Հայաստան. գնաճը` 4,9%, ՀՆԱ նվազումը` 6,6%

Գնաճը` 4,9%

Վիճակագրական կոմիտեի տվյալներով` Հայաստանում 2020թ. դեկտեմբերին նախորդ տարվա նույն ամսվա համեմատ արձանագրվել է սննդամթերքի և ոչ ալկոհոլային խմիչքի գնի 4,9%, իսկ 2020թ. նոյեմբերի համեմատ՝ 7,2%:

Հացաբուլկեղենի և ձավարեղենի ապրանքախմբում 2020թ. դեկտեմբերին 2019-ի դեկտեմբերի համեմատ գնաճը կազմել է 7,4%, իսկ 2020թ. նոյեմբերի համեմատ՝ 4,2%: Նշվում է, որ հացի և ալյուրի գնաճը 2020թ. դեկտեմբերին 2019թ. նույն ամսվա համեմատ կազմել է համապատասխանաբար 7,3% և 10,0%, իսկ 2020-ի նոյեմբերի համեմատ՝ 6,1% և 2,2%:

Բանջարեղենի ապրանքախմբում այս դեկտեմբերին 2019թ. դեկտեմբերի համեմատ գնաճը կազմել է 2,8%, իսկ 2020-ի նոյեմբեր ամսվա համեմատ՝ 35,9%, յուղերի և ճարպերի ապրանքախմբում արձանագրվել է համապատասխանաբար 13,1% և 6,1% գնաճ: Ընդ որում` արևածաղկի բուսական յուղի միջին գնաճը 2020թ. դեկտեմբերին 2019թ. դեկտեմբերի համեմատ կազմել է 35,3%, իսկ 2020թ. նոյեմբերի համեմատ՝ 12,3%:

Վիճակագրական տվյալների համաձայն` շաքարի և շաքարավազի գները 2020-ի դեկտեմբերին նախորդ տարվա նույն ամսվա համեմատ արձանագրվել է 38,1%, իսկ 2020թ. նոյեմբեր ամսվա համեմատ՝ 3,0% գնաճ: Կաթնամթերքի, պանրի և ձվի ապրանքախմբում 2020թ. դեկտեմբերին 2019թ. դեկտեմբերի համեմատ գնաճը կազմել է 5,8%, իսկ 2020թ. նոյեմբերի համեմատ՝ 3,6%: Ձվի գինն աճել է համապատասխանաբար 18,5%-ով և 13,1%-ով:

Մսամթերքը 2020թ. դեկտեմբերին 2019թ. դեկտեմբերի համեմատ գրանցել է 0,6% գնանկում, իսկ 2020թ. նոյեմբերի համեմատ ունեցել է 1,1% գնաճ: Ընդ որում` թռչնամսի գնաճը 2020թ. դեկտեմբերին 2019թ. դեկտեմբերի համեմատ կազմել է  6,5%,  իսկ 2020թ. նոյեմբերի համեմատ՝ 8,3%:

Ձկան և ծովամթերքի գնաճը 2020թ. դեկտեմբերին նույն տարվա նոյեմբերի համեմատ կազմել է 0,1%, ալկոհոլային խմիչքինը և ծխախոտային արտադրատեսակներինը՝ 0,2%, ոչ ալկոհոլային խմիչքինը, սուրճինը, թեյի կակաոյինը՝ 0,5%:

ՀՆԱ-ն նվազել է 6,6%-ով

Եվրասիական տնտեսական հանձնաժողովի (ԵՏՀ) տվյալներից հայտնի է դարձել, որ Հայաստանի համախառն ներքին արդյունքը, ընթացիկ գներով և ՀՀ կենտրոնական բանկի կողմից հաշվարկված՝ ԱՄՆ դոլարի նկատմամբ հայկական դրամի միջին փոխարժեքով, 2020թ. հունվար-սեպտեմբերին կազմել է 8 մլրդ 844,5 մլն ԱՄՆ դոլար: Ցուցանիշը նախորդ տարվա նույն ժամանակահատվածի համեմատ, մշտական գներով, նվազել 6,6%-ով։

Նույն աղբյուրի հաղորդմամբ` Եվրասիական տնտեսական միության (ԵԱՏՄ) երկրների 2020թ. առաջին ինն ամիսների ընդհանուր ՀՆԱ-ն կազմել է 1 տրլն 252 մլրդ 609 մլն դոլար. սա 2019 թվականի նույն ժամանակահատվածի համեմատ 3,3%-ով պակաս է։

ԵԱՏՄ մյուս անդամ-պետություններից Բելառուսում ՀՆԱ-ն 2020-ի հունվար-սեպտեմբերին նախորդ տարվա նույն ժամանակահատվածի համեմատ նվազել 1,3%-ով` կազմելով 44 մլրդ 55,5 մլն ԱՄՆ դոլար:

Ղազախստանի, Ղրղզստանի և Ռուսաստանի դեպքում ՀՆԱ-ի ցուցանիշը հաշվարկվել է ընթացիկ գներով և կենտրոնական (ազգային) բանկերի կողմից հաշվարկված՝ ԱՄՆ դոլարի նկատմամբ ազգային արժույթների միջին փոխարժեքով։ Այսպես,

Ղազախստանում 2020-ի առաջին ինն ամիսներին 2019թ. նույն ժամանակահատվածի համեմատ ՀՆԱ-ն նվազել 2,8%-ով, Ղրղզստանում արձանագրվել է 6% նվազում, իսկ Ռուսաստանում` 3,3%։