Չինաստանը մտադիր է հարվածել Երկրի ուղղությամբ շարժվող աստերոիդին

Չինաստանի Տիեզերագիտության ազգային կենտրոնի փորձագետները նախագիծ են հրապարակել, ըստ որի` հրթիռային համալիր է արձակվելու տիեզերք, որը պետք է Երկրից հեռու մղի Բեննու աստերոիդը: Այն ունի 492 մետր լայնություն և դասակարգված է որպես հնարավոր վտանգավոր: Գիտնականները կանխատեսել են, որ Երկրի հետ նրա բախման հավանականությունը 1-ը 2700-ի է:

Չինական մոդելավորումը ենթադրում է, որ 23 միավոր «Long March 5», յուրաքանչյուրը շուրջ 900 տոննա կշռող հրթիռների համաժամանակյա հարվածը կարող է Բեննուին շեղել 9 հազար կմ-ով: Դա Երկրի շառավղից 1,4 անգամ ավելին է և պետք է ապահովի մեր մոլորակի անվտանգությունը:

Նշվում է, որ Բեննու աստերոիդին հարվածելու համար մեծ քանակությամբ կինետիկ էներգիա է անհրաժեշտ: Թեև միջուկային պայթյունի կիրառումը կարող է նախընտրելի լինել, սակայն այդ դեպքում ռիսկ կա, որ թիրախը կբաժանվի տարբեր մասերի, որոնք նույնպես կարող են հարվածել Երկրին:

Չինաստանի Տիեզերագիտական ազգային կենտրոնի ինժեներ Մինգտաո Լիի խոսքով` Երկիրը տասնյակ տարիներ հնարավոր կլինի առանց միջուկային մեթոդների պաշտպանել խոշոր աստերոիդներից: Գիտնականները նշում են, որ Long March 5 հրթիռը նվազագույն արդիականացում է պահանջում (oրինակ` խուսավարող շարժիչներով համալրում):

Չինաստանը միակ երկիրը չէ, որ պատրաստվում է հետ մղել Երկրի ուղղությամբ շարժվող աստերոիդները: ԱՄՆ-ում կատարված հետազոտության արդյունքում մշակվել է HAMMER-ի կոնցեպտը («Hypervelocity Asteroid Mitigation Mission for Emergency Response»), և NASA-ն հաշվարկել է, որ Բեննուն շեղելու համար կպահանջվի HAMMER-ի 34-53 հարված:

Բեննու աստերոիդի անկումը հավանական է համարվում 2169 և 2199 թվականների միջակայքում: Անկման ժամանակ նրա արագությունը կազմելու է 12,86 կմ/վ: NASA-ն այդ աստերոիդն անվանելը է Երկրի համար ամենավտանգավորները:

2016թ. Բեննուի մոտ է ուղարկվել OSIRIS-REx տիեզերական զոնդը: Սարքավորումը 2018թ. դեկտեմբերին հասել է երկնային մարմնին, լուսանկարել և նմուշներ վերցրել նրա մակերեսից: Մայիսին զոնդն ուղևորվել է դեպի Երկիր: Այն կվերադառնա երկու տարի անց: