Հայաստանում բնակիչների համար անվտանգ է՝ ինչպես Շվեյցարիայում

Հանրային կարծիքի Gallup ամերիկյան ինստիտուտի «Օրենք և կարգուկանոն 2019» (Law and Order Index 2019) զեկույցում Հայաստանն ընդգրկվել է բնակչության համար անվտանգ երկրների լավագույն 7-յակում:

Countries/Areas Most Likely to Feel Safe հարցումների համաձայն՝ հայաստանցի մասնակիցների 89%-ը պատասխանել է, որ իրեն անվտանգ է զգում: Ուշագրավ է, որ Շվեյցարիայում նույնպես այդպիսի ցուցանիշ է արձանագրվել: Վարկանիշային աղյուսակը գլխավորում է Սինգապուրը, որտեղ իրենց անվտանգ են զգում բնակիչների 94%-ը:

Մասնակիցները նաև գնահատել են անվտանգության մակարդակը: Մասնավորապես՝ նրանք պատասխանել են, թե ինչքանով են անվտանգ զգում իրենց գիշերը, միայնակ քայլելիս, որքանով են վստահում տեղի ոստիկանական ուժերին, նրանցից գողացվել են գումար կամ գույք, ենթարկվել են հարձակման վերջին 12 ամսում:

Անվտանգության վիճակագրությունում Հայաստանը վաստակել է 85 միավոր՝ 11-րդ հորիզոնականը կիսելով Ֆրանսիայի, Իռլանդիայի, Ճապոնիայի, Շվեդիայի, Մյանմայի և Սաուդյան Արաբիայի հետ: Առաջին եռյակում Սինգապուրն է՝ 97 միավորով, Տաջիկստանը՝ 94, և Միացյալ Արաբական Էմիրությունները՝ 93 միավորով: Ցանկը եզրափակում են Աֆղանստանը՝ 38 միավորով, Վենեսուելան՝ 49 միավորով և Գաբոնը՝ 53 միավորով:

Անվտանգության ցուցանիշով Հայաստանը զիջում է Վրաստանին (86 միավոր) և Ադրբեջանին (90 միավոր), սակայն շրջանցում է Իրանին (80 միավոր), Թուրքիային (76 միավոր) և Ռուսաստանին (72 միավոր): Ընդհանուր առմամբ՝ հարցմանը մասնակցել է 152 հազար մեծահասակ՝ 142 երկրից:

Էջանիշ

Պատճենել հղումը

Email

Տպել

Twitter

VK

Telegram