Ինչի՞ են դրդում Հայաստանին. Երևանը սկսել է պատասխանել

Հայաստանի սահմաններին կրակոցները, ինչպես ընդգծվում է, դարձել են սովորական. համարվում է, որ Մոսկվան ու Բաքուն փորձում են այդպիսով Երևանին «ստիպել» իրենց հաճո փաստաթղթեր ստորագրել: Հայկական ստորագրությունը որոշիչ դերակատարում ունի, դրա բացակայությունը լիովին խափանում է Լավրովի` շուրջ մեկ տասնամյակ նախապատրաստված ծրագրի իմաստը:

Մոսկվան և Բաքուն, ինչպես նշվում է, չեն կարող խոստովանել, որ ապարդյուն են փամփուշտներ կիրառել և տասնյակ հազարավոր մարդկանց սպանել: Արդեն 9 ամիս է, ինչ Պուտինն ու Ալիևը սպասում են Երևանի որոշմանը` Հայաստանին փոխանցելով իրենց ծրագրերը. Ալիևը` «խաղաղության պայմանագրի» ծրագիրը, իսկ Պուտինը` քարտեզներ, որտեղ գծված են Հայաստանի նոր սահմանները: Շեշտվում է, որ Երևանի ստորագրությունը կորզելու նպատակով կրակում են Սոթքում, Երասխում, Սև լճի շրջանում, գերեվարում են հովիվների ու մոլորված զինվորականների:

Երասխում և Քաշաթաղում հայկական կողմը երկարատև ընդմիջումից հետո առաջին անգամ պատասխանեց: Պաշտոնական տվյալներով` հակառակորդի անօդաչուին թույլ չի տրվել ներթափանցել Հայաստանի օդային տարածք` կիրառելով ՀՕՊ համակարգ, իսկ Քաշաթաղում թշնամին ենթասպայի մահվան մասին է հայտարարել:

Հայկական կողմը օգնության պաշտոնական մերժում է ստացել ՀԱՊԿ-ից ու Ռուսաստանից, ինչից հետո Երևանը, ինչպես ընդգծվում է, լիիրավ է չհետևել ռուսական կողմի` չկրակելու «խորհուրդ-պնդումներին»: Հայաստանի ռուսամետ փորձագետները «խորհրդատվությունները» բացատրում են նրանով, որ Երևանը չպետք է Մոսկվային դնի այնպիսի իրավիճակում, որ նա ստիպված լինի կրակել Ադրբեջանի ուղղությամբ:

Շեշտվում է, որ ռուսները կտրուկ հրաժարվում են աջակցություն ցուցաբերել` «խորհուրդ տալով չկրակել» և արգելելով դիմել ՄԱԿ Անվտանգության խորհուրդ և այլ ուժային կենտրոնների: Համարվում է, որ Երևանն այս պարագայում երեք տարբերակ ունի` հրաժարվել ռուսների հետ դաշինքից, անցնել ինքնապաշտպանության և դիմել ՄԱԿ-ին և ուժային այլ կենտրոնների:

Վերջին տարբերակը, ինչպես համարվում է, կարող է «մահացու» լինել թշնամու համար, որի միակ նպատակը Հայաստանին ռուսական օղակում պահելն է: Բաքվի և Մոսկվայի կողմից առաջարկված ծրագրերում խոսք չկա տարածաշրջանի խաղաղ զարգացման` հաղորդակցության ուղիների ապաշրջափակման և սահմանների բացման վերաբերյալ: Ընդհակառակը, նոյեմբերի 9-ի հայտարարությունից հետո փակվել է Վարդենիս-Մարտակերտ ավտոճանապարհը: Շեշտվում է, որ առաջարկված փաստաթղթերում Հայաստանի մասնատման ծրագիրն է:

Ռուսաստանը, ինչպես նշվում է, հասկանալով Հայաստանին զսպելու անկարողությունը, գիտակցաբար կամ հարկադրված, Երևանին դրդում է կայացնելու ինքնիշխան որոշումներ:

Էջանիշ

Պատճենել հղումը

Email

Տպել

Twitter

VK

Telegram