Հայաստանում «Արտակարգ դրություն» սահմանվեց. ի՞նչ է դա նշանակում. հնարավորինս սեղմ

Մարտի 16-ից, ժամը 18:30-ից ՀՀ ամբողջ տարածքում մտցվել է Արտակարգ դրություն, որը տևելու է 30 օր՝ մինչև ապրիլի 14-ը, ժամը՝ 09:00-ն ներառյալ:

Արտակարգ դրությունը համակարգելու է Պարետը՝ Տիգրան Ավինյանը: ԱԴ-ի հիմնական կետերն են՝

1. ՀՀ տարածքում արգելվում են հանրային միջոցառումները՝ հավաքները, միջոցառումները՝ 20 հոգուց ավելի մարդկանց մասնակցությամբ, բացառությամբ Պարետի կողմից սահմանված դեպքերի և վայրերի:

2. Ցամաքային ուղևորափոխադրումը դադարեցվում է՝ բացառությամբ իրենց երկիր վերադարձող քաղաքացիների համար:

3. Օդային հաղորդակցությունը դադարեցվում է Պարետատան կողմից որոշված երկրների հետ՝ Առողջապահության նախարարի ցուցումով, Պարետի որոշմամբ:

4. Հայաստան կարող են վերադառնալ ՀՀ քաղաքացիները, նրանց ընտանիքի անդամները, դիվանագիտական անձնագիր ունեցողները, կեցության իրավունք ունեցողները, պաշտոնական այցով ժամանողները:

5. Կարող է սահմանափակվել որոշակի տարածքներում տեղաշարժը:

6. Պարետի որոշմամբ կարող է սահմանափակվել որոշ բեռնատեսակների մատակարարումը Հայաստան:

7. Որոշակի տարածքներում կարող են տեղադրվել հսկիչ անցակետեր՝ քաղաքացիների առողջական վիճակը հեզազոտելու նպատակով:

8. ԶԼՄ-ներով արգելվում է ոչ պաշտոնական տեղեկատվության հաղորդումը՝ կորոնավիրուսի վերաբերյալ: Պաշտոնական է համարվում Պարետատան հրապարակումը:

9. Ներքին ուղևորափոխադրումը, բեռնափոխադրումն իրականացվում են սահմանված կարգի համաձայն:

10. Պարետի որոշմամբ՝ որոշ համայնքներում կարող են սահմանվել ելումուտի հատուկ ռեժիմ:

11. Ֆիզիկական և իրավաբանական անձանց պատկանող գույքը, միջոցները, ներառյալ՝ դեղեր այլն, կարող են օգտագործվել Արտակարգ դրության իրավական ռեժիմի ապահովման նպատակով՝ փոխհատուցմամբ:

12. Սահմանափակում ՀՀ քրեակատարողական հիմնարկներում (տեսակցություն, ծանրոց, բացառությամբ տեսազանգերի):

13. Սահմանափակում ՀՀ Զինված ուժերի զորամասերում (ծանրոցներ, արձակուրդներ, տեսակցություն):

14. Արգելվում են կրոնական ծեսեր կազմակերպելն ու մասնակցելը:

15. Արգելվում են գործադուլները:

16. Դեղեր և այլ՝ նախապես որոշված պարագաներ ՀՀ և դրանից դուրս տեղափոխումը թույլատրվում է ՊԵԿ-ի և Պարետի համատեղ որոշմամբ:

17. Նշված վայրերում արգելվում է առևտրի, ժամանցի կենտրոնների գործունեությունը:

18. Բժշկական հաստատությունները, այդ թվում` մասնավոր, ենթարկվում են Առողջապահության նախարարի ցուցումներին: