2019-nCoV կորոնավիրուսով հիվանդների թիվը Չինաստանում կարող է 10 անգամ մեծ լինել
Հոնկոնգի հետազոտողները մոդելավորել են կորոնավիրուսի համաճարակի տարածումը և ստացել են պաշտոնական տվյալներից խիստ տարբերվող արդյունքներ:
Փետրվարի 3-ի դրությամբ պաշտոնապես հաստատվել է 2019-nCoV կորոնավիրուսով հիվանդացության 17 491 դեպք, որոնցից 17 307-ը՝ Չինաստանում: Սակայն Հոնկոնգի համալսարանի գիտնականները հաստատել են, որ այդ թիվը հնարավոր է՝ նվազեցված լինի տասնյակ անգամ:
Հետազոտողներն իրենց հոդվածում վիճակագրական մոդել են պատրաստել: Նրանց հաշվարկներով՝ միայն կորոնավիրուսի բռնկման օջախ համարվող Յուհան քաղաքում վարակվածների թիվը հունվարի 25-ին արդեն պետք է հասած լիներ 75 815-ի:
Գիտնականներն այդպիսի արդյունքներ են ստացել համակարգչային մոդելավորմամբ: Որպես սկզբնաղբյուր են վերցրել դեկտեմբերի 31-ից մինչև հունվարի 28-ը սահմանը հատած յուհանցի վարակվածների թիվը: Այնուհետև տեսականորեն հաշվարկվել է 2019-nCoV-ով վարակվածների թիվը հենց Յուհան քաղաքում՝ դեկտեմբերի սկզբից մինչև հունվարի 25-ը:
Հիվանդների թվի կանխատեսման համար հաշվի են առնվել նաև Չինաստանի տարածքում 300 քաղաքներում մարդկանց տեղաշարժի վերաբերյալ տվյալները, ավիատոմսերի ամրագրման տեղեկությունները և կարանտինային ռեժիմի ազդեցությունը, որը մտցվել է Յուհանում և հարակից քաղաքներում հունվարի 23-24-ը: Վարակման հաստատված տվյալները ստացվել են Չինաստանի Հիվանդությունների վերահսկման և պրոֆիլակտիկայի կենտրոնի կողմից հրապարակված հաշվետվություններից:
Գիտնականների խոսքով՝ հրապարակված պաշտոնական թվերի և մոդելավորման արդյունքների նման մեծ տարբերությունը կարող է պայմանավորված լինել մի շարք հանգամանքներով: Նախ՝ ինկուբացիոն շրջանի տևողությունը (վարակման և առաջին ախտանիշների ի հայտ գալու ժամանակահատվածը), որը կարող է ձգվել մինչև երկու շաբաթ: Տվյալների տարբերության վրա ազդում է նաև լաբորատոր մեթոդներով օրգանիզմում վիրուսի առկայության հաստատման համար անհրաժեշտ ժամանակը:
Հետազոտությունը ցույց է տվել, որ վիրուսով վարակված յուրաքանչյուր մարդ միջինում կարող էր վարակել 2-3 մարդու, իսկ հիվանդների քանակը յուրաքանչյուր 6,4 օրվա ընթացքում կրկնապատկվում էր: Եթե վիրուսը տարածվում է նման մեծ արագությամբ, ապա հավանական է, որ համաճարակի օջախներն արդեն ընդարձակվում են մի շարք խոշոր քաղաքներում՝ Յուհանի համեմատ 1-2 շաբաթ ավելի ուշ:
Չինաստանի հետ ինտենսիվ տրանսպորտային հաղորդակցություն ունեցող արտասահմանյան մեգապոլիսները նույնպես կարող են դառնալ վիրուսային բռնկումների երկրորդային էպիկենտրոններ: Բայց կա նաև լավ լուր. եթե մոդելավորման արդյունքները հաստատվեն, նշանակում է՝ 2019-nCoV-ի մահացությունն էականորեն ցածր է, քան ավելի վաղ ենթադրվել է՝ 1%-ից քիչ:
Հավելենք, որ ներկայումս, պաշտոնական տվյալներով, կորոնավիրուսից մահացել է 362 մարդ, առողջացել է 522-ը: 2019-nCoV-ի վարակման դեպք է արձանագրվել 26 երկրում՝ բացի Չինաստանը:
Համաճարակի տարածումը կանխելու նպատակով մի շարք սահմանափակումներ են մտցվել Չինաստանի հետ հաղորդակցությունում: Դադարեցվել են բազմաթիվ չվերթներ, կասեցվել է ապրանքատեսակների ներկրումը Չինաստանից:
Մեկնաբանությունները