Ըստ թուրքական աղբյուրի` Ռուսաստանում կարող են բայրաքթարներ արտադրել

Թուրքիայի ավիացիոն արդյունաբերության ասոցիացիայի կողմից հրատարակվող պարբերականը հաղորդել է, որ ռուսական «Նոր անօդաչու համակարգեր» ԲԲԸ-ն դեռևս 2020թ. ամռանը համաձայնություն է կնքել թուրքական Baykar Defense-ի հետ` դրանից հետո ավելի հայտնի դարձած Bayraktar TB2-ի համատեղ արտադրության վերաբերյալ:

Նիժնի Նովգորոդում գրանցված ընկերությունը, ինչպես նշվում է, ռուսական ռազմարդյունաբերական շուկայում նոր ու դեռևս անհայտ խաղացող է, սակայն համարվում է, որ կապ ունի Պուտինի մերձավոր օլիգարխներից մեկի հետ: Թուրքական աղբյուրի պնդմամբ` ռուսական արտադրության Բայրաքթարները այլընտրանքային տարբերակներ են լինելու, քանի որ ռուսական անօդաչուների արդյունաբերությունը դանդաղում է:

Համարվում է, որ ռուսական զինված ուժերի համար արտադրվելիք ԱԹՍ-ն ստանալու է Bayraktar TB2-R անվանումը: Թուրքական տարբերակում կիրառվող արտասահմանյան դետալները պատժամիջոցների պատճառով չեն կարող Ռուսաստան տեղափոխվել, այդ պատճառով բազմաթիվ սարքավորումներ տեղական արտադրության են լինելու կամ ձեռք են բերվելու գործընկերներից:

Այսպես` էլեկտրոնային-օպտիկական կայանքը կարող է չինական Chongqing Yuanqian Electro-Optical Science And Technology Co., Ltd. ընկերության լինել կամ ռուսական տեղորոշիչ մոդուլը` ԳԼՈՆԱՍ համակարգով: Շարժիչը` Rotax 912, կմնա նույնը: Վերգետնյա կառավարման համակարգը կպատրաստվի բելառուսական АГАТ ընկերության օգնությամբ:

Հաղորդվում է, որ 2021թ. Թուրքիան նախատեսում է սկսել Bayraktar TB2-R նմուշի ամառային փորձարկումները: Այն, ինչպես նշվում է, ներկայումս պատրաստման փուլում է: