52 միավոր F-35 կործանիչներ դուրս են եկել «փղային զբոսանքի»
Այս իրադարձությունն արդեն անվանել են «փղային զբոսանքների մայր»: Փորձագետներն այս լայնածավալ զորավարժությունը կապում են ԱՄՆ-Իրան հակամարտության հետ:
388-րդ և 419-րդ կործանիչ ավիագնդերը (թևեր) վերջին տարիների ամենազանգվածային վարժանքներն են իրականացրել F-35-ների մասնակցությամբ: Յուտա նահանգի Հիլլ ավիաբազայում զորավարժանքին ներգրավվել է 52 միավոր F-35A կործանիչ:
Նմանատիպ վարժանքներն անվանում են «փղային զբոսանքներ»: Դրանք ներառում են նշանակալից քանակությամբ ինքնաթիռների կառավարում. այն անհրաժեշտ է իրական ռազմական պայմանների համար:
Որպես կանոն, այսպիսի դրվագներից յուրաքանչյուրը գրավում է ԶԼՄ-ների ուշադրությունը և դառնում ավիացիայի սիրահարների քննարկման թեմա:
«Փղային զբոսանքը» մեծ հմտություն է պահանջում ինչպես օդաչուներից ու տեխնիկներից, այնպես էլ հրամկազմից: Ինքնաթիռների համար հնարավոր հանձնարարություն կարող է լինել հակառակորդի հակաօդային պաշտպանության ճեղքումը:
Հարկ է նշել, որ փորձագետներն այս վարժանքները կապում են ամերիկաիրանական հակամարտության վերջին օրերի լարվածության հետ: Նրանց կարծիքով՝ սա Իրանի վերգետնյա օբյեկտները և ենթակառուցվածքները խոցելու պատրաստականության ցուցադրություն է:
Իրանական ռազմաօդային ուժերը սահմանափակ քանակությամբ տեխնիկա ունեն. դրանք հիմնականում հին ինքնաթիռներ են: Մի մասը կառուցված է ԱՄՆ-ում, իսկ «իրանականներն» ամերիկյան Northrop F-5 Freedom Fighter հին մոդելների մոդեռնիզացված տարբերակներն են:
Աղբյուրի հիշեցմամբ՝ 2019թ. Միացյալ Նահանգները «փղային զբոսանքի» էին հանել F-22 կործանիչները: Այդ ժամանակ զինվորականները թռիչքի էին պատրաստել միաժամանակ 24 միավոր F-22 կործանիչ, հեռահար ռադիոտեղորոշման հայտնաբերման E-3 Sentry ինքնաթիռ, ինչպես նաև ռազմավարական ռազմատրանսպորտային C-17 Globemaster III:
Նախորդ տարի «փղային զբոսանքն» իրականացրել է նաև Ծովային հետևակի կորպուսը: Դրան մասնակցել են երկու տասնյակ ուղղահայաց թռիչքի և վայրէջքի F-35B կործանիչներ:
5-րդ սերնդի F-35 կործանիչները կարելի է առանց չափազանցացնելու անվանել ԱՄՆ-ի ամենակարևոր ռազմական ինքնաթիռները: Ապագայում դրանք դառնալու են ՌՕՈւ-ի հիմքը, ինչպես նաև էականորեն կմեծացնեն ՌԾՈւ-ի և Ծովային հետևակի հնարավորությունները (կարելի է ասել՝ արդեն մեծացրել են): Ինքնաթիռներն արտադրող Lockheed Martin կորպորացիան իր հերթին ռեկորդակիր է. 2019թ. օրացույցային տարում այն արտադրել և պատվիրատուներին է մատակարարել 134 միավոր F-35 կործանիչ:
Այդ զինատեսակի թիվը ներկայումս հաշվվում է մոտ 500: ԱՄՆ-ն ընդհանուր նախատեսում է արտադրել ավելի քան 3 հազար միավոր այդպիսի կործանիչ՝ ինչպես իր Զինուժի, այնպես էլ դաշնակիցների համար:
Մեկնաբանությունները