Իրանական թերթը նշել է Երևան-Բաքու համաձայնության թերությունները

Իրանական Etemad թերթում հրապարակված հոդվածում անդրադարձ է կատարվել Լեռնային Ղարաբաղի վերաբերյալ պայմանավորվածություններին: Կողմերի միջև Ռուսաստանի միջնորդությամբ ստորագրված հայտարարությունն իրանական աղբյուրը դրական է գնահատել: Սակայն, ինչպես նշում է իրանցի միջազգային լրագրող Հայալ Մուազզինը, գործնականում ընդունված դրույթները կյանքի կոչելիս կարող են ծագել բարդ խնդիրներ. հայտարարությունը կարող է բախվել բազմաթիվ խոչընդոտների և ունենալ լուրջ ու հիմնավոր թերություններ: Մասնավորապես.

1. Լեռնային Ղարաբաղի բացակայությունը գործընթացում

Գործընթացին Արցախի ինքնահռչակ կառավարությունը չի մասնակցում: Հայտարարությունը ստորագրված է Բաքվի և Երևանի միջև: Մուազզինի փոխանցմամբ՝ իրանական թերթում նշվու է, որ նախկինում Մինսկի խումբը բազմիցս առաջարկներ է ներկայացրել հակամարտության կարգավորման վերաբերյալ, սակայն դրանք Լեռնային Ղարաբաղի (Արցախի) ինքնահռչակ Հանրապետության կողմից չեն ընդունվել: Ներկայումս նույնպես ԼՂ իշխանությունները, ըստ Etemad-ի, հրադադարի պայմանները չեն ընդունում:

2. Հայաստանում ստեղծված փխրուն իրավիճակը

Նիկոլ Փաշինյանը համաձայնություն է ստորագրել, իսկ նրա կառավարությունը գտնվում է փխրուն և անկայուն վիճակում: Նշվում է, որ հասարակական կարծիքը ցնցված է կառավարության անհաջողությունից, և նույնիսկ Հանրապետության նախագահ Արմեն Սարգսյանն է հայտարարել, որ տեղյակ չի եղել բանակցություններից: Թերթում, լրագրողի փոխանցմամբ, շեշտվում է, որ, հաշվի առնելով Ջո Բայդենի հաղթանակն ԱՄՆ նախագահական ընտրություններում և նրա մտերիմ հարաբերությունները Կոնգրեսում հայկական լոբբիի հետ, բացառված չէ, որ Վաշինգտոնը կառավարության փոփոխությամբ կաջակցի հայ ազգայնականներին և կփոխի իրավիճակը Ղարաբաղում:

3. Լեռնային Ղարաբաղի կարգավիճակը

Ստորագրված համաձայնության (Հայտարարության, խմբ.) թերություններից մեկը Լեռնային Ղարաբաղի քաղաքական կարգավիճակը չհիշատակելն է: Ադրբեջանի կազմում այն ինքնավար կարգավիճակ ուներ: Այն պետք է ունենա իրավական որոշակի կարգավիճակ: Etemad-ում ընդգծվում է, որ կարգավիճակի չլուծված հարցը կարող է հանգեցնել հակամարտության վերսկսմանը:

4. Ռուսաստանի երաշխիքները

Մոսկվան իր վրա է վերցրել Լեռնային Ղարաբաղի հակամարտության կարգավորման երաշխավորությունը: Սակայն, ինչպես նշվում է, կարգավորումը և Կովկասում անվտանգության խնդիրները պահանջում են տարածաշրջանի պետությունների մասնակցությունը: Ռուսաստանը միակողմանիորեն չի կարող անվտանգության հարցը լուծել: «Հաշվի առնելով Իրանի սահմանների ընդհանրությունը Կովկասի երկրների հետ, ինչպես նաև Թուրքիայի հետաքրքրություններն Ադրբեջանում՝ Թեհրանի և Անկարայի դիրքորոշումները պետք է հաշվի առնվեն երկարատև համաձայնությունում»:

5. Օտարերկրյա վարձկանները

Համաձայնությունում չհիշատակված հարցերից է օտարերկրյա վարձկանների, ծայրահեղական գրոհայինների ներկայությունը: Ադրբեջանը հերքել է նրանց ներգրավումը, սակայն, իրանական թերթի հաստատմամբ, առկա են բազմաթիվ ապացույցներ: Նշվում է, որ սիրիացի ահաբեկիչները լրջագույն խնդիր կարող են հանդիսանալ տարածաշրջանի երկրների անվտանգության համար:

6. Մինսկի խումբը

Մինսկի խումբը նոր համաձայնությունում դերակատարում չունի: Կովկասյան տարածաշրջանը կարևոր դերակատարում ունի Եվրոպայի համար. ԱՄՆ-ը, Ֆրանսիան և այլ երկրներ համաձայն չեն բացառապես ռուսական ծրագրի հետ: Նրանք հետաքրքրված են, որ իրենց հետաքրքրությունները նույնպես հաշվի առնվեն: