է կրկնակի կիրառել: Կորոնավիրուսի նկատմամբ դեռ չի փորձարկվել, սակայն սովորական A գրիպի և ստաֆիլակոկի հարցում արդարացրել է իրեն: Չինաստանն արդեն հետաքրքրված է նոր տեխնոլոգիայով:

Փետրվարի 7

  • 2019-nCoV կորոնավիրուսով վարակվածների թիվը հասել է 31161-ի, մահացել է 636 մարդ՝ Չինաստանում, ևս 2-ը՝ արտասահմանում: Փետրվարի 7-ի դրությամբ հիվանդանոցներից դուրս գրվածների թիվը 1553 է: Մեկ օրվա ընթացքում մահացել է 69 մարդ. ԱՀԿ-ի կարծիքով՝ մահացությունների թիվը նվազման միտում ունի, քանի որ նախորդ օրը մահերն ավելի շատ էին:
  • Համաճարակի օջախ համարվող Յուհան քաղաքում 10-օրյա շինաշխատանքներից հետո շահագործման է հանձնվել երկրորդ հիվանդանոցը՝ կառուցված հատուկ կորոնավիրուսով հիվանդների համար: Այստեղ աշխատելու է շուրջ 2 հազար բժիշկ:
10 օր անց հիվանդանոցը հանձնվել է շահագործման / ©NEWS.CN
  • Չինաստանի Հուբեյ նահանգում աշխատանքի են կանչել թոշակի անցած բժիշկներին ու բուժքույրերին. թեև 29 նահանգներից բժշկական 107 բրիգադ է ժամանել (10596 բուժաշխատող), այնուամենայնիվ, բժիշկների քանակը չի բավականացնում: Հիվանդներին բուժօգնություն է ցույց տալիս նաև Ազգային ազատագրական բանակի բուժանձնակազմը: Ներկայումս առկա է ևս 2250 բժշկի կարիք:
  • Չինաստանի գիտնականները նոր կորոնավիրուսի հնարավոր միջնաժամկետ տերեր են համարել թեփամորթներին (պանգոլին): Նրանք հաստատել են, որ կենդանիների մոտ հայտնաբերված նոր տեսակի կորոնավիրուսի գենոմային հերթականությունը 99%-ով համընկնում է մարդկանց մոտ հայտնաբերված կորոնավիրուսի հետ: Գիտնականների կարծիքով՝ թեփամորթները կարող են վիրուսի միջնաժամկետ միակ տերերը չլինել, ուստի կոչ են արել հեռու մնալ վայրի կենդանիներից:
Թեփամորթ (պանգոլին) / ©Zuma/TASS
  • Տարածվող համաճարակը խաթարել է նաև մի շարք ընկերությունների գործունեությունը: Դրանց թվում է հայտնվել նաև Apple-ը. երկու շաբաթով կդադարեն ընկերության համար աքսեսուարներ արտադրող արտադրամասերի աշխատանքները: Կտուժեն հատկապես AirPods Pro ականջակալները՝ նախատեսվածից առնվազն մեկ ամիս ուշ հասնելով խանութներին: Ընկերությանն անհանգստացնում նաև այն, որ սովորական AirPods-ները նույնպես սպառման եզրին են և կարող են չբավարարել առկա պահանջարկը:
  • Ճապոնական Toyota ընկերությունն իր հերթին հայտարարել է, որ Չինաստանի տարածքում գտնվող գործարանները փետրվարի 10-ից կփակվեն: Վերաբացումը նախատեսվում է փետրվարի 17-ին: Մինչ այդ ընկերությունը միանալու է աջակցության տրամադրմանը համաճարակից տուժած շրջանների բնակիչներին՝ հատկացնելով բժշկական դիմակներ, բիոհագուստ, ախտահանող նյութեր:

