Հայաստանում Covid-19-ով վարակվածների թիվն ավելացել է 40-ով (upd.)

ՀՀ Առողջապահության նախարարության Հիվանդությունների վերահսկման և կանխարգելման ազգային կենտրոնի հաղորդմամբ՝ Հայաստանում կորոնավիրուսով վարակվածների թիվն ապրիլի 9-ի ժամը 11:00-ի դրությամբ հասել է 921-ի: Մահացության նոր դեպք է գրանցվել՝ հասնելով 10-ի: Առողջացածների թիվը հասել է 138-ի՝ ավելանալով 24-ով:

Հաղորդվել է, որ վարակվածության նոր դեպքերից 12-ը հնարավոր է՝ նախկինում չհաշվառված լինել, և արձանագրված լինեն հաշվառման համակարգի թվայնացման արդյունքում: Այսինքն՝ փաստացի մեկ օրվա ընթացքում, ըստ վարչապետի, վարակվածների թիվն ավելացել է 28-ով:

Մահացածն 80-ամյա պացիենտ էր, ունեցել է կորոնավիրուսային հիվանդություն, ծանր աստիճանի թոքաբորբ՝ բարդացած թոքերի ռեսպիրատոր դիստրես համախտանիշով։ Տղամարդն ունեցել է ուղեկցող խրոնիկ հիվանդություններ, այդ թվում՝զարկերակային հիպերտենզիա, կախեքսիա ,ծերունական սկլերոզ։

Գիշերը Երևանում վայրէջք է կատարել պարետատան նախաձեռնած հատուկ չվերթով Չինաստանից Հայաստան տեղափոխվող ՀՀ պետական միջոցների հաշվին ձեռքբերված, Չինաստանի պետական մարմինների, ինչպես նաև հայ և չինացի բարերարների կողմից նվիրաբերած բժշկական պարագաների և սարքավորումների խմբաքանակը:

Հայաստան առաքվող պարագաների փաթեթավորման վրա նշված է. «Թո մեր բարեկամությունն ավելի երկար լինի, քան Յանցզի գետը, և ավելի բարձր, քան Արարատ լեռը»:

UPD. Առողջապահության նախարարը հայտնել է, որ Հայաստանում կորոնավիրուսով վարակվածության դեպքերի կրկնապատկման ցիկլը մոտենում է 10 օրին: Այս տեմպը պահպանվելու դեպքում, ըստ նախարարի, ապրիլի 19-ին կունենանք մոտ 1.800 դեպք, իսկ ապրիլի 29-ին` 3600 դեպք:

Արսեն Թորոսյանը շեշտել է, որ այս փոքրիկ և հարաբերական «ձեռքբերումը» կարող է հօդս ցնդել, եթե մենք «թուլանանք» և կրկին վերադառնանք մեր առօրյա կյանքին` չպահպանելով հիվանդության տարածումը կանխող կանոնները:

Էջանիշ

Պատճենել հղումը

Email

Տպել

Twitter

VK

Telegram