Հատուկ ջոկատայինները խուզարկում են Ռուբեն Հայրապետյանի բնակարանն ու շինությունները. ԶԼՄ

Մամուլում տարածված տեղեկությունների համաձայն՝ Ոստիկանության հատուկ ջոկատայինները 6-րդ վարչության աշխատակիցների հետ խուզարկություն են իրականացնում Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի բնակարանում: Հաղորդվում է, որ խուզարկվում են նաև նրա անվան հետ կապվող մի քանի շինություններում:

Կային տեղեկություններ, որ ՀՖՖ նախկին նախագահը «Զարգացման հայկական բանկի» և «Զեյթունի կահույքի ֆաբրիկա» ԲԲԸ-ի փաստացի սեփականատերն է։ Հաղորդվում է, որ 2012-2018 թթ., զբաղեցնելով ՀՖՖ նախագահի պաշտոնը, Հայաստանի մի քանի քաղաքներում կազմակերպել է ֆուտբոլի մարզադաշտերի ու մարզադպրոցների կառուցման ու վերանորոգման աշխատանքներ: Հայրապետյանը չի կատարել կամ մասնակի է կատարել պայմանագրերով նախատեսված պարտավորությունները՝ յուրացնելով առանձնապես խոշոր չափերի գումարներ:

Բացի այդ, ավելի վաղ տեղեկություն էր հրապարակվել, որ Ֆեդերացիան Ռուբեն Հայրապետյանի նախագահության տարիներին միլիոնավոր դոլարների շինարարության պայմանագրեր էր կնքել հենց նրան պատկանող ընկերոթյունների հետ: Ավելի վաղ նաև հաղորդվել էր, որ Ոստիկանությունը ՀՖՖ նախկին նախագահին պատկանող բիզնեսների վերաբերյալ օպերատիվ տեղեկություններ էր ստացել, նյութեր էին նախապատրաստվում։