Apple-ի ցուցադրությունը կկայանա սեպտեմբերի 15-ին. ի՞նչ նորույթներ են ներկայացվելու

Apple ընկերությունը հաստատել է իր նոր արտադրանքի աշնանային ավանդական ցուցադրության ժամկետը: Միջոցառումը տեղի կունենա սեպտեմբերի 15-ին, Երևանի ժամանակով 21:00-ին:

Այս տարի ապրանքանիշի նոր արտադրանքի ցուցադրությունը Covid-19-ի պատճառով տեղի է ունենալու առցանց ձևաչափով: Ուշագրավ է, որ ցուցադրման անոնսը չի պարունակում ոչ մի ակնարկ, թե հատկապես ի՞նչ նորույթներ է Apple-ը ցուցադրելու: Սակայն, տարբեր աղբյուրների տեղեկությունների համաձայն, կարելի է անել կարևոր եզրակացություններ. միջոցառման ժամանակ iPhone 12 մենք չենք տեսնելու:

Այսպես, լրագրողների համար հրավերը կրում է «Time Flies» (ժամանակը թռչում է) գովազդային կարգախոս, ինչն ավելի շատ վկայում է խելացի ժամացույցների, քան՝ նոր սմարթֆոնի մասին: Նմանատիպ տեղեկություն են հնչեցնում նաև «ներսի մարդիկ»: Bloomberg-ի թղթակից Մարկ Գուրմանն իր թվիթերյան էջում հայտնել, որ, ինչպես իրեն տեղեկացրել են, iPhone-ի անոնսը մինչև հոկտեմբեր չի լինելու: Նրա խոսքով՝ միջոցառումը նվիրված է լինելու iPad-ին ու Apple Watch-ին:

Բացի նոր պլանշետներից ու խելացի ժամացույցներից՝ սեպտեմբերի 15-ին Apple-ը, հավանաբար, կներկայացնի Apple TV 4K հեռուստացույցը և Mac համակարգիչը՝ Apple Silicon-ի ճարտարապետությամբ: Բացի այդ, կարող են ցուցադրվել բեռների որոնման AirTag գնդակը, AirPods Studio ականջակալները, բայց, հավանաբար, այս սարքավորումների անոնսն ավելի ուշ լինի: Ենթադրվում է, որ ընկերությունը պաշտոնապես կհայտարարի օպերացիոն համակարգերի շարքի թողարկման ժամկետները, որոնք նախանշվել են դեռևս հունիսին՝ Apple-ի մշակողների համաշխարհային համաժողովին:

Ինչ վերաբերում է ապրանքանիշի նոր սմարթֆոններին, ապա iPhone 12-ը պաշտոնապես կներկայացվի հոկտեմբերին: Հապաղումը, հավանաբար, պայմանավորված է կորոնավիրուսային համավարակի պատճառով պարագաների մատակարարման հետ կապված խնդիրներով: Կան տեղեկություններ, որ ներկայացվելու են սարքավորման 4 մոդելներ. iPhone 12, iPhone 12 Max, iPhone 12 Pro և iPhone 12 Pro Max: Նոր շարքի թողարկումից անմիջապես հետո ընկերությունը դադարեցնելու է XR և 11 Pro մոդելների արտադրությունը: