Հունվարի 1-ից ԵԱՏՄ տարածք ներկրվող անձնական իրերի վերաբերյալ փոփոխություններ են լինելու

ՀՀ Պետական եկամուտների կոմիտեն հայտարարություն է տարածել՝ տեղեկացնելով, որ 2020թ. հունվարի 1-ից փոփոխություններ են տեղի ունենալու անձնական օգտագործման ապրանքները փոխադրողի կողմից կամ միջազգային փոստային առաքանիներով Եվրասիական տնտեսական միության (ԵԱՏՄ) մաքսային տարածք ներմուծելու կարգում:

0 հարկ, 0 մաքսատուրք, եթե իսկապես «անձնական» է

Փոփոխությունը ենթադրում է, որ հարկման չափը կլինի 0, եթե ընդհանուր արժեքը չի գերազանցում 200 եվրոն և (կամ) քաշը չի գերազանցում 31 կգ-ը: Այստեղ պետք է ուշադրություն հրավիրել այն հանգամանքի վրա, որ խոսքը բացառապես անձնական օգտագործման ապրանքների մասին է:

2014թ. դեկտեմբերի 17-ի «Մաքսային կարգավորման մասին» թիվ 241-Ն ՀՀ օրենքի 249-րդ հոդվածի 6-րդ մասի համաձայն`ՀՀ-ում օրենքով սահմանված կարգով անհատ ձեռնարկատեր չհանդիսացող ֆիզիկական անձանց կողմից ապրանքների ներմուծումը դիտարկվում է որպես ձեռնարկատիրական գործունեության նպատակով իրականացվող ներմուծում, եթե ֆիզանձանց կողմից ՀՀ ներմուծվող ապրանքների չափաքանակները (այդ թվում` ըստ Միության անդամ հանդիսացող կամ չհանդիսացող երկրների) գերազանցում են ՀՀ կառավարության սահմանած` ներմուծվող ապրանքների ակնհայտ առևտրային չափաքանակները:

Այդ չափաքանակների ամբողջական ցանկին կարող եք ծանոթանալ հետևյալ հղումով: Բայց առանձնացնենք դրանցից մի քանիսը.

Կենդանի կենդանիներ՝ 3 հատ.
Ուտելի մրգեր և ընկույզներ, ցիտրուսային մշակաբույսերի և սեխի կեղևներ և կճեպներ՝ 50 կգ յուրաքանչյուր տեսակից.
Շաքար՝ 50 կգ.
Ծխախոտ և ծխախոտի արդյունաբերական փոխարինողներ՝ 1 կգ.
Բենզին և դիզվառելիք՝ 10 լիտր.
Հագուստի իրեր և պարագաներ, բացի մեքենայագործ կամ ձեռագործ տրիկոտաժեղենից՝ 12 հատ` յուրաքանչյուրից, բայց 24 հատից ոչ ավելի:

15%՝ գերազանցող մասի համար

Եթե ընդհանուր քաշը գերազանցում է 31 կիլոգրամը կամ արժեքը 200 եվրոյից բարձր է, ապա գերազանցող մասի համար պետք է վճարվի մաքսատուրք և հարկ՝ 15% միասնական դրույքաչափով, բայց ոչ պակաս, քան 31 կիլոգրամը գերազանցող յուրաքանչյուր կգ-ի համար 2 եվրոյին համարժեք ՀՀ դրամը:

ՊԵԿ-ը հայտնում է, որ փոփոխությամբ պայմանավորված` մաքսային մարմինները կուժեղացնեն ապրանքների իրական արժեքը պարզելուն ուղղված հսկողությունը: Հավելենք, որ հունվարի 1-ից կատարվող փոփոխությունները նախատեսված են Եվրասիական տնտեսական հանձնաժողովի խորհրդի 2017թ. դեկտեմբերի 20-ի թիվ 107 որոշմամբ:

Ժամկետների մասին

Կատարվող փոփոխության համաձայն՝ 2020թ. հունվարի 1-ից կվերացվեն նաև առանց մաքսատուրքերի և հարկերի վճարման ֆիզիկական անձանց կողմից փոխադրողի միջոցով կամ միջազգային փոստային առաքումներով ՀՀ ներմուծվող անձնական օգտագործման ապրանքների հաճախականության սահմանափակումները:

Մինչև հունվարի 1-ը մեկ ֆիզիկական անձի հասցեով 1 օրացույցային ամսվա ընթացքում 500 եվրոյին համարժեք գումարը և 31 կգ-ը գերազանցելու դեպքում էին սահմանվում վճարներ: Հունվարի 1-ից հաճախականության այդ սահմանափակումը վերացվում է: Խոսքն ինչպես փոխադրողի կողմից, այնպես էլ փոստային առաքանիներով ուղարկվող անձնական օգտագործման ապրանքներին է վերաբերում:

ԱԺ պատգամավոր, Տարածաշրջանային և եվրասիական ինտեգրման հարցերի մշտական հանձնաժողովի անդամ Վահե Հովհաննիսյանն իր ֆեյսբուքյան էջում նույնպես անդրադարձել է սահմանափակման վերաբերյալ փոփոխությանը՝ նշելով, որ քաղաքացին կարող է նույնիսկ ամեն օր օգտվել կարգից՝ նախկին մեկ ամսվա սահմանափակման փոխարեն: Պարզապես դա չպետք է կրի խախտման բնույթ, հակառակ դեպքում ՊԵԿ-ի կողմից կարող է իրականացվել անձնական օգտագործման ապրանքի իսկությունը պարզելուն ուղղված միջոցառում:

Նշենք նաև, որ անհրաժեշտ է պահպանել վերը նշված՝ ակնհայտ առևտրային չափաքանակների մասին կարգավորման դրույթները:

Իսկ ի՞նչ կարգ է գործում մինչև հունվարի 1-ը

Եվրասիական տնտեսական հանձնաժողովի խորհրդի 2017թ. դեկտեմբերի 20-ի թիվ 107 որոշման համաձայն՝ մինչև 2019թ. դեկտեմբերի 31-ը ներառյալ անձնական օգտագործման ապրանքները (բացառությամբ էթիլ սպիրտի, ալկոհոլային խմիչքների, գարեջրի, անձնական օգտագործման չմասնատվող ապրանքների) փոխադրողի կողմից ԵԱՏՄ մաքսային տարածք առաքելու դեպքում, եթե արժեքը գերազանցում է 500 եվրոյին համարժեք գումարը, և (կամ) քաշը 1 օրացուցային ամսվա ընթացքում գերազանցում է 31 կգ-ը, ապա մաքսատուրքերի և հարկերի միասնական դրույթաչափը կազմում է արժեքի 30%-ը, բայց 4 եվրոյից ոչ պակաս՝ 1 կգ քաշի համար՝ արժեքային և (կամ) քաշային նորմերի գերազանցման մասով: