Hubble աստղադիտակը մանրակրկտորեն լուսանկարել է մասնատվող ATLAS գիսաստղը

Երկարժամանակյա C/2019 Y4 գիսաստղը հայտնաբերվել է 2019թ. դեկտեմբերի 28-ին: Իր երկրորդ անվանումն ATLAS-ը ստացել է Asteroid Terrestrial-impact Last Alert Systems աստղադիտակների ավտոմատացված համակարգի պատվին, որի շնորհիվ հաջողվել է հայտնաբերել տիեզերական մարմինը:

Նախնական գնահատականներով՝ Արեգակի շուրջը գիսաստղի պտտման ժամանակաշրջանը կազմել է շուրջ 5,5 հազար տարի: C/19 Y4-ը (ATLAS) Երկրին պետք է ամենամոտը գտնվի մոտ մեկ ամսից` մայիսի 23-ին: Սկզբնապես աստղագետները սպասում էին, որ արդեն մայիսի կեսերին գիսաստղը կարող է դառնալ արտառոց պայծառ: Սակայն, ամենայն հավանականությամբ, դա տեղի չի ունենա:

Ապրիլի 20-ին Hubble տիեզերական աստղադիտակն արել է գիսաստղի մանրակրկիտ լուսանկարը: Այնտեղ լավ տեսանելի է, որ նրա միջուկը բաժանվել է առնվազն 4 մասերի: Նրանցից քիչ թե շատ պայծառ երկուսը, դատելով լուսանկարից, նույնպես մասնատված են. նրանք կազմված են 1-2 վառ և խոշոր, ինչպես նաև անհայտ քանակությամբ ավելի փոքր ու աղոտ տարրերից:

Լուսանկարման պահին C/2019 Y4 (ATLAS) գիսաստղը գտնվել է Երկրից շուրջ 0,98 աստղագիտական միավոր հեռավորության վրա (գրեթե 146 մլն կմ), իսկ մայիսի 23-ին այն մեր մոլորակից մոտ 0,78 աստղագիտական միավոր (մոտ 116 մլն կմ) հեռավորության վրա կգտնվի:

Մասնատվող գիսաստղին ներկայումս կարող են դիտել նաև սիրողական աստղագետները՝ բավարար չափով խոշոր աստղադիտակով (15 սմ տրամագծով): C/2019 Y4-ը (ATLAS) այժմ տեղափոխվում է դեպի Ընձուղտի համաստեղություն և եղանակային լավ պայմանների դեպքում տեսանելի է ամբողջ գիշեր:

Ավելի վաղ հաղորդվել է, որ գիտնականները կարողացել են արձանագրել էականորեն տարբեր չափերի սև խոռոչների բախումը, իսկ լեհ աստղագետների խումբը հայտարարել է, որ ևս մեկ գիսաստղ՝ 2I/Borisov-ը, աստիճանաբար մասնատվում է:

Էջանիշ

Պատճենել հղումը

Email

Տպել

Twitter

VK

Telegram