Փետրվարի 6

  • Չինաստանի արտաքին գործերի նախարար Խուա Չունյինը հայտարարել է, որ Չինաստանը թափանցիկ և պատասխանատու մոտեցում է ցուցաբերում կորոնավիրուսի տարածմանը, օպերատիվ կերպով կիսվում է տեղեկատվությամբ, ուստի կոչ է անում չվստահել շշուկներին, որոնք ավելի վատն են, քան հենց կորոնավիրուսը:
  • Փետրվարի 6-ի դրությամբ 2019-nCoV կորոնավիրուսով հիվանդների քանակը հասել է 28018-ի, մահացել է 563 մարդ: Մեկ գիշերվա ընթացքում մահացել է 73, վարակվել՝ 3694 մարդ: ԱՀԿ արտակարգ դրության ծրագրի գործադիր տնօրեն Մայք Ռայանը հայտարարել է, որ կորոնավիրուսը բուժող ստուգված, արդյունավետ դեղամիջոց դեռևս առկա չէ:
  • Չինաստանի Առողջապահության ազգային հանձնաժողովի տվյալներով՝ բուժվածների թիվը հասել է 1198-ի: Նախորդ օրվա համեմատ բուժվածների թվի աճը կազմել է շուրջ 24%: Ընդհանուր առմամբ՝ հիվանդությունը հաղթահարածների թիվը գրեթե կրկնակի գերազանցում է մահացածների թվին:
  • Յուհան քաղաքի հիվանդանոցում մեկնարկել են ամերիկյան Gilead Sciences ընկերության էքսպերիմենտային դեղամիջոցի կլինիկական փորձարկումներն ընդդեմ կորոնավիրուսի: Հետազոտությունների ղեկավար Ցաո Բինը նշել է, որ ոչ կենդանի օրգանիզմում (in vitro) Remdesivir դեղամիջոցը դրական արդյունք է ցուցաբերել նոր տեսակի կորոնավիրուսի տարածումը դադարեցնելու գործում:
Ստուգվում են Յուհանի բոլոր բնակիչները / ©REUTERS / China Daily
  • Չինաստանի Յուհան քաղաքում այսօր առավոտյան բժիշկները սկսել են ստուգել քաղաքի բոլոր բնակիչների անխտիր ստուգմանը: Հիշեցնենք՝ քաղաքում հաշշվում է շուրջ 12 միլիոն բնակիչ: Վարակվածների մոտ 75%-ը հենց այս քաղաքում են, որտեղ և բռնկվել էր վիրուսը:

Հարգելի քաղաքացիներ,Վերջին օրերի ընթացքում մամուլում և սոցիալական ցանցերում տեղեկատվություն է տարածվում նաև այն մասին,…

Опубликовано Arsen Torosyan Среда, 5 февраля 2020 г.
  • ՀՀ Առողջապահության նախարար Արսեն Թորոսյանն անդրադարձել է տարածված այն լուրերին, ըստ որոնց՝ բանանը կամ այլ մրգեր, Չինաստանից առաքված ծանրոցներ կարող են կորոնավիրուս տարածել: Նախարարի խոսքով՝ հարուցիչը մրգերի կամ ծանրոցների մակերեսների վրա չի կարող երկար գոյատևել և դառնալ վարակի տարածման աղբյուր:

Փետրվարի 5

  • Ռուսական օդատիեզերական ուժերի 2 ինքնաթիռ չինական Յուհան քաղաքից տարհանել է ՌԴ քաղաքացիների խմբին, ինչպես նաև ՀՀ քաղաքացի Լյուդմիլա Բաղդասարյանին: 144 տարհանվածների մոտ կորոնավիրուս չի հայտնաբերվել: Հայաստանի արտգործնախարարությունը շնորհակալություն է հայտնել ռուսական կողմին:
Ռուսական օդուժը տարհանել է 144 մարդու / ©TASS
  • Փետրվարի 5-ի դրությամբ 2019-nCoV կորոնավիրուսով հիվանդների թիվը 24 503 է, մահացածներինը՝ 492: Վերջին 24 ժամում գրանցվել է մահացության 65 դեպք: Չինաստանի բուժհաստատություններում հսկողության ներքո գտնվում է 152,7 հազար մարդ: Հիվանդանոցների դուրս է գրվել 892 մարդ:
  • Ավստրիական Զալցբուրգում 2019-nCoV կորոնավիրուսով վարակված լինելու մեջ կասկածվող կինը հիվանդանոցից փախուստի է դիմել: Թայվանում և Նոր Զելանդիայում շրջագայելուց հետո նա վերադարձել էր Ավստրիա և դիմել բժշկի՝ հազի և շնչառական խնդիրների գանգատով: 31-ամյա կնոջը ոստիկանները հայտնաբերել են իր տանը: Հետազոտությունների արդյունքները հայտնի կլինեն այսօր երեկոյան:
  • Չինաստանի Չժեցզյանի համալսարանի հետազոտողների խումբը պատվաստանյութ է գտել կորոնավիրուսով վարակվածներին բուժելու համար: Նման հայտարարությամբ է հանդես եկել նաև չինացի գիտնական, համաճարակաբան Լի Լանցզյունանի հետազոտական խումբը: Պատվաստանյութ ստեղծելու մասին է հայտնել նաև մեծբրիտանական հետազոտական խումբը` նշելով, սակայն, որ, չնայած հաջողությանը, տարածման ներկայիս տեմպերի դեմ պայքարը կարող է և չհաջողվել:
  • 2019-nCoV կորոնավիրուսը բուժող դեղամիջոցի ստացման մասին վերոնշյալ լուրերի տարածումից անմիջապես հետո Brent տեսակի նավթի գինն աճել է 3%-ով, իսկ WTI-ն՝ 2,4 %-ով:

