Ադրբեջանում 4 զինծառայող է ձերբակալվել՝ Արցախում հանցագործություններ կատարելու համար

Ձերբակալված ադրբեջանցի զինծառայողներն անարգել են Զանգելանում զոհված հայ զինծառայողների մարմինները, Մարտունու շրջանում կոտրել են գերեզմանաքարերը, նկարել վանդալիզմի դրսևորումները և տեղադրել սոցցանցերում: Ադրբեջանի գլխավոր դատախազությունը «ցավ է հայտնել նման դեպքերի համար»:

Նորություններ

# Ադրբեջան

# Զինծառայողներ

# Հանցագործություններ

Ակնա (Աղդամ) / © Sergei Grits, AP / Հեղինակ՝ անհայտ, լուսանկարը տրամադրել է օգտատերը

Ադրբեջանի գլխավոր դատախազությունը հայտարարել է, որ չորս զինծառայող է ձերբակալվել, ովքեր կասկածվում են արցախյան հակամարտության գոտում հանցագործություններ կատարելու մեջ:

Հաղորդվում է, որ ձերբակալված զինծառայողները կասկածվում են Զանգելանի շրջանում տեղի ունեցած մարտերի ընթացքում զոհված հայ զինծառայողների մարմիններն անարգելու մեջ: Բացի այդ՝ նրանք կասկածվում են իրենց գործողությունները հեռախոսով նկարահանելու և սոցցանցերում դրանք տարածելու մեջ:

Եվս երկու ադրբեջանցի զինծառայող կասկածվում են Խոջավենդի շրջանում (Մարտունի) հայկական գերեզմանոցում հուշաքարերը կոտրելու, վանդալիզմի դրսևորումները նկարահանելու և տեսանյութերը սոցցանցերում տարածելու մեջ:

Ադրբեջանի գլխավոր դատախազությունը հավելել է, որ վերջին 2 զինծառայողները նույնպես ձերբակալվել են:

Նշվում է, որ նմանատիպ դեպքերի վերաբերյալ տվյալներն ուսումնասիրել են Ադրբեջանի գլխավոր դատախազությունը և զինդատախազությունը: Միաժամանակ հայտարարվել է, որ սոցցանցերում տարածված որոշ տեսանյութերի իսկությունը կասկածի տակ է դրվել. դրանք համարվել են կեղծ:

Ադրբեջանական կողմը «ցավով նշել է, որ հոգեբանական ծանր վիճակի ազդեցության տակ, թշնամու դեմ պայքարի մեթոդները սխալ հասկանալով՝ որոշ զինծառայողները անօրինական գործողությունների են դիմել»:

Վրիպա՞կ գտաք։ Նշեք հատվածը և սեղմեք Ctrl + Enter։