Հայերն Արցախում Թուրքիայի դեմ են կռվել, ոչ թե` Ադրբեջանի. Սատանովսկի
Մերձավոր Արևելքի ռուսական ինստիտուտի նախագահի համոզմամբ` Ադրբեջանում թուրքական ռազմաբազայի ստեղծման հավանականությունը 100% է, իսկ ռազմական տեսանկյունից` Թուրքիան արդեն Ադրբեջանում է:
Մերձավոր Արևելքի ռուսական ինստիտուտի նախագահ Եվգենի Սատանովսկին հայտարարել է, որ Ադրբեջանում թուրքական ռազմաբազայի ստեղծման հավանականությունը 100% է:
Նրա խոսքով` ռազմական տեսանկյունից` Թուրքիան արդեն Ադրբեջանում է, իսկ հայերը, Սատանովսկու պնդմամբ, Արցախում կռվել են ոչ թե Ադրբեջանի, այլ` Թուրքիայի դեմ:
Ռուսաստանի համար այդ ռազմաբազայի վտանգավորության մասին հարցին ի պատասխան` Սատանովսկին շեշտել է, որ եթե Ռուսաստանի համար ինչ-որ վտանգ առաջանա, այն կարող է ոչնչացվել, անկախ նրանից, թե որ երկիրն է վտանգ ներկայացնողը: Դա, նրա խոսքով, վերաբերում է ինչպես Միացյալ Նահանգներին, այնպես էլ` Թուրքիային: Ընդգծել է, որ Ռուսաստանը ձգտում է դրան չհասնել, սակայն իր վտանգները կարող է չեզոքացնել:
Հիշեցնենք, որ Թուրքիայի և Ադրբեջանի նախագահները հունիսի 15-ին օկուպացված Շուշիում ստորագրել են հռչակագիր, որը նախատեսում է համագործակցության լայն շրջանակ, այդ թվում` ռազմական դաշնակցություն: Դրանից հետո Էրդողանը չէր բացառել Ադրբեջանում ռազմաբազայի տեղակայումը:
Մեկնաբանությունները