Երկրպագուն հարձակվել է երգչուհու վրա` նկարում աչքերի անդրադարձի ու պատուհանից ընկնող լույսի միջոցով գտնելով նրա տունը
Սմարթֆոնների որակյալ տեսախցիկների դարաշրջանում նոր ֆոբիա է ի հայտ եկել. Ճապոնիայում երիտասարդը մանրամասն ուսումնասիրել է երգչուհու նկարը. մեծացնելով՝ բիբերի անդրադարձով գտել է երգչուհու բնակության վայրը:
Տարեցտարի սմարթֆոնների տեսախցիկները դառնում են ավելի լավը: Սակայն առօրյան սոցցանցերում տեղադրելն ունի նաև հակառակ ազդեցությունը. չարամիտները դրանց շնորհիվ տվյալներն են հավաքում՝ հավանական զոհերի հասցեները բացահայտելով: Եվ հաճախ նրանք հուշումների որոնումներն իրականացնում են շատ մանրակրկտորեն:
Սեպտեմբերի 1-ին երկրպագուն հարձակվել է հանրահայտ Tenshitsukinukeniyomi փոփ-խմբի մասնակցի՝ Էնա Մացուոկուի վրա: Երկրպագուն դարանել է Տոկիոյում գտնվող տան մոտ, երգչուհու բերանը փակել թաշկինակով և քարշ տվել մութ անկյուն: Աղջիկը դիմադրել է, վնասվածքներ ստացել: Հարձակվողը փախուստի է դիմել, բայց շուտով ոստիկանությունը ձերբակալել է նրան:
Պարզվել է՝ երկրպագուն 26-ամյա Հիբիկի Սատոն է: Վերջինս իրեն մեղավոր է ճանաչել և պատմել, թե ինչպես է հայտնաբերել 21-ամյա երգչուհու բնակավայրը, որի մասին տեղեկություն ոչ մի տեղ չի հաղորդվել: Պարզվել է՝ երիտասարդն օգտվել է Մացուոկայի սոցցանցերի նկարներից ու տեսանյութերից.
- Մանրամասն ուսումնասիրել է նրա սելֆիները՝ նկարները մեծացնելով և դիտելով բիբերի մեջ: Այդպիսով երկրպագուն տեսել է երկաթգծի կայարանը, որի մոտակայքում էլ երգչուհին բնակվել է:
- Օգտվել է Google Maps-ից և Google Street View-ից՝ ուսումնասիրելով տարածքի մի շարք բնակարաններ:
- Սատոն վստահեցրել է, որ ճշտել է տունը և նույնիսկ հարկը, որտեղ ապրում է Մացուոկան, ինչ անկյամբ է արված նկարը, որ պատուհանից է լույսն ընկնում: Այդ ամբողջ տեղեկությունը նա ստացել է երգչուհու սոցցանցերի նկարներից:
Ճապոնական ոստիկանությունը չի հստակեցրել, թե հանցագործին ինչ պատիժ է սպասվում: 2016թ. կառավարությունն օրենք է ընդունել օնլայն-հետապնդումների վերաբերյալ: Դա տեղի է ունեցել այն բանից հետո, երբ մեկ այլ երկրպագու դանակով հարձակվել է երգչուհի Մայու Տոմիտայի վրա: Ավելի ուշ պարզվել է, որ Տոմիտան բազմիցս է դիմել ոստիկանություն՝ գանգատվելով օնլայն-հետապնդումներից:
Մեկնաբանելով Մացուոկայի հետ տեղի ունեցած միջադեպը՝ ոստիկանությունից հաղորդել են, որ մարդիկ պետք է հասկանան, որ սոցցանցերում նկարներ և տեսանյութեր տարածելն առաջացնում է իրենց անձնական տվյալների բացահայտման վտանգ:
Մեկնաբանությունները