Ամերիկյան թոք-շոուի հաղորդավարը կիսվել է Քանաքեռավանի ուշագրավ դեպքի տեսագրությամբ
Էլլեն Դեջեներեսի հրապարակման շնորհիվ հայ երիտասարդի՝ վթարից փրկվելու տեսանյութն արդեն 6 միլիոնից ավելի դիտում ունի: Տեսանյութում երևում է, թե ինչպես է երիտասարդը փրկվում՝ ցատկելով իր վրա սահող մեքենայի շարժիչի ծածկոցին:
Instagram-ում մեծ տարածում է ստացել Կոտայքի մարզի Քանաքեռավան համայնքում արված տեսանյութը, որտեղ երիտասարդը ձնառատ եղանակին ճանապարհամերձ հատվածում մեքենան է վերանորոգում, իսկ հետևից մոտենում է սառույցի վրայով սահող մեքենան: Ընդամենը մի քանի սանտիմետր հեռավորության վրա նկատելով իր վրա եկող մեքենան՝ երիտասարդը ոչ միայն չի շփոթվել, այլ ցատկել է՝ նստելով մեքենայի շարժիչի ծածկոցի վրա:
Հայաստանում արված ուշագրավ տեսանյութն իր ինստագրամյան էջում է հրապարակել ամերիկացի հայտնի դերասանուհի և «The Ellen DeGeneres Show»-ի հեռուստահաղորդավարուհի Էլլեն Դեջեներեսը:
Ամերիկյան հեռուստատեսության նշանավոր հաղորդավարի, «Էմմիի» 11 մրցանակների արժանացած դերասանուհու հրապարակումը տեղադրումից ընդամենը մեկ ժամ հետո ունեցել է ավելի քան երկու միլիոն դիտում: 13 ժամ հետո դիտումների քանակն անցել է 6 միլիոնից:
Մեկնաբանությունները