Իրանից Հայաստան վերադարձած քաղաքացու մոտ կորոնավիրուս է հայտնաբերվել

Նիկոլ Փաշինյանը նշել է, որ պացիենտը ՀՀ քաղաքացի է, 29 տարեկան: Նա կնոջ հետ օդանավով Թեհրանից փետրվարի 28-ին է ժամանել Երևան: Նախարար Արսեն Թորոսյանն այդ կապակցությամբ մամուլի ասուլիս է հրավիրել:

Վարչապետի խոսքով՝ պացիենտի հետ ռիսկային շփում ունեցած մարդիկ նույնպես կմեկուսացվեն, այդ թվում և՝ գրանցումն իրականացնող սահմանապահ ծառայության աշխատակիցը, քաղաքացուն տուն տեղափոխած տաքսու վարորդը:

Նիկոլ Փաշինյանը նշել է, որ վարակված քաղաքացու կնոջ մոտ թեստը բացասական արդյունք է ցույց տվել, այսինքն՝ կորոնավիրուս չի հայտնաբերվել:

Հայաստանում կորոնավիրուսով վարակվածության դեպքի գրանցման հետ կապված՝ Քաղաքացիական պայմանագիր կուսակցությունը որոշում է ընդունել չեղարկել Մարտի 1-ի զոհերի հիշատակին նվիրված երթը:

UPD. Թեև նախարար Արսեն Թորոսյանն իր մամուլի ասուլիսում նշել է, որ կորոնավիրուսի հետ կապված կարանտինի անհրաժեշտություն չկա, այնուամենայնիվ արդեն 32 հոգի Հայաստանում կարանտինի ներքո են:

Կարանտինի մեթոդը, ընդ որում, կիրառվում է ամբողջ աշխարհում: Օգտատերերը քննադատում են Առողջապահության նախարարին՝ Իրանից ժամանած քաղաքացիներին նույնիսկ այդ պահին նրանց մոտ կորոնավիրուս չհայտնաբերելու դեպքում, հաշվի առնելով ինկուբացիոն տևական շրջանը, կարանտինի ներքո չպահելու և նույնիսկ «ծանոթի մեքենայով տուն ճանապարհելու» համար:

Ասուլիսի ժամանակ լրագրողի հարցին ի պատասխան, սակայն, նախարարը պնդել է, որ այդ սկզբունքով առաջնորդվելու դեպքում կարիք կլինի բոլոր ուղևորներին մեկուսացնելու, ինչը հնարավոր չէ, և դրա անհրաժեշտությունն էլ չկա:

Էջանիշ

Պատճենել հղումը

Email

Տպել

Twitter

VK

Telegram