Թուրքական ծառայությունները տեղեկատվական գրոհ են իրականացնում Ռուսաստանի և Հայաստանի դեմ
Տելեգրամյան ալիքն ընդգծում է, որ թուրքերը ձգտում են ամեն ինչ անել` Արցախը հայաթափելու և Ռուսաստանի նկատմամբ անվստահություն սերմանելու ուղղությամբ: Շեշտվում է, որ այսօրինակ քարոզչությունը մեծ տեղ է գտնում նաև հայկական լրատվական տիրույթում:
Տելեգրամյան ալիքներից մեկն ուշադրություն է հրավիրել այն բանի վրա, որ ժամանակակից պատերազմներում մեծացել է տեղեկատվական հարձակումների դերը: Այստեղ որպես լավագույն օրինակ է բերվում Հայաստանի նկատմամբ տարվող գրոհը:
Նշվում է, որ ներկայումս թուրքական համապատասխան ծառայությունները զանգվածային գրոհ են իրականացնում Ռուսաստանի և Հայաստանի դեմ: Որպես թիրախ է ընտրվել Արցախի Պաշտպանության բանակը: Ընդգծվում է, որ թուրքերը ձգտում են ամեն ինչ անել` Արցախը հայաթափելու և Ռուսաստանի նկատմամբ անվստահություն սերմանելու ուղղությամբ: Ալիքը շեշտում է, որ այսօրինակ քարոզչությունը մեծ տեղ է գտնում նաև հայկական լրատվական տիրույթում:
Խոսքը, մասնավորապես, վերաբերում է Արցախի պաշտպանության վերակազմավորման մասին լուրերին: Իրականում, ինչպես նշվում է, դա այդպես չէ, և բերվում է օրինակ, որ Գորիս-Ստեփանակերտ ճանապարհի ամբողջ երկայնքով միայն Շուշիի մատույցներում են երևում թուրք-ադրբեջանական զինվորներ, այն էլ` պատնեշից այն կողմ, որոնք ելք չունեն դեպի մայրուղի:
Հաղորդվում է, որ ռուս և հայ սահմանապահները և ռուս խաղաղապահները վերահսկում են ամբողջ ճանապարհը: Հայերի փաստաթղթերը հայերն են ստուգում, ռուսներինը` ռուսները: Նշվում է, որ սահմանապահները և խաղաղապահները շատ բարեհամբույր են, հրաշալի հարաբերություններ ունեն տեղացիների հետ:
Իսկ Արցախի պաշտպանության վերակազմավորման մասին ընդգծվում է, որ այն ոչ միայն չի թուլանալու, այլև, հաշվի առնելով նախորդ պատերազմի դասերը, ուժեղանալու է: Համարվում է, որ հիմնական շեշտադրումը կատարվելու է պրոֆեսիոնալ բանակի և հատուկ գործողությունների ուժերի մեծացման վրա: Նշվում է, որ աշնանը տեղի ունեցած պատերազմում հայկական կողմի պարտության պատճառներից մեկը զինծառայողների թվաքանակն է եղել: Շեշտվում է, որ հրադադարի պայմաններում Արցախը կարող է բանակում որակյալ բարեփոխումներ իրականացնել: Եվ թուրքական տեղեկատվական գրոհները հենց այս հարցն են թիրախավորել:
Աղբյուրը նշում է, որ թեև Հայաստանը ներկայումս բազմաթիվ խնդիրներ ունի, սակայն Արցախում ամեն ինչ այնքան էլ վատ չէ, ինչպես ներկայացվում է սոցցանցային մեկնաբանություններում:
Անդրադառնալով Արցախի ՊԲ-ի վերակազմավորման մասին Հայաստանի իշխանությունների դիրքորոշմանը, տելեգրամյան ալիքը նշում է, որ պաշտոնական Երևանն Արցախում տեղի ունեցողի հետ այս պահին ոչ մի առնչություն չունի (այդպիսի տպավորություն է):
Մեկնաբանությունները