Փետրվարի 4

  • Չինական իշխանությունների հաղորդմամբ՝ փետրվարի 4-ի դրությամբ երկրի տարածքում նոր կորոնավիրուսով վարակվածների թիվը 20 438 է, իսկ մահացածներինը՝ 427: Առողջապահության համաշխարհային կազմակերպության (ԱՀԿ) տվյալներով՝ Չինաստանի սահմաններից դուրս 20 երկրում վարակվածների թիվը 176 է: Արտերկրում մահացության 2-րդ դեպքն է գրանցվել:
  • ԱՀԿ գլխավոր տնօրեն Տեդրոս Ադհանոմ Գեբրեյեսուսը չի բացառել, որ համաճարակը կարող է ավելի վատթարանալ, սակայն կոչ է արել խուճապի չմատնվել:
  • Գիտնականները եկել են եզրակացության, որ 17 տարի առաջ բռնկված համաճարակը և 2019-nCoV կորոնավիրուսն 80%-ով համընկնում են: Նրանց կարծիքով՝ հնարավոր է, որ նախորդ համաճարակի բուժման մեթոդներն ու պատվաստանյութերն օգտակար լինեն նաև այս նոր կորոնավիրուսի հաղթահարման համար: Մինչ մասնագետները փորձարկում են նոր պատվաստանյութերը, չինական հիվանդանոցներում արդեն բուժվել է 725 մարդ:

? Ի՞նչ է կորոնավիրուսը և ինչպե՞ս պաշտպանվել դրանից:? Խնդրում եմ տարածել, որպեսզի բոլորը տեղեկացված լինեն:

Опубликовано Arsen Torosyan Понедельник, 3 февраля 2020 г.
  • ՀՀ Առողջապահության նախարարությունը հրապարակել է կորոնավիրուսի և դրանից պաշտպանվելու մասին տեղեկատվական հոլովակ:

Ամենաընթերցվածը

1 րոպե
Խմբագրություն

Նախորդ օրը կորոնավիրուսից մահացել է 7 մարդ, առողջացել են 205-ը: Վարակվածների թիվը հասել է 28606-ի, փաստացի բուժում է ստանում 11824 պացիենտ:

3 րոպե
Խմբագրություն

Աստղաքիթը մյուս խլուրդներից տարբերվում է դնչի վրա քսաներկու շոշափուկներով, ինչով կենդանին հիշեցնում է այլմոլորակայինի:

3 րոպե
Խմբագրություն

Մուտքագրելով անշարժ գույքի վկայականի համարը կամ կադաստրային ծածկագիրը՝ կարող եք տեսնել գույքահարկի գործող չափը, գույքի կադաստրային արժեքը, տեղեկանաք, թե ինչքան է կազմելու տվյալ գույքի հարկը 2021թ.-ից սկսած, ինչպես նաև վերջնական չափը՝ 2026թ.:

8 րոպե
Խմբագրություն

Քանի՞ անոթում կտեղավորվեն խնձորներն ու դեղձերը, քանի՞ պաղպաղակ կուտի Վինի Թուխը, քանի՞ կենգուրու կա, արդյո՞ք թզուկը ճիշտ է, քանի պտույտ կկատարի ժամացույցի սլաքը. պատասխանեք, թե կարող եք:

1 րոպե
Խմբագրություն

Հայաստանում կորոնավիրուսից մահացության 7 նոր դեպք է գրանցվել: Նախորդ օրն առողջացել են 181-ը: Վարակվածների թիվը Հանրապետությունում հասել է 25127-ի:

3 րոպե
Խմբագրություն

Նախորդ օրը Covid-19-ից մահացել է 10 մարդ, առողջացել են 751-ը: Արտաշատի ԲԿ-ում պատուհանից ցած նետված 55-ամյա վարակվածը տեղափոխվել է Սբ. Գրիգոր Լուսավորիչ ԲԿ, վիճակը գնահատվում է ծանր:

1 րոպե
dev

Առցանց քարտեզում կարող եք տեսնել Ձեր շենքում կամ հարևանությամբ գտնվող, կորոնավիրուսով վարակված ինքնամեկուսացվածների թիվը:

14 րոպե
Խմբագրություն

Ինչի՞ համար են իրականում հաճախորդների բոնուսային քարտեր, իրերի պահման խցիկներն ու հակաառևանգման դարպասները, ի՞նչ է կանացի ապրանքների «վարդագույն հարկը», սայլակների կառուցվածքի իրական նշանակությունն ու այլ հնարքներ, որոնց մենք գնումներ կատարելիս ուշադրություն չենք դարձնում:

1 րոպե
Խմբագրություն

Վարակվածների թիվը հասել է 13130-ի: Վերջին 24 ժամում կորոնավիրուսից մահացել է 10 մարդ, առողջացել են 294-ը:

[miniorange_social_login]

Մեկնաբանությունները

Գրել մեկնաբանություն
Հաստատեք
Մուտք գործեք
Մուտք գործելով Դուք համաձայնվում եք կայքի օգտագործման օրենքների հետ.