La Stampa: Իտալիա ուղարկված ռուսական օգնության 80%-ը, պարզվել է, պիտանի չէ Covid-19-ի դեմ պայքարի համար

Տեղեկություն է տարածվել, որ նոր տեսակի կորոնավիրուսի դեմ պայքարի համար Ռուսաստանի կողմից Իտալիային տրամադրված աջակցության մեծ մասը, պարզվել է, պիտանի չէ:

Հաղորդվում է, որ 14 ինքնաթիռներով առաքված հիվանդության ախտորոշման և տարածքների ախտահանման միջոցների 80%-ը պիտանի չէ: Ինքնաթիռներով Իտալիա էին տեղափոխվել նաև համաճարակաբաններ՝ կորոնավիրուսի դեմ պայքարում իտալացի մասնագետներին օգնելու նպատակով:

Նշվում է, որ Ռուսաստանն այդ աջակցությամբ քաղաքական շահեր է հետապնդել: Իտալիայի վարչապետ Ջուզեպե Կոնտեն համաձայնվել է ընդունել առաջարկը՝ Մոսկվայի հետ անձնական հարաբերություններն ամրապնդելու նպատակով:

Դմիտրի Պեսկովը վստահեցրել է, որ Ռուսաստանն Իտալիայի առաջ ոչ մի պայման չի դրել: Մասնավորապես՝ հերքվել է այդ աջակցության դիմաց պատժամիջոցները չեղարկելու պայմանը:

ՌԴ նախագահի մամուլի քարտուղար Դմիտրի Պեսկովի խոսքով՝ տեղի ունեցածում որևէ պայմանավորվածության, հաշվարկների համ հույսերի մասին խոսք լինել չի կարող: Նա նշել է, որ Իտալիան իսկապես օգնության կարիք ունի, և Ռուսաստանը միայն օգնություն է առաքում:

Ռուսաստանն Իտալիային աջակցություն էր ուղարկել նախագահ Վլադիմիր Պուտինի և Իտալիայի վարչապետ Ջուզեպե Կոնտեի հեռախոսազրույցից հետո, որը տեղի էր ունեցել մարտի 21-ին: Մարտի 24-ին Իտալիա է ուղևորվել ռուսական 14 ինքնաթիռ՝ տեղափոխելով համաճարակաբանների, վիրուսագետների, ռազմաբժիշկների, ինչպես նաև կորոնավիրուսի դեմ պայքարի համար նախատեսված պարագաներ:

Իտալիան Covid-19-ով վարակվածության թվով (շուրջ 74 հազար) աշխարհում երկրորդն է. ամենաշատը վարակվել են Չինաստանում՝ 81 հազար: Իտալիան առաջին տեղում է մահացությունների թվով՝ մոտ 7,5 հազար՝ կրկնակի գերազանցելով Չինաստանում գրանցված մահացությունների թվին: Ամբողջ երկրում դադարեցվել են բոլոր տեսակի միջոցառումները, երկիրը հայտարարվել է «կարմիր գոտի»:

Էջանիշ

Պատճենել հղումը

Email

Տպել

Twitter

VK

Telegram