Փաշինյանը հայտարարել է, որ Հայաստանը հետաքրքրված է Սու-30ՍՄ կործանիչների ձեռքբերմամբ

Վարչապետն ընդգծել է, որ Սու-30ՍՄ ինքնաթիռները ժամանակակից բազմաֆունկցիոնալ կործանիչներ են, և դրանց գնումը նախատեսված է ինչպես երկկողմ պայմանագրային փաստաթղթերով, այնպես էլ ազգային Զինված ուժերի զարգացման ծրագրով:

Նորություններ

# Կործանիչներ

# Հայաստան

# Նիկոլ Փաշինյան

# Ռուսաստան

Նիկոլ Փաշինյանը` Սու-30ՍՄ-ի վրա / © primeminister.am / Հեղինակ՝ անհայտ, լուսանկարը տրամադրել է օգտատերը

Ռուսական «Интерфакс»-ին տված հարցազրույցում ՀՀ վարչապետ Նիկոլ Փաշինյանը հայտարարել է, որ Հայաստանը հետաքրքրված է Սու-30ՍՄ կործանիչների և դրանց համար անհրաժեշտ սպառազինության ձեռքբերմամբ:

Նրա խոսքով` Հայաստանը կենտրոնացած է Ռուսաստանի Դաշնության հետ լայն և երկարաժամկետ ռազմատեխնիկական համագործակցության վրա, ինչը, ինչպես նշել է Փաշինյանը, բխում է երկու պետությունների երկարաժամկետ ռազմավարական շահերից:

Ռուսական լրատվամիջոցի լրագրողի հարցի ի պատասխան` Նիկոլ Փաշինյանը շեշտել է, որ Հայաստանը չափազանց շահագրգռված է Ռուսաստանից մատակարարումներով, որպեսզի ժամանակակից և, առաջին հերթին, Ռուսաստանի Դաշնության և ՀԱՊԿ-ի մյուս դաշնակիցների հետ համատեղելի զենք և զինամթերք ունենա:

Վարչապետի խոսքով` հայկական կողմը նաև հետաքրքրված է, որպեսզի Հայաստան զենքի և զինամթերքի մատակարարումն իրականացվի նույն կոմպլեկտավորմամբ, ինչպիսին Ռուսաստանի Դաշնության զինված ուժերի համար է:

Ինչ վերաբերում է Սու-30ՍՄ-ներին, ապա Փաշինյանն ընդգծել է, որ այդ ինքնաթիռները ժամանակակից բազմաֆունկցիոնալ կործանիչներ են, և դրանց գնումը նախատեսված է ինչպես երկկողմ պայմանագրային փաստաթղթերով, այնպես էլ ազգային Զինված ուժերի զարգացման ծրագրով:

Փաշինյանը նաև հիշեցրել է, որ Հայաստանի և Ռուսաստանի միջև գործում են երկկողմ միջպետական համաձայնագրեր, որոնց համապատասխան՝ ՀՀ տարածքում ստեղծվել և գործում են հայ-ռուսական երկու խմբավորումներ՝ ՀՀ ԶՈՒ և ՌԴ ԶՈՒ միացյալ խմբավորումը, Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգը, ինչպես նաև Հավաքական անվտանգության պայմանագրի կազմակերպության ձևաչափում ստեղծված հավաքական ուժերը և միավորված խմբավորումները:

Վրիպա՞կ գտաք։ Նշեք հատվածը և սեղմեք Ctrl + Enter։