99-ամյա բրիտանացի վետերանը բժիշկների համար 5 մլն ֆունտ է հավաքել՝ տան շուրջը քայլելով
Թոմ Մուրը նախատեսել էր մինչև ապրիլի վերջը քայլել 100 շրջան և հավաքել 1000 ֆունտ, սակայն գերակատարել է թե՛ ժամկետը, թե՛ գումարի չափը:
99-ամյա անգլիացի վետերան Թոմ Մուրը դրամահավաքություն է նախաձեռնել Առողջապահության ազգային ծառայության (NHS) համար: Նա հայտարարել է, որ մինչև ապրիլի վերջն իր տան հետևում 100 շրջան քայլելու է, իսկ իրենց աջակցելու ցանկություն ունեցող մարդիկ կարող են գումար փոխանցել բուժաշխատողներին: Մեկուկես շաբաթվա ընթացքում վետերանը հավաքել է 5 միլիոն ֆունտ ստեռլինգ:
Թոմ Մուրն արդեն հավաքել է նախատեսածից 5 հազար անգամ շատ գումար
Երկրորդ համաշխարհային պատերազմի վետերան Թոմ Մուրը նախաձեռնության մասին հայտնել է ապրիլի 6-ին՝ ցանկանալով այն ավարտել մինչև իր ծննդյան օրը՝ ամսի 30-ը:
Մուրը նախատեսել էր հավաքել 1000 ֆունտ՝ մինչև ամսվա վերջ, բայց արդեն օրեր անց վետերանին փոխանցվել է 70 հազար ֆունտ: Ապրիլի 15-ին գումարը հասել է 5 միլիոնի:
Մուրն ապրիլի 16-ին կանցնի նախատեսված 100 շրջանը, բայց չի պատրաստվում կանգ առնել
Սկսած ապրիլի 6-ից՝ Մուրն ամեն օր տան հետևում քայլել է 10 շրջան (մոտ 25 մետր): Նպատակակետը 100 շրջանն էր, որը կլրանա ապրիլի 16-ին, բայց վետերանը չի պատրաստվում դադարեցնել ակցիան: Նրա խոսքով՝ հույս ունի նույնքան էլ անցնել մինչև ծննդյան օրը:
Այդ ընթացքում վետերանին աջակցել են ավելի քան 256 հազար մարդիկ՝ նվիրաբերելով ավելի քան 5 միլիոն ֆունտ ստեռլինգ: Գումարը փոխանցվում է NHS Charities Toghether բարեգործական հիմնադրամին:
«Բժիշկներն արժանի են այդ գումարի իրենց բաժնին»
Մուրը բժիշկներին համարել է խիզախներ՝ նշելով, որ նրանք պետք է իրենց բաժինն ստանան:
Նրա խոսքով՝ հավատալը դժվար է, բայց պետք է մտածել, թե ում համար է այս ամենը. խիզախ բուժանձնակազմի: Վետերանը հույս է հայտնել, որ դրամահավաքությունը կշարունակվի:
Թոմաս Մուրն ինժեներություն է սովորել, իսկ Երկրորդ համաշխարհայինին մեկնել է բանակ: Ստացել է կապիտանի կոչում, նրան հավաքագրել են սպայական պատրաստության:
Ծառայել է Հնդկաստանում և մասնակցել մարտերին, իսկ Ճապոնիայի կապիտուլյացիայից հետո գործուղվել Սումատրա, ապա վերադարձել Անգլիա և աշխատել ռազմադպրոցում:
Մեկնաբանությունները