Բոլորն «Արարատ-Արմենիայի» հաղթանակից են խոսում. ինչո՞ւ, ի՞նչ նշանակություն ունի և ի՞նչ է սպասվում

Պատմական հաղթանակից հետո Երևանի «Արարատ-Արմենիան» օգոստոսի 22-ին կմրցի Լյուքսեմբուրգի «Դյուդելանժ» ակումբի հետ, իսկ պատասխանը հանդիպումը կկայանա օգոստոսի 29-ին:

Սպորտ

# Արարատ-Արմենիա

# Եվրոպայի լիգա

# Հաղթանակներ

# ֆուտբոլ

Հաղթանակից հետո / @FCAraratArmenia / Հեղինակ՝ անհայտ, լուսանկարը տրամադրել է օգտատերը

Օգոստոսի 14-ին Թբիլիսիում տեղի ունեցավ Եվրոպայի լիգայի որակավորման 3-րդ փուլի «Սաբուրթալո – Արարատ-Արմենիա» հանդիպման պատասխան խաղը, որտեղ արձանագրված հաղթանակը մեծ ուրախություն պարգևեց ողջ հայությանը:

Ի՞նչ հաղթանակի մասին ենք խոսում

Եվրոպայի լիգայի որակավորման 3-րդ փուլում միմյանց դեմ մրցող վրացական «Սաբուրթալոն» և հայկական «Արարատ-Արմենիան»՝ երկու երկրների չեմպիոնները, Թբիլիսիում պատասխան հանդիպում ունեցան: Երևանում հայկական թիմի 2:1 հաշվով պարտությունից հետո օգոստոսի 14-ին Վարդան Մինասյանի գլխավորած «Արարատ-Արմենիան» ընդհանուր 2:3 հաշվով հաղթեց մրցակցին՝ անցնելով Եվրոպայի լիգայի որակավորման 4-րդ փուլ:

10-րդ րոպեին խաղի հաշիվը բացել է ռուսաստանցի հարձակվող Անտոն Կոբյալկոն, իսկ 67-րդ րոպեին հայ կիսապաշտպան Պետրոս Ավետիսյանն իրացրել է 11 մետրանոց հարվածը:

Հայկական մյուս ակումբները՝ Ալաշկերտը և Բանանցը, չկարողացան հասնել այս հաղթանակին, իսկ Փյունիկի առաջընթացի հարցը կորոշվի այսօր երեկոյան՝ անգլիական Վուլվերհեմփթոնի հետ պատասխան հանդիպմամբ: Նշենք, որ հայկական ակումբը առաջին խաղում 4:0 հաշվով պարտվել էր մրցակցին:

Այս հաղթանակն ինչո՞վ է նշանակալից

Բացի այն, որ ընդամենը երկու տարի առաջ հիմնադրված հայկական թիմը հաղթանակ տոնեց Վրաստանի ֆուտբոլի առաջնության չեմպիոնի նկատմամբ, այս հաղթանակն ուներ նաև համազգային նշանակություն: Երևանի «Արարատ-Արմենիա» ֆուտբոլային ակումբը հայկական թիմերից առաջինն էր, որ հաղթահարեց Եվրոպայի լիգայի որակավորման 3-րդ փուլը և անցավ հաջորդ փուլ՝ play-off:

https://www.facebook.com/araratarmeniafc/posts/562049570998538

Հայաստանի պատմության մեջ սա առաջին դեպքն էր, որ հայկական ֆուտբոլային ակումբը պոտենցիալ հնարավորություն է ստանում մրցելու ՈՒԵՖԱ-յում:

2018թ. Թավշյա հեղափոխությունից հետո հայկական ֆուտբոլային կյանքում տեղի ունեցան լրջագույն փոփոխություններ՝ ֆեդերացիայի ղեկավարությունից մինչև մարզիչներ ու ֆուտբոլիստներ: Արդյունքում Հայաստանի հավաքականն ու ակումբները արձանագրեցին խաղերի որակական փոփոխություններ:

Եվրոպայի լիգայում գրանցված հաջողությունը համացանցում կապվում է օգոստոսի 5-ին Ստեփանակերտում Նիկոլ Փաշինյանի արած հայտարարության իրագործման հավանականության հետ: Վարչապետն ինքն էլ այս մասին գրառում է արել:

https://www.facebook.com/nikol.pashinyan/posts/2383528128634235

Ի՞նչ սպասենք հաջորդիվ

Եվրոպայի լիգայի որակավորման 4-րդ փուլում՝ Play-Off-ում, Երևանի «Արարատ-Արմենիան» կմրցի Լյուքսեմբուրգի «Դյուդելանժ» ակումբի հետ: Առաջին հանդիպումը տեղի կունենա օգոստոսի 22-ին, իսկ պատասխանը՝ օգոստոսի 29-ին: Նշենք, որ «Դյուդելանժը» որակավորման 3-րդ փուլում երկու խաղերում էլ հաղթել է էստոնական «Նիմ Կալյուին»:

Այնուհետև տեղի է ունենալու Եվրոպայի լիգայի խմբային փուլի վիճակահանությունը: Այն կկայանա Մոնակոյում՝ օգոստոսի 30-ին:

Ե՞րբ է Խմբային մրցաշարը

Եվրոպայի լիգայի խմբային մրցաշարը կմեկնարկի սեպտեմբերի 19-ին՝ առաջին տուրի հանդիպմամբ: Մինչև դեկտեմբերի կեսերը կկայանան խմբային հանդիպումները, իսկ արդեն դեկտեմբերից մինչև 2020թ. մայիս ամիսը տեղի կունենան եզրափակիչ՝ 1/16, 1/8, 1/4 և 1/2 խաղերը: Ամենավերջին՝ եզրափակիչ խաղը կկայանա մայիսի 27-ին՝ Գդանսկի մարզադաշտում, որտեղ էլ կորոշվի Եվրոպայի լիգայի հաղթողը:

«Արսենալը» կգա՞ Հայաստան

ԵԼ խմբային մրցաշարում է նաև անգլիական «Արսենալը»: Վերջինս մեզ համար հետաքրքրություն է ներկայացնում հիմնականում նրանով, որ կիսապաշտպանը մեր հայրենակից Հենրիխ Մխիթարյանն է:

Եթե «Արարատ-Արմենիան» հաղթահարի նաև Play-Off-ը՝ հաղթելով լյուքսեմբուրգյան թիմին, ապա օգոստոսի 30-ին՝ Մոնակոյում կայանալիք վիճականությամբ նույն խմբում հայտնվելու դեպքում խմբային մրցաշարում միմյանց հետ կմրցեն Երևանի և Լոնդոնի ակումբները: Այս դեպքում «Արսենալը» «Արարատի» հետ կխաղա նաև Երևանում:

Վրիպա՞կ գտաք։ Նշեք հատվածը և սեղմեք Ctrl + Enter։