Հայաստանն ու արաբական երկրներն աստղագիտության ոլորտում կարող են համագործակցել
Արաբական Միացյալ Էմիրությունների դեսպանության գործերի ժամանակավոր հավատարմատարն ու Աստղադիտարանի տնօրենը խոսել են Միջազգային աստղագիտական միության տարածաշրջանային կենտրոնի (Բյուրական) և արաբական երկրների միջև համագործակցության ձևերի մասին, ընդգծել են գիտության կարևորությունը թե՛ ԱՄԷ-ի, և թե՛ Հայաստանի առաջիկա զարգացման համար։
Հայաստանում Արաբական Միացյալ Էմիրությունների (ԱՄԷ) դեսպանության գործերի ժամանակավոր հավատարմատար Ահլամ Ռաշիդ Ալ Սալամին պաշտոնական այցով հյուրընկալվել է ՀՀ ԳԱԱ Վիկտոր Համբարձումյանի անվան Բյուրականի աստղադիտարանում:
Հաղորդվում է, որ Արեգ Միքայելյանը ներկայացրել է հայկական աստղադիտարանի ներկայիս գործունեությունն ու կարգավիճակը, քննարկվել են համագործակցության հնարավորությունները:
Շեշտվել է, որ Բյուրականի աստղադիտարանը Միջազգային աստղագիտական միության տարածաշրջանային կենտրոնն է, ընդգծվել է ԱՄԷ-ի և Հայաստանի միջև գործընկերության հետագա խորացման հարցում գիտության զարգացման կարևորությունը և այդ համատեքստում քննարկվել են արաբական երկրների և Բյուրականի աստղադիտարանի միջև համագործակցության հնարավոր ձևերը:
Հանդիման ավարտին, ինչպես նշվում է, հյուրերը ճանաչողական այց են ունեցել աստղադիտարանի տարածքում՝ այցելելով Վիկտոր Համբարձումյանի տուն-թանգարան և 2,6մ հայելու տրամագծով աստղադիտակ: ԱՄԷ դեսպանության գործերի ժամանակավոր հավատարմատարը նաև գրառում է կատարել հատուկ հյուրերի գրանցամատյանում։
Մեկնաբանությունները