Կոմ Օմբոյում կոկորդիլոսներին դարեր շարունակ զմռսել են նույն բաղադրատոմսով

Բրիտանական թանգարանի գիտնականներն ուսումնասիրել են յոթ կոկորդիլոսի մումիա՝ Հին Եգիպտոսի ուշ շրջանից մինչև հունահռոմեական ժամանակաշրջան։ Արդյունքները նոյեմբերի 11-ին հրապարակվել են Scientific Reports ամսագրում։

Թիմը գազային քրոմատագրման և զանգվածային սպեկտրաչափության միջոցով առանձնացրել ու նույնականացրել է զմռսման նյութերի պահպանված միացությունները։ Հետազոտողները քիմիական տվյալները համադրել են մումիաների ծագման վայրերի և ռադիոածխածնային թվագրման արդյունքների հետ։

Նմուշներում հայտնաբերվել են մեղրամոմ, սոճու խեժ կամ ձյութ և մայրու ձյութ։ Այդ նյութերը տարբեր համակցություններով են հանդիպել։ Նոր վերլուծության և նախկինում հրապարակված տվյալների համադրումը ցույց է տվել, որ Կոմ Օմբոյում նույն բաղադրատոմսն օգտագործել են մի քանի դար շարունակ։

Կոկորդիլոսները Հին Եգիպտոսում կապվում էին Սոբեկ աստծու պաշտամունքի հետ։ Որոշ կենդանիների համարում էին աստծու կենդանի մարմնավորում և մումիացնում բնական մահից հետո։ Մյուսների մումիաները որպես ընծա էին թողնում հատուկ թաղման համալիրներում։

Բրիտանական թանգարանը կենդանիների մումիաների ավելի լայն ուսումնասիրության շրջանակում կիրառում է նաև ռենտգենյան հետազոտություն և համակարգչային շերտագրություն։ Իսկ այս աշխատանքի հեղինակների համար յոթ մումիաների քիմիական վերլուծությունն ու ավելի վաղ հրապարակված տվյալները հիմք են տեղական ավանդույթի մասին խոսելու Կոմ Օմբոյի օրինակով։

Էջանիշ

Պատճենել հղումը

Email

Տպել

Twitter

VK

Telegram