Թբիլիսիում քննարկվել են «Պարսից ծոց-Սև ծով» տրանսպորտային միջանցք ստեղծելու մասին համաձայնագրին վերաբերող հարցերը
Արարատ Միրզոյանը և Դավիդ Զալկալիանին քննարկել են «Պարսից ծոց-Սև ծով» միջազգային տրանսպորտային միջանցք ստեղծելու մասին համաձայնագրին վերաբերող հարցերը և դրա շրջանակում նոր հնարավորությունները:
Հայաստանի և Վրաստանի արտաքին գործերի նախարարները Թբիլիսիում քննարկել են «Պարսից ծոց-Սև ծով» միջազգային տրանսպորտային միջանցք ստեղծելու մասին համաձայնագրին վերաբերող հարցեր:
ՀՀ ԱԳՆ հաղորդմամբ` Արարատ Միրզոյանը և Դավիդ Զալկալիանին անդրադարձել են նաև միջազգային տրանսպորտային միջանցքի ստեղծման հետ կապված նոր հնարավորություններին:
Արարատ Միրզոյանը, ինչպես նշվում է, խոսել է տարածաշրջանային կոմունիկացիաների ապաշրջափակման կարևորության մասին` շեշտելով, որ դա Հայաստան-Վրաստան համագործակցության ընդլայնման համար նոր հնարավորություններ կընձեռի:
ԱԳ նախարարները պնդել են, որ երկու երկրների միջև երկխոսության ակտիվացումն ու համագործակցությունը կնպաստեն տարածաշրջանային անվտանգությանն ու կայունությանը։ Միրզոյանն ընդգծել է, որ Հայաստանը մեծապես կարևորում է Վրաստանի հետ առևտրատնտեսական համագործակցության խորացումը:
ՀՀ ԱԳ նախարարը վրաց կառավարությանը շնորհակալություն է հայտնել 15 հայ ռազմագերիների հայրենադարձման գործում ներդրած միջնորդական ջանքերի համար` հավելելով, որ Ադրբեջանը դեռևս շարունակում է պատանդառության մեջ պահել հայ ռազմագերիների և քաղաքացիական անձանց` խախտելով եռակողմ հայտարարությամբ ստանձնած իր պարտավորությունները:
Միրզոյանը Զալկալիանիին ներկայացրել է ադրբեջանական զինված ուժերի՝ Հայաստանի ինքնիշխան տարածք ներթափանցելու հետևանքով ստեղծված իրավիճակը` շեշտոլվ, որ դա խաթարում է տարածաշրջանային կայունությունը:
Անդրադառնալով Լեռնային Ղարաբաղի հիմնախնդրին՝ Արարատ Միրզոյանն ընդգծել է ԵԱՀԿ Մինսկի խմբի համանախագահության հովանու ներքո ղարաբաղյան հակամարտության խաղաղ կարգավորման գործընթացի վերսկսման անհրաժեշտությունը:
Մեկնաբանությունները