Ռուսաստանն Ադրբեջանում թուրքական ռազմաբազայի տեղակայմանն ուղիղ չի արձագանքի. Լեպեխին
ԵԱՏՄ ինստիտուտի տնօրենի խոսքով` Մոսկվան չունի Կովկասի և Կենտրոնական Ասիայի դեմ թուրքական վտանգավոր էքսպանսիային դիմագրավելու հստակ և խիստ դիրքորոշում:
ԵԱՏՄ ինստիտուտի տնօրեն Վլադիմիր Լեպեխինը համոզված է, որ Ադրբեջանում թուրքական ռազմաբազա հայտնվելու է: Քաղաքագետի խոսքով` թյուրքական, այդ թվում` հետխորհրդային տարածքի պետությունների կոնսոլիդացման քաղաքականություն վարող Թուրքիայի համար կարևոր է Կենտրոնական Ասիայում, Կովկասում, ինչպես նաև Հյուսիսային Կովկասում իր ազդեցության մեծացումը:
Սակայն Լեպեխինը կարծում է, թե Ռուսաստանն Ադրբեջանում թուրքական ռազմաբազայի տեղակայմանն ուղիղ չի արձագանքի: Ցավով նշում է, որ Մոսկվայում մշակված չէ թուրքական էքսպանսիային դիմակայելու հստակ ծրագիր: Ընդհակառակը, Ռուսաստանը Թուրքիայի նկատմամբ չհամաձայնեցված ու անհասկանալի գործողությունների է դիմում:
Քաղաքագետը դա պայմանավորում է համատեղ տնտեսական հետաքրքրություններով (գազատարներ, ատոմակայանի կառուցում և այլն): Թուրքական կորպորացիաների ազդեցությունը Ռուսաստանում, Լեպեխինի խոսքով, հանգեցնում է նրան, որ Մոսկվան չունի Կովկասի և Կենտրոնական Ասիայի դեմ թուրքական վտանգավոր էքսպանսիային դիմագրավելու հստակ և խիստ դիրքորոշում:
Պատմաբան Վլադիմիր Ռոժանսկին նույնպես անդրադարձել էր այս թեմային` նշելով, որ Հայաստանին վերաբերող հարցերում Ռուսաստանը զիջումների է գնում հօգուտ Թուրքիայի, սակայն վերջինը, նրա խոսքով, շատ վտանգավոր թշնամի է:
Մեկնաբանությունները