Իրանի ԱԳՆ-ն մերժել է Հայաստանի հետ սահմանի ցանկացած փոփոխություն
Իրանի ԱԳՆ ներկայացուցիչը հայտարարել է, որ Թեհրանը Հայաստանի, Ռուսաստանի և Ադրբեջանի միջև ստորագրված հայտարարությունում հիշատակված՝ Նախիջևանն Ադրբեջանին կապող նոր միջանցքը դիտարկում է ոչ ավելին, քան տարանցիկ ճանապարհ, որի անվտանգության հարցերը դեռ պետք է քննարկվեն:
Իրանի արտաքին գործերի նախարարությունը մերժել է Հայաստանի և Ադրբեջանի միջև վերջերս ստորագրված համաձայնությունից հետո սահմանային ցանկացած փոփոխություն՝ հայտարարելով, որ Թեհրանը հայտարարությունում հիշատակված նոր միջանցքը (Նախիջևանն Ադրբեջանին կապող, խմբ.) դիտարկում է ոչ ավելին, քան տարանցիկ ճանապարհ:
ԻԻՀ ԱԳՆ ներկայացուցիչ Սայիդ Խաթիբզադեն մամուլի ասուլիսի ժամանակ ողջունել է Ռուսաստանի միջնորդությամբ Հայաստանի և Ադրբեջանի միջև ձեռք բերված համաձայնությունը, որով ավարտվել է Լեռնային Ղարաբաղում 6 շաբաթ շարունակված պատերազմը:
Իրանի ԱԳՆ ներկայացուցիչը նշել է, որ Իրանի հյուսիս-արևմտյան շրջանների սահմանները ոչ մի կերպ չեն փոխվել և ապագայում չեն փոխվելու: Նրա խոսքով՝ Իրանի Իսլամական Հանրապետությունը չի ընդունում ոչ մի փոփոխություն, բացի հայտարարությունում մատնանշվածները: Անհրաժեշտ է համարվել քննարկել նաև հայտարարությունում նշված տարանցիկ ուղու անվտանգության հարցերը:
Հարցին՝ արդյո՞ք Իրանը մտադիր է խաղաղապահ ուժեր ունենալ տարածաշրջանում, Խաթիբզադեն պատասխանել է, որ Իսլամական Հանրապետությունը տարածաշրջանային բոլոր հարցերում ունեցել և ունենալու է իր ռազմավարական դերակատարումը:
Հիշեցնենք՝ Հայաստանի, Ռուսաստանի և Ադրբեջանի ղեկավարների միջև նոյեմբերի 9-ի լույս 10-ի գիշերը ստորագրվել է հայտարարություն Լեռնային Ղարաբաղում կրադի դադարեցման վերաբերյալ, ըստ որի՝ նախատեսվում է Հայաստանի տարածքով տարանցիկ ուղու տրամադրում Նախիջևանի և Ադրբեջանի միջև կապն ապահովելու համար: Ճանապարհը հսկվելու է Ռուսաստանի սահմանապահ ծառայության կողմից:
Մեկնաբանությունները