«Միջանցքներ»` ոչ, բայց խորհրդային տրանսպորտային ուղիների ապաշրջափակում` հնարավոր է. Մհեր Գրիգորյան

Փոխվարչապետի ԺՊ Մհեր Գրիգորյանը հայտարարել է, որ տարածաշրջանի տրանսպորտային հաղորդակցության ապաշրջափակման համատեքստում հնարավոր են համարվում ԽՍՀՄ երկաթուղային ենթակառուցվածքների շահագործմամբ, հավասար իրավունքներով ու պայմաններով բեռնափոխադրումների իրականացումը, ուղիների վերանորոգումը:

Գրիգորյանի խոսքով` եռակողմ աշխատանքային խմբի գործունեության շարունակման դեպքում առաջիկայում այդ ուղղությամբ աշխատանքները կընդարձակվեն:

Մհեր Գրիգորյանը շեշտել է, որ տարածաշրջանային տրանսպորտային կապերի  ապաշրջափակման շուրջ տեղի ունեցող աշխատանքներում «միջանցքային» տրամաբանությամբ հարցեր Հայաստանի Հանրապետությունը չի քննարկել և չի քննարկելու:

Փոխվարչապետի պաշտոնակատարն ընդգծել է, որ 2021թ. հունվարի 11-ի հայտարարության կետերի համաձայն ստեղծված փորձագիտական ենթախմբերի կողմից իրականացվել են վերլուծական և հետազոտական ծավալուն աշխատանքներ: Դրանք վերաբերում են երկաթուղային և ավտոմոբիլային փոխադրումների` տեխնիկապես հնարավոր և արդյունավետ տարբերակների բացահայտմանը:

Գրիգորյանի խոսքով՝ հաշվի են առնվելու նաև անվտանգության, սահմանային, մաքսային և այլ տիպի հսկողության անհրաժեշտ գործառույթների կազմակերպման և իրականացման հնարավորությունները:

Ներկայումս, ինչպես նշվում է, շարունակվում են ուսումնասիրվել միջազգային փոխադրումների հետ կապված սահմանային, մաքսային և այլ տիպի հսկողության կազմակերպման հարցերը՝ ԱՊՀ նորմատիվ իրավական բազայի, ինչպես նաև մնացած այն բազմակողմ միջազգային պայմանագրերի և կոնվենցիաների կարգավորումների շրջանակներում, որոնց կողմ է հանդիսանում Հայաստանի Հանրապետությունը:

Մհեր Գրիգորյանն ընդգծել է, որ գնահատվում են նաև տարածաշրջանի այլ երկրների տրանսպորտային ենթակառուցվածքների և ուղիների հետ հնարավոր կապերի պոտենցիալ ազդեցությունը և տնտեսական էֆեկտները:

Էջանիշ

Պատճենել հղումը

Email

Տպել

Twitter

VK

Telegram