Ռուսաստանում մեկնարկել են SARS-CoV-2-ի դեմ պատվաստանյութի փորձարկումները կենդանիների վրա
ՌԴ Վիրուսագիտության և կենսատեխնոլոգիայի «Վեկտոր» գիտական կենտրոնի մասնագետները սկսել են in vivo փորձարկել երկար սպասված պատվաստանյութն ընդդեմ նոր տեսակի կորոնավիրուսի: Սպասվում է, որ պատվաստանյութը հիվանդներին բուժելու համար կարող է հասանելի լինել 2020թ. վերջին:
Ռուսաստանի Սպառողների իրավունքների և մարդու արժանապատվության ապահովման ոլորտի դաշնային ծառայության Վիրուսագիտության և կենսատեխնոլոգիայի «Վեկտոր» պետական գիտական կենտրոնի (ստեղծվել է 80-ականներին և գտնվում է Նովոսիբիրսկի մարզի գիտավանում) գիտնականները մշակել են SARS-CoV-2 վիրուսի դեմ պատվաստանյութի նախատիպերը և սկսել են դրանց փոխանցումները:
Հաղորդվել է, որ սպասված պատվասանյութի նախատիպը հիմնված է 6 տարբեր տեխնոլոգիական հարթակների վրա և երևան են եկել «ամենակարճ ժամկետում»:
Դաշնային ծառայությունում նշել են, որ հետազոտողներին հաջողվել է պատվաստանյութ ստեղծել գրիպի, կարմրուկի և վեզիկուլյար ստոմատիտի՝ լայնորեն կիրառվող ռեկոմբինանտային վիրուսային վեկտորների հիման վրա, ինչպես նաև սինթետիկ պատվաստնյութերի (մՌՆԹ-պատվաստանյութեր, պեպտիդային պատվաստանյութեր և ենթամիավոր պատվաստանյութեր) խոստումնալից տեխնոլոգիայի հիման վրա: Պատվաստանյութի դիզայնի համար օգտագործել են ժամանակակից կենսատեղեկատվական համակարգերը, իսկ կառուցվածքավորումը և պատրաստի նախատիպերին հասցնելն անցկացրել են առաջատար մշակումների օգնությամբ, այդ թվում՝ հակադարձ գենետիկայի ոլորտում:
Ներկայումս պատվաստանյութի օրինակները պետք է ստուգել in vivo. լաբորատոր կենդանիների կենդանի բջիջներում, այդ թվում՝ առնետների և ստորին պրիմատների՝ համոզվելու դրա անվտանգության հարցում, փորձարկելու դրա արդյունավետությունը և ընտրելու ամենաորակյալ և անվնաս նախատիպը:
«Ռոսպոտրեբնադզորի» գիտական կենտրոնի աշխատակիցները նշել են, որ պատվաստանյութի արդյունավետության հարցին պատասխանելու համար անհրաժեշտ է փորձարկել նրա ունակությունը իմունային այն պատասխանի ուժգնացման գործում, որն ունակ կլինի պաշտպանել զգայուն կենդանիներին՝ մահացու վիրուսով վարակվելուց: Ընդ որում հետազոտողների առջև դրված են բազմաթիվ կարևոր հարցեր. անհրաժեշտ է հստակեցնել քիչ թե շատ արդյունավետ չափաբաժինը և պատվաստանյութի ներարկման հաճախականությունը, պատվաստման մեթոդը և սխեման:
in vivo թեստերին պետք է հաջորդեն անմիջապես մարդկանց վրա կլինիկական փորձարկումները: Ինչ վերաբերում է պատվաստանյութի ի հայտ գալու և այն Covid-19 հիվանդության հարուցիչ SARS-CoV-2-ով վարակված պացիենտներին հասցնելու ժամանակահատվածներին, ապա, ինչպես հաղորդվում է, դա կարող է տեղի ունենալ 2020թ. վերջին. նման ժամկետներն օպտիմիստական են:
Օրերս Առողջապահական համաշխարհային կազմակերպությունը հայտարարել էր, որ վիրուսի գենետիկ հաջորդականության ստացումից ընդամենը 60 օր հետո գիտնականները լծվել են նոր տեսակի կորոնավիրուսի դեմ պատվաստանյութի ստեղծման գործին: Ռուսաստանում ԱՀԿ ներկայացուցիչ Մելիտա Վույնովիչի խոսքով՝ կազմակերպությունը տասնյակ հաղորդումներ է ստացել տարբեր երկրների մասնագետների կողմից՝ 40 ախտորոշիչ թեստերի ուսումնասիրության և հաստատման վերաբերյալ, և մշակման փուլում են գտնվում 20 պատվաստանյութեր:
Վերջին տվյալներով՝ Covid-19-ից վարակվածների թիվն անցել է 245 հազարից՝ աշխարհի ավելի քան 145 երկրում, 10 հազարից ավելի պացիենտներ մահացել են: Ընդ որում՝ վերջին օրերին Չինաստանը, որտեղ բռնկվել էր համաճարակը, մահացությունների առումով զիջում է Իտալիային, որտեղ արդեն 3,4 հազար մարդ է մահացել և մահացությունը շարունակում է աճել: Ռուսաստանում վարակվածության 253 դեպք է արձանագրվել, 12-ն առողջացել են. հայտարարվել է բարձր պատրաստվածության ռեժիմ: Հայաստանում վարակվածների թիվը 136 է, մեկն առողջացել է: Երկրում արտակարգ դրություն է հայտարարված:
Ավելի վաղ ԱՄՆ-ում էին հայտարարել կորոնավիրուսի դեմ պատվաստանյութի առաջին կլինիկական թեստերի մեկնարկի մասին: Փորձարկումները և մշակումը ֆինանսավորվում և անցկացվում են ամերիկյան Առողջապահության և կենսատեխնոլոգիական Moderna Inc. ընկերության կողմից:
Մեկնաբանությունները