«Դժվար է հերքել, քանի որ դա հիմարություն է». Բիլ Գեյթսը՝ մարդկանց չիպավորման մասին

Microsoft-ի հիմնադիր, միլիարդատեր Բիլ Գեյթսը մեկնաբանել է հայտնի կոնսպիրոլոգիական տեսությունն այն մասին, թե մտադիր է Covid-19-ի դեմ պատվաստման անվան ներքո չիպավորել մարդկանց:

Ինչպես հաղորդվում է՝ Բիլ Գեյթսը հայտարարել է, որ երբեք չի զբաղվել միրոչիպերի և նմանատիպ այս սարքավորումներով. «Շատ դժվար է հերքել դա, քանի որ հիմարություն է կամ տարօրինակ»:

Գեյթսը նշել է, որ այդպիսի բամբասանքները և ոչ գիտական արտահայտությունները հանգեցնում են մարդկանց միջև թշնամանքի առաջացմանը: Նրա խոսքով՝ երբ ի վերջո պատվաստանյութը ստեղծվի, անհրաժեշտ կլինի, որպեսզի խմբային իմունիտետ ձևավորվի և բնակչության շուրջ 80%-ը պատվաստված լինեն: Սակայն եթե մարդիկ մտածեն, թե դա խաբեություն է, պատվաստանյութը վնասակար է, և չցանկանան պատվաստվել, ապա հիվանդությունը կշարունակի սպանել մարդկանց: Գեյթսը նշել է, որ իրեն անհանգստացնում է նման գաղափարների առկայությունը:

Հունիսի 4-ին Բիլ և Մելինդա Գեյթսերի՝ աշխարհում խոշորագույն բարեգործական հիմնադրամը հայտարարել է, որ հինգ տարվա ընթացքում 1,6 մլրդ դոլար է հատկացնելու Պատվաստանյութերի և իմունիզացիայի համաշխարհային միությանը (GAVI)՝ աշխարհի ամենաաղքատ երկրները կյանքի նվազագույն պայմաններով ապահովելու համար: Եվս 100 մլն դոլար ուղղվելու է կորոնավիրուսի դեմ պատվաստանյութի տարածմանը, երբ այն մշակվի:

Կոնսպիրոլոգիական տեսությունն այն մասին, թե Բիլ Գեյթսը ցանկանում է միլիարդավոր մարդկանց չիպավորել՝ մոլորակի բնակչության քանակությունը վերահսկելու նպատակով, մեծ տարածում է ստացել Covid-19 կորոնավիրուսի համավարակի ժամանակ: Yahoo News-ի հարցումների համաձայն՝ դրան հավատում է ամերիկացիների 28%-ը: