Երգչուհին ընկել է բեմից, ոտքը կոտրել, բայց երգել է մինչև վերջ

Անաստասիա Վիշնևսկայան չի նկատել, որ բեմն ավարտվել է և 3 մետր բարձրությունից ընկել: Օգտատերերը կասկած են հայտնել, թե իրականում ֆոնոգրամա է եղել, քանի որ երգը չի ընդհատվել: Երգչուհին հերքել է այդ տեղեկությունը՝ նշելով, որ իսկապես երգել է մինչև վերջ:

Նորություններ

# Անաստասիա Վիշնևսկայա

# Արտասովոր երևույթներ

# Բեմեր

# երգիչներ

Անաստասիա Վիշնևսկայան կոտրել է ոտքը / ©Красноярские новости / Հեղինակ՝ անհայտ, լուսանկարը տրամադրել է օգտատերը

Մարտի 6-ին Կրասնոյարսկի ֆիլհարմոնիայում Կանանց միջազգային տոնին նվիրված համերգի ժամանակ Անաստասիա Վիշնևսկայան երգելիս փորձել է մոտենալ հանդիսատեսին, սակայն չնկատելով, որ բեմն ավարտվել է, ընկել է 3 մետր բարձրությունից՝ հայտնվելով նվագախմբի հարթակում, կոտրել է ոտքը, բայց համերգը չի ընդհատվել:

Տեսանյութում երևում է, թե ինչպես է երգչուհին ընկնում, որից հետո նրա ձայնը շարունակում է հնչել բարձրախոսներից: Երգի ավարտից հետո է միայն շտապօգնության բրիգադը նրան տեղափոխել հիվանդանոց: Ոտքի կոտրվածքից բացի՝ այլ վնասվածքներ են հայտնաբերվել:

https://youtu.be/y0NwLdbLHKY

Երգչուհին ընկել է բեմից / © Красноярские новости

Տեսանյութը հայտնվել է համացանցում և ակտիվորեն տարածվել: Օգտատերերից շատերը վստահ են, որ երգչուհին իրականում չի երգել. ձայնագիր (ֆոնոգրամա) է եղել, սակայն այդ պնդումը հերքվում է: Համերգը վարող Ռոման Բոգդանովը նշել է, որ Անաստասիա Վիշնևսկայան արտասովոր պրոֆեսիոնալիզմ է ցուցաբերել՝ այդ իրավիճակում ավարտին հասցնելով կատարումը:

Երգչուհին ինքն է հանդես եկել հայտարարությամբ՝ նշելով, որ չի նկատել փոսը, իսկ ընկնելուց հետո թեև ցավ զգացել է, բայց գիտակցել է, որ պետք է երգի ու պառկած դիրքում շարունակել է կատարումը: 30-ամյա Անաստասիան վստահեցրել է, որ չնայած անհավատալի է, բայց ինքն իսկապես երգել է մինչև վերջ:

Վրիպա՞կ գտաք։ Նշեք հատվածը և սեղմեք Ctrl + Enter։