Հայաստանը Թուրքիայի դեմ գանգատ է ներկայացրել ՄԻԵԴ
Եվրոպական դատարան են ներկայացվել բազմաթիվ և ծավալուն ապացույցներ Թուրքիայի կողմից սիրիացի վարձկաններ հավաքագրելու և Ադրբեջան տեղափոխելու, ադրբեջանական զինված ուժերին ռազմական տեխնիկա, զենք և զինամթերք է մատակարարելու, ինչպես նաև այլ միջոցներով հակամարտությանը ներգրավվելու վերաբերյալ:
ՄԻԵԴ-ում ՀՀ ներկայացուցչությունը հայտարարել է, որ Հայաստանի Հանրապետությունը միջպետական գանգատ է ներկայացրել Մարդու իրավունքների եվրոպական դատարան` ընդդեմ Թուրքիայի:
Գանգատը վերաբերում է 44-օրյա պատերազմի ընթացքում Թուրքիայի կողմից սիրիացի վարձկաններ հավաքագրելու և Ադրբեջան տեղափոխելու միջոցով կոնվենցիոն խախտումներ թույլ տալուն, ինչպես նաև Ադրբեջանին ռազմական օժանդակություն ցուցաբերելուն, որը ևս հանգեցրել է կոնվենցիոն խախտումների:
Նշվում է, որ, ՀՀ կառավարության պնդմամբ, Թուրքիան խախտել է Արցախի և Հայաստանի բնակչության կյանքի, խոշտանգումներից և անմարդկային վերաբերմունքից զերծ մնալու, անձեռնմխելիության, սեփականության, անձնական և ընտանեկան կյանքի, և մի շարք այլ իրավունքներ:
Կառավարության կողմից գանգատին կից ՄԻԵԴ են ներկայացվել նաև բազմաթիվ և ծավալուն ապացույցներ, որոնց հավաստմամբ` Թուրքիան սիրիացի վարձկաններ է հավաքագրել և տեղափոխել Ադրբեջան, ադրբեջանական զինված ուժերին ռազմական տեխնիկա, զենք և զինամթերք է մատակարարել, ինչպես նաև այլ միջոցներով ներգրավվել է հակամարտությանը:
Մեկնաբանությունները