Ադրբեջանցիները Սև լճի հատվածում հետ են քաշվել: Upd. հետ չեն քաշվել. բանակցությունները շարունակվում են

Տեղեկություն է ստացվել, որ ադրբեջանական զինված ստորաբաժանումները, որոնք այսօր վաղ առավոտյան առաջացել էին Սյունիքի մարզի տարածքում` Սև լճի ուղղությամբ, բանակցություններից հետո հետ են քաշվել նախնական դիրքեր:

Հաղորդվում է, որ մի քանի ժամ տևած բանակցություններից հետո ադրբեջանցի զինվորականները հետ են քաշվել, լարվածությունն այս պահին թուլացել է:

Ռուս ներկայացուցիչների ժամանումից առաջ տեղում գործողություններ իրականացնող հայկական ստորաբաժանումները, ինչպես նշվում է, շատ օպերատիվ են գործել, գրագետ ու համարձակ աշխատանքների արդյունքում ադրբեջանցիները կանգ են առել: Ներկայումս ռուս զինվորականները գտնվում են Գորիսում, սպասվում է, որ այդտեղ է ժամանելու խաղաղապահ զորախմբի հրամանատար Մուրադովը:

Հաղորդվում է նաև, որ ռուսական կողմին պատկանող ուղղաթիռներն այս պահին պտտվում են Սյունիքի մարզի նշված տարածքի վրա` թույլ չտալու իրավիճակի լարում։

Միևնույն ժամանակ հաղորդվել էր, որ Գեղարքունիքում նույնպես ադրբեջանցիներն առաջ են եկել: Մարզպետ Գնել Սանոսյանը նշել է, որ հակառակորդի ստորաբաժանումները տեղակայվել են այն դիրքերում, որոնք ձմռանը զբաղեցնել հնարավոր չէր: Սանոսյանի խոսքով` հակառակորդի դիրքավորման ընթացքում ի հայտ եկած կասկածելի հատվածները ճշգրտվում են ՀՀ զինված ուժերի ներկայացուցիչների կողմից:

UPD. Սյունիքի մարզպետ Մելիքսեթ Պողոսյանը հայտնել է, որ ադրբեջանցիները դեռ չեն հեռացել ՀՀ տարածքից: Նրա խոսքով` բանակցությունները դեռ շարունակվում են:

Մարզպետը պնդել է, որ ադրբեջանական կողմը հատել է պետական սահմանը, մուտք է գործել ՀՀ տարածք` Սև լճի հատվածում դիրքավորվելու նպատակով, սակայն նրանց մոտ առկա քարտեզների հետ հայկական կողմը համաձայն չէ: Պողոսյանը վստահորեն նշել է, որ տվյալ տարածքը Հայաստանինն է, և ադրբեջանցիները պետք է հեռանան այդտեղից: