Հայաստանում 3 տասնյակ վարակվածներ կան արդեն (upd.)
Կորոնավիրուսով վարակվածության դեպք է գրանցվել Քաղավիացիայի կոմիտեում: Կառավարությունը քննարկում է երկրում կամ առանձին շրջաններում արտակարգ դրության հարցը:
Covid-19-ով վարակվածների թիվը Հայաստանում հասավ 30-ի: Առաջին վարակվածը, ով ժամանել էր Իրանից, արդեն առողջացել է: 2 նոր վարակվածներից մեկը, ըստ Արսեն Թորոսյանի, կապված է «Էջմիածնի» դեպքի հետ, մյուսն ավելի վաղ հաստատված 2 դեպքի հետ:
Վարչապետ Նիկոլ Փաշինյանը նշել է, որ վարակվածության դեպք է գրանցվել Երևանի արտադրական ձեռնարկություններից մեկում՝ Քաղավիացիայի կոմիտեում:
Միաժամանակ հայտնել է, որ Կառավարությունում քննարկվում է երկրում կամ առանձին շրջաններում արտակարգ դրության հայտարարման հարցը:
Մինչ այդ պետական մարմիններն աստիճանաբար անցնում են սահմանափ հաղորդակցության ռեժիմի: Երևանի քաղաքապետարանը հայտարարություն է տարածել՝ նշելով, որ փակվում է «Մեկ պատուհան» գրասենյակը, վարչական վարույթների լսումները հետաձգվում են և այլն:
Էջմիածին քաղաքի 27 մուտքերից ու ելքերից գործում են միայն 3-ը: Այդ կետերով անցնողները տեղում հետազոտվելու են:
UPD 1. Հայաստանում կորոնավիրուսով վարակվածների թիվը 45 է:
Նախարարը նշել է, որ 15 նոր դեպքերից մի քանիսն ավելի վաղ մեկուսացված են եղել, մյուսների շփման շրջանակը ճշտվում է:
UPD 2. Covid-19 կորոնավիրուսով վարակվածների թիվն, ըստ նախարար Արսեն Թորոսյանի, Հայաստանում աճել է ևս 7-ով՝ դառնալով 52:
Նախարարը նշել է, որ մի մասը կապ ունեն «Էջմիածնի» դեպքի հետ:
Մեկնաբանությունները