Ինչքա՞ն է կազմելու մեքենայի մաքսատուրքը հունվարի 1-ից հետո

Վերջին շրջանում քննարկվող ամենաարդիական հարցերից մեկը հունվարի 1-ից ավտոմեքենաների և մի շարք այլ ապրանքների մաքսատուրքերի ու հարկերի սահմանաչափերի նախատեսվող փոփոխություններն են:

Մասնավորապես, ՀՀ քաղաքացիների համար երրորդ երկրից ավտոմեքենա ներմուծելիս մինչ այժմ գործող 10 տոկոս մաքսատուրի փոխարեն սահմանվում է ավելի բարձր դրույքաչափ: Նախ՝ նշենք, որ դեռևս 2015թ.-ից Եվրասիական տնտեսական միության մյուս երկրներում արդեն գործում էր 15% և ավել (ըստ տարեթվի և շարժիչի հզորության) մաքսատուրքը, իսկ Հայաստանին տրամադրված էր 5 տարի արտոնյալ ժամկետ: Ոլորտի մասնագետները նշում են, որ արտոնյալ ժամկետը տրված էր երկրում տեղական արտադրության խթանման պայմանով, ինչը չի արվել, ուստի անհիմն է ևս 2, 3, կամ 5 տարի խնդրել ԵԱՏՄ երկրներից, որտեղ որոշումները կատարվում են կոնսենսուսով:

Այսպես, ՊԵԿ հաղորդմամբ՝ հունվարի 1-ից երրորդ երկրից ԵԱՏՄ տարածք ավտոմեքենա ներմուծելու դեպքում մաքսատուրքերն ու հարկերը հաշվարկվելու են միասնական դրույքաչափով, որը ներառում է մաքսատուրքերի և ավելացված արժեքի հարկի հանրագումարը` առանց այդ հարկերը տրոհելու: Հաշվարկը կատարվելու է ներմուծվող ավտոմեքենայի թողարկման տարեթիվը, ավտոմեքենայի արժեքը ու շարժիչի աշխատանքային ծավալը հաշվի առնելով:

ԵԱՏՀԽ 107-րդ որոշումը

Նոր սահմանաչափերը նախատեսված են Եվրասիական տնտեսական հանձնաժողովի խորհրդի (ԵԱՏՀԽ) 20.12.2017թ. 107-րդ որոշմամբ: Ստորև ներկայացնում ենք այդ որոշմամբ սահմանված միասնական դրույքաչափերը:

Նշենք, որ այստեղ հաշվված չէ բնապահպանական վճարը:

Նշենք, որ 3-5 տարեկան և ավելի հին տարեթիվ ունեցող մեքենաների համար թողարկման տարեթիվը հաշվարկվում է միայն բնապահպանական վճարի համար, իսկ մաքսատուրքի դեպքում հաշվարկի վրա չի ազդում:

Բնապահպանական հարկը չի փոխվելու և շարունակվելու է գանձվել ՀՀ հարկային օրենսգրքի 171-րդ հոդվածի համաձայն։ Ըստ այդ օրենքի՝ մինչև 5 տարեկան ավտոմեքենաներն ազատված են բնապահպանական հարկերից: 5-10 տարեկան ավտոմեքենաների համար գանձվում է 2% հարկ, 10-15 տարեկանների համար՝ 10%, իսկ 15 տարեկանից բարձրներինը՝ 20%:

Օրինակներ

Բերենք երրորդ երկրից ներմուծվող ավտոմեքենայի մաքսատուրքի հաշվարկման օրինակներ.

Մեքենայի արժեքը 7500 եվրո է, մինչև 3 տարեկան է, շարժիչի հզորությունը՝ 2000 խսմ, այդ դեպքում ստացվում է՝ 7500€ x 54% = 4050€, բայց 2000խսմ x 2,5€ = 5000€, ուստի այս դեպքում մեքենայի մաքսատուրքը կկազմի 5000 եվրո:

Մեքենայի արժեքը 15000 եվրո է, մինչև 3 տարեկան, շարժիչը՝ 4500 խսմ, կստացվի՝ 15000€ x 48% = 7200€, բայց՝ 4500խսմ x 3,5€ = 15750€, իսկ եթե մեքենայի շարժիչը լինի 1600 խսմ, ապա՝ 1600 x 3,5€ = 5600€, այսինքն՝ առաջինի դեպքում հաշվվում է խսմ-ով, քանի որ այն ավելի բարձր է, իսկ երկրորդ դեպքում՝ 48%-ով, քանի որ սա է ավելի բարձր:

Հայաստանում ամենապահանջված մեքենաների միջին տարիքը 12 է, աշխատանքային ծավալը՝ 1800-2300 խսմ: Հաշվենք սա. այս դեպքում մեքենայի գինն էական չէ, կարևորը շարժիչի ծավալն է. օրինակ՝ 1000 եվրոյով արտերկրից գնված 1800 խսմ մեքենայի ներմուծման արժեքը կկազմի 1800 x 4,8€ = 8640€, սրան կգումարվի նաև 10% (100€) բնապահպանական վճար:

ՊԵԿ հաղորդմամբ՝ ավտոմեքենաների արժեքը հայտարարագրվում է ուղևորային մաքսային հայտարարագրում: Եթե ներկայացված փաստաթղթերում արժեքը չի հիմնավորվում, ապրանքի արժեքը սահմանում է մաքսային մարմինը՝ համաձայն ԵԱՏՄ մաքսային օրենսգրքի 267-րդ հոդվածի։

Հավելենք, որ ԵԱՏՄ տարածքում մաքսատուրք չի գանձվում: Միասնական դրույթաչափով հարկումից ազատված են մի շարք փոխադրամիջոցներ, որոնցից են՝ էլեկտրական մարտկոցով կամ հիբրիդային շարժիչով աշխատող ավտոմեքենաները, հատուկ բժշկական ծառայության համար նախատեսված մեքենաները:

Ներկայումս Կառավարությունում քննարկվում մինչև 4 տարեկան ավտոմեքենաներն իրավաբանական անձանց համար ավելացված արժեքի հարկից ժամանակավորապես ազատելու օրենսդրական նախաձեռնությունը:

Էջանիշ

Պատճենել հղումը

Email

Տպել

Twitter

VK

Telegram