Անջատվել են հոսանքի 4300 և գազի 736 բաժանորդների կոմունալները
Հիմնական քննադատությունը, որ հնչում է կառավարության հասցեին, իրական կարիքավորներին չբացահայտելն է, որի հետևանքով «անջատումների» են ենթարկվել նաև այդ ընտանիքները:
Հայաստանում կոմունալ ծառայություններ մատուցող ընկերություններից երկուսը՝ «Հայաստանի էլեկտրական ցանցերը» և «Գազպրոմը», ապրիլի 27-ից սկսել են անջատումներ իրականացնել այն բաժանորդների գազն ու հոսանքը, ովքեր չեն վճարել մարտ ամսվա պարտավորությունները:
Վարչապետ Նիկոլ Փաշինյանը հայտնել է, որ անջատվել է էլեկտրաէներգիայի շուրջ 775 հազար բաժանորդներից 4300-ի հոսանքը, և 623 հազար գազի բաժանորդներից 736-ի գազը:
Նախօրեին սոցցանցերում ու լրատվականներին տարածվեցին տեղեկություններ, որ անջատումներ են իրականացվել նաև կարիքավոր ընտանիքներում, ինչը բարձրացրեց շատերի դժգոհությունը: Մասնավորապես՝ մեջբերվեց վարչապետի այն հայտարարությունը, որ Արտակարգ դրության ընթացքում անջատումներ չեն իրականացվելու: Այս կապակցությամբ Փաշինյանը թեև նշեց, որ դա արվել է դեռևս մարտ ամսին, երբ ակնկալվել է, որ ԱԴ-ը չի երկարացվի, սակայն բազմաթիվ կարիքավորների համար երկարաձգված դրությունը խնդիրներ է առաջացրել:
Նշված թվով բաժանորդների շարքում մի մասն իսկապես կարիքավոր է, սակայն կառավարության ղեկավարը նշել է, որ շատ են նաև մարդիկ, ովքեր հնարավորություն ունեն, սակայն չեն վճարում: Սա իր հերթին մեծ վտանգներ է առաջացնում էներգետիկ համակարգի կայունության համար: Ուստի Նիկոլ Փաշինյանը կոչ հայտարարել է, որ փորձելու են գտնել իսկապես կարիքավորներին, սակայն հնարավորությունն ունեցողներին չի ներվելու և խիստ միջոցառումները շարունակվելու են:
Հաղորդվել է, որ հոսանքազրկվել են 30 հազարից բարձր պարտավորություն ունեցող բաժանորդները: Գազասպառողների դեպքում շեմն 80 հազարից բարձր է եղել: Կառավարության հաշվարկներով՝ դրանք պետք է որ համեմատաբար վճարունակ բաժանորդները լինեն, ուստի նրանց համար մեղմացում չի կատարվել: Սակայն ընդգծենք, որ ֆինանսական վնասներ կրած ընտանիքները նույնպես ունեցել են ջեռուցման կարիք՝ երբեմն սպառելով ունեցած գումարին անհամարժեք գազ կամ հոսանք. ի վերջո՝ երեխաները և ընտանիքի բոլոր անդամները տանն են, իսկ մարտ ամիսը ցուրտ էր, և սովորականից ավելի շատ ջեռուցելու կարիք է զգացվել:
Նշվել է, որ հնարավոր է՝ մի մասը տուժի, բայց ամեն ինչ արվել է, որ համակարգը չտուժի: Հիշեցնենք, որ կառավարության ձեռնարկած 11-րդ և 12-րդ միջոցառումներով որոշակիորեն փոխհատուցվել է շուրջ 300 հազար բաժանորդների կոմունալ վճարները:
Հիմնական քննադատությունը, որ հնչում է կառավարության հասցեին, իրական կարիքավորներին չբացահայտելն է, որի հետևանքով «անջատումների» են ենթարկվել նաև այդ ընտանիքները:
Մեկնաբանությունները