Առաջին ծնունդն է գրանցվել մայրիկից, ում մոտ կորոնավիրուս էր հաստատվել

Հայաստանում ապրիլի 17-ի ժամը 11:00-ի դրությամբ հաստատվել է կորոնավիրուսով վարակվածության 42 նոր դեպք: Մահացության 1 նոր դեպք է գրանցվել, առողջացել են 44-ը: Նորածինը և նրա մայրիկն իրենց լավ են զգում. երեխան այսօր կթեստավորվի:

Նորություններ

# COVID-19

# երեխաներ

# Հայաստան

Կորոնավիրուսով վարակված մայրը երեխա է ունեցել / © Արսեն Թորոսյան / Հեղինակ՝ անհայտ, լուսանկարը տրամադրել է օգտատերը

Covid-19 կորոնավիրուսով վարակվածների թիվը Հայաստանում հասել է 1201-ի՝ վերջին օրվա ընթացքում ավելանալով 42-ով: ՀՀ Առողջապահության նախարարության Հիվանդությունների վերահսկման և կանխարգելման ազգային կենտրոնի հաղորդմամբ՝ մեկ օրում առողջացել է 44 մարդ: Փաստացի բուժում է ստանում 780 պացիենտ:

Նախորդ օրն իրականացվել է աննախադեպ թվով թեստավորում՝ 1161: Ընդհանուր առմամբ թեստավորվել է 10793 մարդ:

Մահվան 1 նոր դեպք է գրանցվել. «Սուրբ Գրիգոր Լուսավորիչ» բժշկական կենտրոնում մահացած 58-ամյա պացիենտն ունեցել է կորոնավիրուսային հիվանդություն, հաստատված երկկողմանի սուբտոտալ թոքաբորբ։ Տղամարդն ունեցել է նաև ուղեկցող խրոնիկ հիվանդություններ` սրտի իշեմիկ հիվանդություն, զարկերակային գերճնշում III աստիճանի, ճարպակալում II-III աստիճանի: Բուժման ընթացքում ախտորոշվել է սրտամկանի սուր ինֆարկտ` ST էլևացիայով:

https://www.facebook.com/alina.nikoghosyan/posts/2507889805979464

Ինչպես հաղորդվում է, ապրիլի 8-ին կատարվել է կորոնար զարկերակի ստենտավորում, որից հետո պացիենտի մոտ զարգացել է դիսթրես համախտանիշ, սուր շնչական անբավարարություն III աստիճանի, սեպսիս, սեպտիկ շոկ: Երկարատև թոքային արհեստական շնչառությունից հետո զարգացել է հարաճուն պոլիօրգանային անբավարարություն: Մահացությունների ընդհանուր թիվը Հայաստանում, այսպիսով, դարձավ 19:

Նախարար Արսեն Թորոսյանը հայտնել է, որ երեկ առաջին ծնունդն է գրանցվել մայրիկից, ում մոտ կորոնավիրուսի թեստը դրական է եղել: Նրա խոսքով, շնորհիվ մեր բժիշկների պրոֆեսիոնալիզմի, թե՛ երեխան, թե՛ մայրը իրենց լավ են զգում:

https://www.facebook.com/ATorosyanOfficial/posts/1201043396748590

Թորոսյանը նշել է, որ ծննդաբերությունից հետո դրված թեստը ծննդկանի մոտ տվել է բացասական արդյունք, իսկ երեխան կթեստավորվի այսօր: Նրանք դեռ 14 օր կգտնվեն բժշկական հսկողության տակ:

Վրիպա՞կ գտաք։ Նշեք հատվածը և սեղմեք Ctrl + Enter։